Lamentations 5

nyankole

← Chapter 4 Jump to:

1Ai Nyakubaho, ijuka akagwe kaatugweraire; oreebe kandi oyetegyereze oku tuhemukire!

2Obutaka bwaitu buhungwirwe abu tutarikumanyana nabo; amaka gaitu gaatwarwa abanyamahanga.

3Tubaire efuuzi ezitaine baishezo; baamaaweitwe baaba abafaakazi.

4Nitwihurira amaizi gu turikunywa, tutaho n'okugura enku zi turikutunga.

5Nibatufunya batuheekyeise emigamba, batukoresa obutaitsya, batarikutuha kahuumuro.

6Nitutega Abanyamisiri n'Abasiriya engaro, ngu takaabona ebyokurya by'okututunga.

7Baatatenkuriitwe bakacumura, kwonka tibaakiriho. Mbwenu ebibi byabo niitwe bihingamiire.

8Abahuuku nibo barikututegyeka, kandi titwine w'okubatujuna.

9Ebyokurya byaitu nitubitunga twogire amagara, ahabw'abatugwereire na rurara omu ihamba.

10Emibiri yaitu ehembire omuriro nk'ogw'omu iziiko, ahabw'enjara mpango etuteire.

11Abakazi nibahambirwa omuri Siyooni, n'abaishiki baitu batandirwa omu ndembo za Yuda.

12Abategyeki baitu nibahanikwa emikono ekomeirwe ahaiguru; abakuru baitu omu ihanga tibarikugirirwa ibanga.

13Abatsigazi baitu nibahatwa kwekorera emengo z'okusa. Aboojo bataruza beekoreire emba z'enku.

14Abagurusi tibaakishutama mu irembo, n'abatsigazi tibaakiteera nanga.

15Titwakiine kushemererwa, n'okuzina kwaitu kuhindukire okucura.

16Ekirunga kiturugire aha mutwe kyagwa. Ai bambe, twagwerwa akagwe! Manya tukacumura.

17Nikyo emitima yaitu egwereire enshazi, amaisho gaitu gakagiibwaho oruho.

18Ahabw'okuba Orushozi Siyooni ku rubaire omushaka, zaamuha zaaruhindura eikobezo ryazo.

19Kwonka, ai Mukama, niiwe otegyeka ebiro byona. Ekitebe kyawe ky'obugabe kigumaho obusingye bwona.

20Ahabw'enki ogumire otwebirwe? Ahabw'enki omazire omwanya muraingwa gutyo otutsigireho?

21Ai Nyakubaho, otwegarurire, tubone kugarukaho. Garura busya ebiro byaitu, bibe nka kare.

22Mbwenu shi otunagiire kimwe? Nainga shi otwiniire ekiniga kitaine bugarukiro?

← Chapter 4 Jump to: