Jude 1

nyankole

Jump to:

1Nyowe Yuda, omuheereza wa Yesu Kristo; kandi murumuna wa Yakobo, nimbahandiikira imwe abaayetsirwe, abarikukundwa omuri Ruhanga Taata, kandi abarindiirwe Yesu Kristo

2Embabazi, obusingye na rukundo nibikakanye omuriimwe.

3Bagyenzi bangye abakundwa, ku mbaire nyine ekihika ky'okubahandiikira aha by'okujunwa kwaitu twena, naareeba ningyemeserezibwa kubahandiikira nimbeehanangiriza ku murwanirira enyikiriza ei abarikwera baahairwe omurundi gumwe kikahwa.

4Manya abantu bamwe beetaahize omuriimwe bwesherekye. Nibo abo abaagambirweho ira ku baricwerwa orubanja rukabasinga. N'abantu abatatiina Ruhanga, abahindura embabazi za Ruhanga waitu orwekwatso bakeehakana Omutegyeki waitu omwe wenka kandi Mukama waitu Yesu Kristo.

5Mbwenu, nobu muraabe muramanyire ebyo byona, niinyenda kubaijutsya ku Mukama owaihire abantu be omu nsi ya Misiri, bwanyima yaacwekyereize abataraikiriize.

6Na baamaraika abaarengize aha rugyero rw'obukuru bwabo, bakatsigaho obutuuro bwabo, ku Ruhanga ogwo yaabarindiire omu mwirima ndindindi, babohesiibwe enjegyere ezi batarirugamu obutwire bwona, okuhitsya obu ekiro kikuru ky'okucwererwaho orubanja kirihika.

7Nk'oku ab'omuri Sodoma na Gomora, n'ezindi ndembo ezaabaire zihereeraine nazo, baaraayire batyo bakeeroha omu by'obushambani obutari bw'obuhangwa; ezo ndembo zikaba eky'okureeberaho, niziheebwa ekifubiro ky'okwokibwa omuriro ogutaraara.

8Omu muringo nk'ogwo, n'abo bantu nikwo bahagaza batyo emibiri yaabo, nibabeihwabeihwa ebirooto byabo, bakagaya obushoboorozi bwa Ruhanga, kandi bakajuma ab'ekitiinwa ab'omu iguru.

9Haza kunu na Mikaeli omukuru wa baamaraika obu yaabaire naatongana na Sitaane, naahakana nawe aha by'omubiri gwa Musa, tareehangire kumucwera rubanja naamujuma, kureka akamugira ati: Mukama abe niwe yaakuhana.

10Kwonka abo bantu bajuma ibara kintu eki batarikumanya, kandi n'ebi barikumanya nibatwarwa obuhangwa bwabo, nk'enyamaishwa zitagira bwengye, nibyo bibahwerekyereza.

11Ebishi, baryakareeba! Ahabw'okuba batoora omuhanda gwa Kaini, beeroha omu buhabe bwa Balaamu ahabw'okwetungisa, kandi bahwerekyerera omu bugomi bwa Koora.

12Nibo bashiisha amagyenyi gaanyu ag'okukundana, barengyesereza omu kunywa bajarami bataine nshoni. Bari nk'ebicu bitarimu maizi ebitwarwa omuyaga, nari nk'emiti etariho bijuma omu ishaaruura, efiire kabiri, kandi erandukire.

13Nainga nk'ebingonzi by'enyanja etarikutiinisa, nibabira eifuro ry'okuhemuka kwabo. Bari nk'enyonyoozi zirikuzengyerera, babiikiirwe okuguma omu mwirima ebiro byona.

14Nibo Enoka ow'oruzaaro rwa mushanju okwiha ahari Adamu yaarangire naagira ati: Reeba, Mukama naija n'abarikwera be obukumi n'obukumi,

15kucwera abantu boona orubanja, n'okurusingisa abatatiina Ruhanga boona, ahabwa byona eby'okutamutiina ebi baacumwire omu muringo nk'ogwo; kandi n'ahabw'ebigambo bibi ebi abasiisi abatamutiina baamurogotsireho.

16Nibo abo abeetomboita, abatonzya, abategyekwa okwetenga kwabo okubi, abu akanwa kaabo kagamba eby'okwetunguura, abamamarika abantu, ngu bakaagira eki baabaihaho.

17Bagyenzi bangye, kwonka mushemereire kwijuka ebi entumwa za Mukama waitu Yesu Kristo zaarangire.

18Zikabagira ziti: Omu biro by'aha muheru, haryabaho abashekyeerezi abarikutegyekwa okwetenga kwabo okubi, batarikweta ha bya Ruhanga.

19Nibo abo abareeta okwetaanisamu, n'abantu b'ensi abataine Mutima wa Ruhanga.

20Kwonka imwe bagyenzi bangye, mwehamize omu kwikiriza kwanyu okurikwera munonga, nimushabira omuri Mutima Orikwera.

21Mugume omuri rukundo ya Ruhanga, mutegyereize embabazi za Mukama waitu Yesu Kristo kubahitsya omu magara agatahwaho.

22Kandi mwikirizise abarikubangaanisa:

23abamwe mubajune nimubashahura omu muriro; n'abandi mubagirire esaasi nimubatiinirira, nangwa mwangye n'ekijwaro ekisiisirwe emicwe y'obushambani.

24Mbwenu Ogwo orikubaasa kubarinda mutagwe, akabamurika omu maisho g'ekitiinwa kye, mutaine kamogo kandi mushemereirwe,

25Ruhanga ogwo wenka otujuna naaraba omuri Yesu Kristo Mukama waitu, aheebwe ekitiinwa n'obwanyakusinga n'obutegyeki n'obushoboorozi, nk'oku yaabaire abiine ira, na hati, n'ebiro byona! Amiina.

Jump to: