Philemon 1

nyankole

Jump to:

1Nyowe Paulo, embohe ahabwa Kristo Yesu, na Timoteeho mwene waitu, twakuramutsya iwe Filemooni omukozi mugyenzi waitu omukundwa,

2na Apofiya munyanyaitwe, na Arikipo omuserukare mugyenzi waitu, n'ekigombe ky'abaikiriza eky'omwawe.

3Nitubendeza emigisha n'obusingye ebikomooka ahari Ruhanga Tataitwe, na Mukama Yesu Kristo.

4Obutoosha ku nkwijuka omu kushaba kwangye, nsiima Ruhanga wangye.

5Manya mpurira okukunda n'okwesiga ebi oiniire Mukama Yesu n'abarikwera boona.

6Kandi nshaba, ngu okukwatanisa n'abandi omu kwikiriza kwawe kurugwemu okwongyera kushoboorokyerwa ebirungi byona ebi tutungira omuri Kristo.

7Mwene Taata, rukundo yaawe endeeteire okushemererwa kwingi, yangarura omutima omunda, ahabw'okuba oruhwire emitima y'abarikwera.

8N'ahabw'ekyo, nobu ndaabe ndi mugyenzi waawe omuri Kristo, ntarikutiina kukuragiira kukora ekirikwetengwa,

9kwonka ahabwa rukundo, nkaasiimire kugira eki naakushaba. Eki nkaayenzire kukikushaba, nobu ndaabe nyowe Paulo, omujwekyerwa wa Kristo Yesu, hati ndi omu kihome ahabwe.

10Ninkweshengyereza ahabw'omwana wangye Onesimo, ou mbaire ishe ndi omu kihome.

11Ira akaba atakwiniire mugasho, kwonka hati buzimazima naakugasira, kandi naanye nangasira.

12Mbwenu ngugwo naamukugarurira, nk'owaakugarurira orura rwangye buzima.

13Nkaashemereirwe kuguma mmwine, ngu ampeereze omu mwanya gwawe ndi omu kihome, ninturwa Amakuru Marungi.

14Kwonka nsiimire kutakora kintu kyona otaikiriize, ngu ekirungi kyawe kirekye kuba eky'okugyemwa, kureka eky'okweyendera.

15Shana nikyo yaakurugiireho okumara omwanya mukye, ngu obone kumugarukanira kimwe,

16kwonka atakiri muhuuku, kureka naakiraho, ari omunyaruganda omukundwa; munomuno ahariinye, kandi okukira munonga ahariirwe, okwatiraine nawe omu buntu n'omuri Mukama.

17Mbwenu ku oraabe nombara ngu nkwatwaniise naiwe omu kwikiriza, mmwakiire nk'oku waakuunyakiire.

18Ku araabe buzimazima aine eki arakushaagiize, nari akwineho eibanja ryona, obe niinye waariihuza.

19Nyowe Paulo, naahandiika eki n'omukono gwangye. Niinyija kukwihura nyowe Paulo, ntagambire ku naiwe onyineho eibanja, kandi eryo ibanja niiwe nyakabara.

20Eego, mwene taata, niinyenda ku onnanura omuri Mukama, okaruhuura omutima gwangye nk'omunyaruganda omuri Kristo.

21Naakuhandiikira nyine obwesigye aha kworoba kwawe nimmanya ku orikwija kukora ebirikweshumba aha bi naagamba.

22Kandi ekindi, onteguurire ekishengye ky'okucumbikamu, ahabw'okuba nyine amatsiko, ngu ahabw'okushaba kwanyu niinyija kurekurwa, mbagarukire.

23Epafura, embohe mugyenzi wangye ahabw'okuturwa Kristo Yesu, naakuramutsya;

24Mariko, Arisitariko, Demasi na Luka abakozi bagyenzi bangye, nabo nibakuramutsya.

25Embabazi za Mukama Yesu Kristo zigume naimwe.

Jump to:

Recommended Reading

Commentary Philemon Commentaries → Devotional Philemon Devotional Guide → Get This Bible nyankole Study Bible →