Luke 24

nyankole

← Chapter 23 Jump to:

1Aha kiro ky'okubanza omu wiiki, kare munonga omu kasheeshe, abakazi bakaza aha kituuro baine eby'emigaju ebi baabaire batebeekaniise.

2Baashanga eibaare rikumbagaziibwe, riihirwe aha kituuro.

3Ku baataahiremu, tibaashangamu mutumbi gwa Mukama Yesu.

4Ku baabaire bakyemereire aho bashobangiriirwe, baareeba abashaija babiri abajwaire ebirikwengyengyeta babeemereire aha rubaju.

5Abo bakazi baatiina munonga, baaguma bainikire emitwe ahansi. Kwonka abo bashaija babiri baabagira bati: Ahabw'enki nimusherurira ohuriire omu bafiire? Tari aha, yaazooka.

6Mwijukye eki yaabagambiire akiri Galilaaya

7naagira ati: Omwana w'omuntu n'ow'okurekurirwa abasiisi kubambwa aha musharaba, kwonka aha kiro kya kashatu azookye.

8Nabo baijuka ebigambo bye.

9Abo bakazi ku baarugire aha kituuro, ebyo byona baabiteekyerereza eikumi n'omwe hamwe n'abandi boona.

10Abakazi abo bakaba bari Mariya Magadaleena, Yoana, na Mariya nyina wa Yakobo, n'abandi bakazi abu baabaire baine, nabo baabigambira batyo entumwa.

11Ebi baabagambiire byabasusira ebitaine buryo, tibaabiikiriza. [

12Kwonka Petero yaimuka, yairuka yaaza aha kituuro. Yainama, tiyaareeba kindi kureka emyenda ya kitaani. Atyo yaagaruka omu ka naatangaarira ekyabaho.]

13Eryo izooba babiri omuribo bakaba nibaza omu kyaro ekirikwetwa Emausi, nka kilomita ikumi n'emwe okuruga Yerusalemu;

14baagyenda nibagaaniira byona ebibaireho.

15Ku baabaire nibakibigambaho, Yesu nyakabara yaija, yaabahika, yaagyenda nabo;

16kwonka amaisho gaabo gaakingwaho, tibaamumanya.

17Yaabagira ati: Beitu ni bigambo ki ebi murikugyenda nimugaaniira? Batyo baayemerera bacuramiriirwe.

18Bwanyima omwe aharibo orikwetwa Keleopasi, amugarukamu ati: Ka n'eihano okureeba ngu omu baizire Yerusalemu, niiwe wenka otarikumanya bibaireho ebiro ebi?

19Nawe ababuuza ati: Ni biiha? Banu bati: Ebya Yesu owa Nazareeti, owaayeyorekire ari omurangi omukuru, ahabw'ebi yaagambire n'ebi yaakozire omu maisho ga Ruhanga n'ag'abantu boona.

20Mbwenu abahongyerezi baitu abakuru n'abategyeki bamuhaireyo kucwerwa orubanja rw'okwitwa, baamubamba aha musharaba.

21Manya itwe tukaba twine amatsiko, ngu niwe aricungura Isiraeli. Ebyo tibigarukiire aho, hati eri n'eizooba rya kashatu okwiha ebyo bibaireho.

22Abakazi bamwe ab'omuriitwe baatuhuruutura omutima nibagira ngu, ku baaza aha kituuro nibutaagurikana,

23tibaashangamu mutumbi; baagaruka nibagira ngu nangwa na bamaraika baagira ngu ahuriire.

24Kandi nu, bagyenzi baitu abamwe baaza aha kituuro, baashanga byona biri nk'oku abo bakazi baagamba. Kwonka we tibaamureeba.

25Nawe nikwo kubagira ati: Imwe bashema 'mwe, abatarahukirwa kwikiriza byona ebi abarangi baagambire!

26Kristo akaba atari w'okubonabonesibwa atyo, ngu abone kutaaha omu kitiinwa kye?

27Mpaho atandikira ahari Musa, ahika n'aha barangi boona, naabashoboororera ebicweka ebiri omu Byahandiikirwe ebikwatiraine nawe.

28Ku baahikire haihi n'ekyaro eki baabaire nibazamu, yaashusha nk'orikwenda kugumizamu;

29kwonka bo baamugyemesereza bati: Guma naitwe ahabw'okuba bwaza kwira, n'eizooba riri haihi kurenga. Nawe nikwo kutaahamu nabo.

30Ku yaabaire ari hamwe nabo aha meeza, yaakwata omugaati, yaagusiimira; bwanyima yaagucwamu, yaagubaha!

31Amaisho gaabo gaahumuuka, baamumanya; omuri ako kacu yaababuraho.

32Baagambirana bonka bati: Emitima yaitu tiyaatagata, obu yaaba naatugaaniirira turi omu muhanda, akatushoboororera Ebyahandiikirwe?

33Mpaho omuri ako kaanya baimutsya orugyendo baagaruka Yerusalemu; baashangayo eikumi n'omwe bateeraine hamwe na bagyenzi baabo,

34abaabagizire bati: N'eky'amazima; Mukama yaazooka, yaayeyoreka na Simooni.

35Nabo nikwo kubateekyerereza ebyabaho omu muhanda, kandi n'oku baamumanyira aha kucwamu omugaati.

36Ku baabaire nibakigaaniira ahari ebyo byona, Yesu yaabeemerera ahagati, yaabagira ati: Mugire obusingye.

37Baakangarana baitsirwe obwoba, nibateekateeka ngu baareeba omuzimu.

38Kwonka we yaabagira ati: Ahabw'enki mwemereize omutima, kandi nimubangaanisiza ki?

39Nimureebe engaro zangye n'ebigyere byangye; buzimazima niinye. Munkwateho mwereebere; omuzimu tigugira magufa na nyama nk'ebi murikureeba nyine. [

40Ku yaabaire naagamba ebyo, yaabooreka engaro ze n'ebigyere bye.]

41Ku baabaire batakaikiriize, baitsirwe okushemererwa n'okutangaara, yaabagira ati: Ebyo, aha mwineho akokurya?

42Batyo baamuha ekicweka ky'ekyenyanja kikazire;

43yaakyakiira, yaakirya nibamureeba.

44Bwanyima Yesu yaabagira ati: Ebyo nibyo naabagambiire obu naabaire nkiri hamwe naimwe, ngu ebyampadiikirweho omu iteeka rya Musa n'omu by'abarangi n'omu bihimbano, ku byona biri eby'okuhikiirizibwa.

45Atyo yaahwezesa emitima yaabo, ngu beetegyereze Ebyahandiikirwe.

46Yaabagira ati: Oku nikwo kyahandiikirwe ngu, Kristo n'ow'okubonabonesibwa n'okuzooka omu bafiire aha kiro kya kashatu;

47kandi ngu okwegarukamu n'okusaasirwa ebibi birangirirwe omu mahanga goona omu iziina rye, okutandikira Yerusalemu.

48Niimwe baakareebi baabyo.

49Mbwenu naaza kubooherereza eki Tata yaaraganiise; kwonka mugume omu rurembo okuhitsya obu muriheebwa amaani agarikuruga omu iguru.

50Mpaho Yesu yaabeebembera, baahika haihi na Beetaniya; atyo yaimutsya emikono, yaabaha omugisha.

51Ku yaabaire naakigubaha, yaabarugaho, yaatwarwa omu iguru.

52Baamuramya, bwanyima baagaruka Yerusalemu baijwire okushemererwa;

53kandi baaguma obutoosha omuri Nyaruju nibahimbisa Ruhanga.

← Chapter 23 Jump to: