James 1

nyankole

Jump to: Chapter 2 →

1Nyowe Yakobo, omuheereza wa Ruhanga kandi owa Mukama Yesu Kristo, nimbaramutsya imwe ab'enganda ikumi na ibiri ezaataataine.

2Banyaruganda, ku muraagume mwahikwaho ebigyezo by'emiringo etari emwe, mubyemere mushemereirwe,

3ahabw'okuba nimumanya okugyezibwa kw'okwikiriza kwanyu kurugwamu okuhama.

4Mbwenu murekye okwo kuhama kuhitsye omurimo gwakwo, mubone kuba abahikiire kimwe kandi abahamire omu by'omutima, abataine ki babuzirweho.

5Omuriimwe ku haraabe hariho obuzirwe obwengye, abushabe Ruhanga oha abantu boona n'obufura ataine kanyomo, haza aryabuheebwa.

6Kwonka ashabe aine okwikiriza atarikubangaanisa, ahabw'okuba abangaanisa ari nk'ekingonzi ky'enyanja ekitwarwa omuyaga gukakitooza oku n'oku.

7Omuntu nk'ogwo arekye kuteekateeka ngu naija kugira eki yaatunga ahari Mukama;

8ahabw'okuba n'ow'emitima ebiri, kandi omu mitwarize ye yoona tahamire.

9Omunyaruganda omworo ashemereire kwesiima, Ruhanga yaaba amutungwire.

10N'omutungi nawe atyo, Ruhanga yaaba amubundikire. Manya omutungi aryahunduuka nk'orurabyo rw'ebishaka.

11Eizooba ku rirugayo riine ekibiga kirikubabura, rihonzya ebimera, orurabyo rwabyo ruragara, n'oburungi bwabyo buhwaho. N'omutungi nikwo arihwa atyo amaizi omu bi arikwitanira.

12Omuntu orikugumisiririza okugyezibwa aine omugisha, ahabw'okuba ku ariheza kukwemera, aryaheebwa ekirunga ky'amagara, eki Ruhanga yaaraganiise abamukunda.

13Omuntu ku araayohibwe, arekye kugira ati: Naayohibwa Ruhanga. Manya Ruhanga tayohibwa kibi, kandi nawe wenka tagira ou ayosya,

14kureka buri muntu ayohibwa naabeihwabeihwa, kandi naatwarwa okwetenga kwe kubi.

15Reero okwetenga okubi ku kutwara enda, kuzaara ekibi; n'ekibi ku kikura, kizaara okufa.

16Banyaruganda abakundwa, mutaribeihwabeihwa.

17Engabirano yoona n'ekiconco kyona ekihikiire kimwe, biruga omu iguru owa Ruhanga Taata, Omuhangi w'ebyakira omu iguru, ou owe hatabayo kuhindahinduka nari okwiririmba.

18Ahabw'okwekundira kwe akatubaisaho n'ekigambo ky'amazima, ngu tube emiganuro y'ebi yaahangire.

19Banyaruganda abakundwa, mbwenu eki mukimanye; k'omuntu weena abe orikurahuka kuhurira, kandi otarikurahukirwa kugamba n'okugira ekiniga.

20Manya omuntu oine ekiniga tahitsya by'okuhikiirira ebi Ruhanga ayenda.

21N'ahabw'ekyo mweiheho emicwe mibi yoona n'emitwarize mibi yoona. Mwakiire n'obucureezi ekigambo eki Ruhanga yaataire omu mitima yaanyu, ekirikubaasa kubajuna.

22Mube abarikuhitsya ekyo kigambo, mutari abarikukihurira kusha, mukeebeihabeiha.

23Manya weena ohurira ekigambo, kwonka atarikukihitsya, ashusha nk'omuntu owaayereebera omu ndeeberwamu.

24Haza ku ayereeba yaagyenda, ayebwa ahonaaho oku arikushusha.

25Kwonka oyetegyereza eiteeka erihikiire kimwe, niryo iteeka eritwiha omu buhuuku, haza akarihamiramu, atari muhurizi orikwebwa, kureka omukozi orikurihitsya, aryaheebwa Ruhanga omugisha omu bi arikukora.

26Omuntu orikwemanya ngu n'omunyadiini, kwonka atarikutegyeka rurimi rwe, kureka akeebeihabeiha omu mutima, ogwo muntu ediini ye n'eya busha.

27Ediini empuuhe kandi etasiisikaire mu maisho ga Ruhanga Tataitwe niyo egi: okushuura efuuzi n'abafaakazi bari omu naku, kandi n'okwerinda okushiishwa ensi.

Jump to: Chapter 2 →