2 Thessalonians 1

nyankole

Jump to: Chapter 2 →

1Nyowe Paulo na Silivaano na Timoteeho nituhandiikira ab'ekigombe ky'abaikiriza aba Tesalonika, abari omuri Ruhanga Tataitwe na Mukama Yesu Kristo,

2nitubendeza emigisha n'obusingye ebikomooka ahari Ruhanga Taata na Mukama Yesu Kristo.

3Beene Taata, tushemereire kusiima Ruhanga obutoosha ahabwanyu nk'oku kishemereire, ahabw'okuba okwikiriza kwanyu nikukura munonga, kandi n'okukundana kw'omuntu na mugyenzi we omuriimwe nikukanya.

4N'ahabw'ekyo nimutwesiimisa omu bigombe by'abaikiriza Ruhanga, ahabw'okuhama kwanyu n'ahabw'okwikiriza omu kuhiiganisibwa kwanyu kwona n'omu kureebesibwa enaku, ebi murikugumisiririza.

5Ekyo nikyoreka ku okucwa orubanja kwa Ruhanga kuri okw'oburyo, ngu mubone kushangwa muri abashemereire obukama bwe obu murikubonabonera.

6Manya Ruhanga naareeba ngu n'eky'obwinganisa okubonabonesa abarikubabonabonesa,

7kandi naimwe abarikureebesibwa enaku okubaha ekihuumuro hamwe naitwe. Haza ebyo biryabaho obu Mukama Yesu arishuuruuka naaruga omu iguru aine baamaraika be ab'amaani,

8n'omuriro gurikunaga enkobe, kuhoora enzigu abatarikumanya Ruhanga, n'abatarikworobera Makuru Marungi ga Mukama waitu Yesu.

9Baryaheebwa ekifubiro ky'okuhwerekyerera kw'ebiro n'ebiro, bacuubwe omu maisho ga Ruhanga n'omu kitiinwa ky'obushoboorozi bwe,

10ku ariija ahari ekyo Kiro kuhimbisibwa omu barikwera be, n'okutangaarirwa omu baikiriize boona, ahabw'okuba obuhamya obu twabahaire, mukabwikiriza.

11Nikyo tutooshera kubashabira, ngu Ruhanga waitu abahindure abashemereire okweta kwe, kandi ahikiirize n'amaani ge ebirungi byona ebi mumaririire kukora, n'ebi murikukora ahabw'okwikiriza.

12Haza eiziina rya Mukama waitu Yesu riryahimbisizibwa omuriimwe, naimwe omuriwe, nk'oku embabazi za Ruhanga waitu na Mukama Yesu Kristo ziri.

Jump to: Chapter 2 →