Obadiah 1

nyankole

Jump to:

1Oku nikwo Obadiya yaayorekirwe Mukama Ruhanga, naagamba ahari Edomu ati: Tuhuriire enkuru erikuruga ahari Nyakubaho, ku entumwa eyohereziibwe omu mahanga goona, neegira eti: Nimwimukye, tuhurure, tuteere Edomu!

2Nyakubaho naagigira ati: Reeba, niinyija kukuhindura mukye omu mahanga, ogayirwe kimwe.

3Amaryo g'omu mutima gwawe gakubeihabeihire, iwe otuura omu bicokoromi by'enkiri, okaraara omu myanya y'ahaiguru; okagira omu mutima gwawe oti: N'oha owaakumpanurayo, akanta ahansi?

4Nobu oraatumbikye eiguru nk'eishamba, okata ekyashuri kyawe ahagati y'enyonyoozi, nayo ndyakuhanurayo. Nyakubaho nikwo arikugamba.

5Abashuma nari abanyagi ku baakukutaahirira nyekiro, nobu waakufeerwa ebintu bingi munonga, kwonka tibakaiba ebi barikwenda byonka? Abashoromi b'emizaabibu ku baakwija ahu ori, tibakaakutsigira eby'okuhumba?

6Ebishi Esau anyagirwe! Ebi atungire bishahwirwe!

7Boona abakwatanisa naiwe omu rugamba, bakubeihabeihire, baakubinga, baakuhitsya aha mwatano. Abu ogira nabo obusingye, bakuhabiise, baakusingura. Banywani baawe abu oyesiga bakutegire omutego, kwonka tiwaakimanya.

8Nyakubaho naagira ati: Eryo izooba tindicwekyereza abanyabwengye nkabamara omuri Edomu? N'abarikwetegyereza nkabamara aha Rushozi Esau?

9Naiwe Temani, amamanzi gaawe garyaitwa obwoba, buri muntu ow'aha Rushozi Esau aitwe.

10Obubisha bu waagiriire murumuna waawe Yakobo buryakureetera kwitwa enshoni, omarirweho kimwe ebiro byona.

11Aha izooba ri waayemerereireho hangahari, obu abu atarikumanyana nabo baanyaga ebi atungire, abanyamahanga bakaraba omu marembo ge, bakateerera Yerusalemu enteenyu obwo ori nkabo.

12Kwonka okaba otari w'okweraata aha izooba eri murumuna waawe yaahikiirweho ekihikiirizi. Okaba otari w'okwesiimirana Abaayuda aha izooba ri baacwekyerereziibweho. Okaba otari w'okwekiita aha izooba ri baareebeireho enaku.

13Okaba otari w'okutaaha omu irembo ry'abantu bangye aha izooba ri baagwereirweho akagwe, okaba otahikire kubateerera omu kwahwa, okaaya n'ebintu byabo, obu baagwerwa akagwe.

14Tokwemereire mu nteeraniro z'emihanda kumaraho abantu be abarikuhunga, kandi tokuhaireyo bantu be abahonokireho, aha izooba ri baareebeireho enaku.

15Manya eizooba rya Nyakubaho ery'okufubira amahanga goona riri haihi kuhika. Nk'oku waagizire abandi, naiwe nikwo origirwa. Ebi waakozire biryakuhindukana.

16Nk'oku mwanywereire aha rushozi rwangye orurikwera, n'amahanga goona agabeehinguririize nikwo garinywa. Buzimazima garyanywa, gataruze, haza gabe nk'agatakabahoga.

17Kwonka aha Rushozi Siyooni haryabaho abarihonokaho, rube orurikwera; n'ab'omuryango gwa Yakobo bagarukane ebi baabaire banyagirwe.

18Ab'omuryango gwa Yakobo baryaba omuriro, ab'ogwa Yosefu babe endimi zaagwo; reero ab'omuryango gwa Esau babe embuba. Haza babootsye, babamareho; habure owaahonokaho omu b'omuryango gwa Esau.

19Abaanegebu baryakubuura Orushozi Esau, ab'omu ruhita rwa Shefeela bakubuure ensi y'Abafilisiti, bakubuure ensi ya Efuraimu n'eya Samariya, n'Abaabenyamiini bakubuure Gileadi.

20Ab'omu ihe ry'Abaisiraeli, abaazaahiire Haala, baryakubuura Foinikiya, bahikye Zarefaati. N'aba Yerusalemu abaazaahiibwe abari omuri Sefaaradi, bakubuure endembo za Negebu.

21Abajuni baryatemba Orushozi Siyooni kutegyeka Orushozi Esau, obugabe bube obwa Nyakubaho.

Jump to:

Recommended Reading

Commentary Obadiah Commentaries → Devotional Obadiah Devotional Guide → Get This Bible nyankole Study Bible →