Ephesians 3

nyankole

← Chapter 2 Jump to: Chapter 4 →

1N'ahabw'ekyo nyowe Paulo, embohe ya Kristo Yesu, imwe Abanyamahanga, nimbashabira ahari Ruhanga.

2Ningira ngu mukahurira oku naakwatsiibwe omurimo gw'embabazi za Ruhanga ahabwanyu,

3n'oku eibanga rye naarimanyiire omu kushuuruurirwa, nk'oku naabibahandiikiireho omu bigufu.

4Ku muraabishome, nibwo muraashoboorokyerwe oku naayetegyereize eby'eibanga rya Kristo,

5eritaramanyisiibwe bantu b'obundi busingye, nk'oku hati Mutima arishuuruuriire abarikwera be entumwa n'abarangi.

6Nikwo kugira ngu Abanyamahanga nabo n'abahunguzi hamwe naitwe, n'engingo z'omubiri gumwe, kandi abakwataniise naitwe omu bi Ruhanga yaaturaganisiize omuri Kristo Yesu, nibimanyisizibwa omu Makuru Marungi.

7Naanye ahabw'ekiconco ky'emigisha ya Ruhanga ei naahairwe ahabw'amaani ge agaabaire nigakorera omuriinye, nkahindurwa, naaba omuheereza w'ago Makuru Marungi.

8Nyowe nobu ndaabe nimpereerukayo omu barikwera boona, kwonka nkaheebwa omugisha gw'okurangirira Abanyamahanga eby'obutungi bwa Kristo obuteetegyerezibwa,

9kandi n'okushoboororera boona oku enaama y'eibanga, eryasherekirwe okwiha ira ryona omuri Ruhanga owaahangire byona, eshemereire kuhikiirizibwa

10ngu omu biro ebi, ab'obutegyeki n'ab'obushoboorozi ab'omu myanya y'omu iguru, babone kumanyisizibwa, omu kigombe ky'abaikiriza, eby'obwengye bwa Ruhanga obw'emiringo yoona.

11Nk'oku Ruhanga yaakicumire okwiha ira ryona, akakihikiiririza omuri Kristo Yesu Mukama waitu,

12otuhaisa obumanzi n'obwesigye bw'okwehikira ahari Ruhanga ahabw'okumwikiriza.

13N'ahabw'ekyo nimbashaba murekye kwehwa amatsiko ahabw'enaku ezi ndikureeba ahabwanyu, ahabw'okuba ekyo nikibahaisa ekitiinwa.

14N'ahabw'ekyo nintsimbira Ruhanga Taata amaju,

15ou enganda zoona ez'omu iguru n'ez'omu nsi zeetererwa,

16nimmushaba ngu nk'obwingi bw'ekitiinwa kye oku buri, abahe okugumibwa amaani ga Mutima we,

17Kristo abone kutuura omu mitima yaanyu ahabw'okwikiriza. Ninshaba ngu mutsimbe emizi omuri rukundo mugihamiremu,

18haza mubone kwetegyereza hamwe n'abarikwera boona obuhango, n'oburaingwa, n'obwemi, n'obucuzi ebya rukundo ya Kristo.

19Eego, ninshaba ku mumanya rukundo ye egyo erengire okumanya kwona, mubone kwijurizibwa kimwe okwijura kwona okwa Ruhanga okuhikire.

20Ogwo obaasa kukora ebirikukirira kimwe ebi tushaba, nari ebi tuteekateeka, ahabw'amani ge agakorera omuriitwe,

21aheebwe ekitiinwa omu kigombe ky'abaikiriza, omu kuteeranwa kwaitu na Kristo Yesu, omu b'oruzaaro oru n'oruriguma nirukuratanaho ebiro n'ebiro. Amiina.

← Chapter 2 Jump to: Chapter 4 →