Matthew 11

nyankole

← Chapter 10 Jump to: Chapter 12 →

1Bwanyima Yesu, ku yaaherize kuhabura abatendekwa be ikumi na babiri oku baraatwaze, yaarugayo, yaaza kwegyesa n'okurangirira omu ndembo zaabo.

2Mbwenu Yohaana, ku yaabaire ari omu kihome, yaahurira ebi Kristo arikukora, yaamutumaho abatendekwa be,

3naamugira ati: Niiwe ogwo otuura ori ow'okwija, nari tutegyereze ondiijo?

4Yesu yaabagarukamu ati: Nimwirooko mugambire Yohaana ebi mwahurira n'ebi mwareeba, muti:

5Empumi nizihumuuka, ebirema nibigyenda, ababembe nibashemezibwa, ebifamatu nibihurira, abafiire nibazoorwa, n'abooro nibarangirirwa Amakuru Marungi.

6Otarikumbangaanisaho n'omuhiirwa.

7Ezo ntumwa ku zaabaire zaarugaho, Yesu yaatandika kugambira ebimbuuro by'abantu ahari Yohaana, ati: Mukaza omu ihamba kureebayo ki? Orubingo orurikutengyetsibwa omuyaga?

8Mbwenu shi, mukaza kureebayo ki? Omuntu ojwaire ebirikunekaneka? Manya abajwara ebirikunekaneka bashangwa omu bikaari by'abagabe.

9Mbwenu shi mukagiirayo ki? Kureeba omurangi? Eego, nimbagambira nti: Nangwa naakira omurangi.

10Niwe ogwo ou kyahandiikirweho kiti: Reeba, nintuma entumwa yangye kukubandizayo, ekutebeekanisize omuhanda.

11Buzimazima nimbagambira nti: Omu barazairwe abakazi, tihariho orikukira Yohaana Omubatizi; kwonka orikuhereerukayo omu bukama bw'Ow'omu iguru naamukira.

12Okwiha omu biro bya Yohaana Omubatizi okuhitsya aga magingo, obukama obwo bwitanirwa, kandi ababwitanira nibo babunyaga.

13Manya abarangi boona n'eiteeka bikaranga okuhitsya ahari Yohaana;

14kandi ku muraabe nimwenda kukiikiriza, Yohaana ogwo niwe Eliya owaabaire ari ow'okwija.

15Oine amatu agarikuhurira, ahurire.

16Mbwenu abantu b'obusingye obu nkaabashushanisa na ki? Bari nk'abaana abashutami omu katare, abarikweta bagyenzi baabo bati:

17Tubateereire esheegu, timwazina; twabateerera emiruura, timwayemaamaata.

18Manya Yohaana ku yaizire atarikurya kandi atarikunywa, baagira bati: Aine ekyago.

19Omwana w'omuntu we ku yaizire naarya, naanywa, baagira bati: N'omunyamururu, n'omusinzi kandi munywani w'abashorooza b'omushoro n'abasiisi. Manya obwengye bwa Ruhanga ebi bukora nibyo bihamya ku buhikire.

20Mpaho yaatandika kuhana endembo ezi yaakizire kukoreramu eby'amaani, ahabw'okuba tizireegarukiremu, ati:

21Iwe Koraziini 'we, oryakareeba! Naiwe Beetisaida, oryakareeba! Manya eby'amaani ebyakoreirwe omuriimwe, kuri byakoreirwe omuri Tuuro na Sidoni, abaamwo bakaabaire baayegarukiremu kare, bajwaire ebiguniya, beesiigire eiju.

22Kandi nimbagambira nti: Aha kiro ky'okucweraho orubanja, ebifubiro bya Tuuro na Sidoni biryayemerwa okukira ebyanyu.

23Naiwe Kafarinaumu, mbwenu noogira ngu oryatunguurwa ohikye ahaiguru? Ngaaha, oryabandikwa, ohikye okuzimu owa Nyamuteza! Manya eby'amaani ebyakoreirwe omuriiwe, kuri byakoreirwe omuri Sodoma, ekaagumireho okuhitsya n'eri izooba.

24Kandi hoona ninkugambira nti: Aha kiro ky'okucweraho orubanja, ekifubiro ky'ensi ya Sodoma kiryayemerwa okukira ekyawe.

25Omu bunaku obwo Yesu akagira ati: Taata, Mukama w'eiguru n'ensi, ninkusiima ahabw'okuba ebintu ebyo okabishereka abanyabwengye n'abarikwetegyereza, waabishuuruurira abaana bato.

26Eego, Taata, ekyo nikyo waasiimire.

27Byona nkabikwatsibwa Taata, kandi tihariho omanya Mwana kureka Taata, nobu yaakuba omanya Taata kureka Mwana, n'ou Mwana asiima kumumushuuruurira.

28Yaimwe abaruhire n'abaremereirwe, nimwije ahariinye, mbaruhuure.

29Mwekorere omugamba gwangye, muunyegyereho; ahabw'okuba nintwaza gye, haza ndi omucureezi omu mutima; nibwo muraatungire amagara gaanyu ekihuumuro.

30Ahabw'okuba omugamba gwangye gwanguhi, n'omutwaro gwangye tigurikuremeera.

← Chapter 10 Jump to: Chapter 12 →