2 Timothy 1

nyankole

Jump to: Chapter 2 →

1Nyowe Paulo, ou Ruhanga yaasiimire kuba entumwa ya Kristo Yesu, nkooherezibwa kurangirira amagara agaaraganisiibwe, agu tutungira omuri Kristo Yesu,

2ninkuramutsya iwe Timoteeho omwana wangye omukundwa, ninkwendeza emigisha, embabazi n'obusingye ebikomooka ahari Ruhanga Taata, na Kristo Yesu Mukama waitu.

3Ninsiima Ruhanga ou mpeereza n'omutima gwezire, nk'oku baatatenkuru baagizire.

4Obutoosha musiima ku mba ninkwijuka omu kushaba kwangye, nyekiro na nyomushana. Niinyijuka amarira gaawe, kandi nyine orushusho rw'okukureeba, mbone kushemerererwa kimwe.

5Nyijuka okwikiriza kwawe okw'amazima, oku Loisi nyokwenkuru na Euniike nyoko baabaire baine, kandi na hati nimpamya ku naiwe okwine.

6Nikyo ndikukwijukiza ku oyenegyeza ekiconco kya Ruhanga ekiri omuriiwe, eki waatungire obu naakutaho emikono.

7Manya Ruhanga taratuhaire mutima gw'obwoba, kureka ogw'amaani, na rukundo n'okwebariirira.

8N'ahabw'ekyo otariitwa enshoni okugamba ebya Mukama waitu, nari okuzingirira nyowe embohe ye. Kureka okwatanise naanye okubonabonesibwa ahabw'Amakuru Marungi, nookwatsibwa amaani ga Ruhanga.

9Manya niwe yaatujunire akatweta kuba abe, ti habw'ebi twakozire, kureka ahabw'enaama ye n'embabazi ezi yaatugiririire omuri Kristo Yesu iranaira.

10Mbwenu ezo mbabazi zoorekyeirwe omu kuboneka kw'Omujuni waitu Kristo Yesu, owaacwekyereize rufu, akoorekyera omu Makuru Marungi amagara agatahwaho.

11Ago Makuru Marungi nigo naateereirweho kuba omurangirizi, entumwa kandi omwegyesa;

12kandi nikyo ndikubonabonera ntyo. Kwonka tikirikuunyitsa nshoni, ahabw'okuba nimmanya ou naikiriize, kandi nimpamya ku arikubaasa kurinda eki naamukwatsize okuhitsya aha kiro kiri.

13Guma okuratire eky'okureeberaho ky'ebigambo bihikire, ebi waahuriire ningamba, kandi ohamire omu kwikiriza n'omu kukunda ebiri omuri Kristo Yesu.

14Ekirungi eki waakwatsiibwe, guma okirinde noohwerwa amaani ga Mutima Orikwera otuura omuriitwe.

15Noomanya ku ab'omuri Asiya boona bantsigireho, haza barimu Fugelo na Herumogyene.

16Mukama agirire ab'omuka ya Onesiforo embabazi, ahabw'okuba kaingi akanduhuura. Tarampemukireho ndi omu njegyere,

17kureka ku yaahikire Rooma, yansherura munonga, yaarugaho yambona.

18Mukama amuhe okugirirwa embabazi ze aha kiro kiri! Naiwe noomanya gye byona ebi yankoreire ndi Efeso.

Jump to: Chapter 2 →