Psalms 119

nyankole

← Chapter 118 Jump to: Chapter 120 →

1Baine omugisha ab'emitwarize etaine kamogo, abakuratira eiteeka rya Nyakubaho.

2Baine omugisha abarinda ebi yaaragiire, bakamusherura n'omutima gwabo gwona;

3kandi abatakora kubi, kureka abakuratira emitwarize ye.

4Okatuha ebiragiro byawe, ngu tubyorobere omu mazima.

5Nkaabaasibwa ki, ngira emitwarize etarikuhinduka, mpikiiriza ebi waataireho!

6Ku naakuta omutima aha biragiro byawe byona, tinkaahemuka.

7Ninkusiima n'omutima gw'amazima, ahabw'okuunyegyesa ebiragiro byawe ebihikiriire.

8Niinyenda kurinda ebi waataireho; naiwe otannagiirira.

9Mbwenu omutsigazi akaashemeza ata emitwarize ye? Aryagishemeza nk'oku ekigambo kyawe kiri.

10Nkusherura n'omutima gwangye gwona; otandeka kuteishuka ebiragiro byawe.

11Ebigambo byawe bintuura aha mutima, ngu ntakaakucumuraho.

12Ai Nyakubaho, iwe ohimbisibwa, onyegyese ebi waataireho.

13Ndyaguma ndangye ebiragiro byawe ebi waaragiire.

14Nyesiimira okukuratira ebi waaragiire, okukira okugira eitungo ringi.

15Nteekateeka munonga ahaby'enyegyesa yaawe, kandi nta omutima aha mitwarize yaawe.

16Nshemerererwa ebi waataireho. Kandi tiinyebwa kigambo kyawe.

17Nyowe omuheereza waawe ongirire embabazi, mbone kugira amagara, nyorobere ekigambo kyawe.

18Humuura amaisho gangye, ndeebe eby'okutangaaza ebiri omu iteeka ryawe.

19Nobu ndaabe omu nsi ndi omuhinguzi, otanshereka ebiragiro byawe.

20Omutima gwangye gwiniire ebi waaragiire ekihika.

21Ohana abanyamaryo, n'abanga kworobera ebiragiro byawe bakyeenwa.

22Onyiheho okujumwa n'okugaywa ahabw'okuba nsiima ebi waaragiire.

23Abategyeki nobu barangiire omu naama mbi, kwonka nyowe omuheereza waawe ninteekateeka munonga ebi waataireho.

24Manya ebi waaragiire binnanura, n'ebi waataireho bimpabura.

25Nyowe ogangarami omu mucuucu, ompimbuure, nk'oku waakiraganiise.

26Ku naakugambiire emitwarize yangye, wangarukamu; mbwenu onyegyese ebi waataireho.

27Onyegyese okukuratira ebiragiro byawe, mbone kuteekateeka aha by'okutangaaza byawe.

28Ndaara nindeeba ahabw'obusaasi, ompangaane, nk'oku waakiraganiise.

29Otandeka nkatoora omuhanda gurikuhabisa, kureka ahabw'embabazi zaawe onkundise eiteeka ryawe.

30Ntooraine omuhanda ogurikwesigwa; naata omutima aha biragiro byawe.

31Mpamira aha bi waaragiire; ai Nyakubaho, otandeka.

32Njwahukira okworobera ebiragiro byawe, ahabw'okuba okabiinyetegyerezesa gye.

33Ai Nyakubaho, onshoboororere amakuru g'ebi waataireho, mbone kuguma nimbikunda.

34Ompabure oku ndaarinde eiteeka ryawe, onkwatse n'oku ndaaryorobere n'omutima gwangye gwona.

35Nyorobere ebiragiro byawe, ahabw'okuba nibyo nshemerererwamu.

36Onkundise ebi waaragiire, onyihe aha kwitanira eby'ensi.

37Onyihe aha bitaine mugasho, haza ekigambo kyawe kimpaise amagara.

38Ohamye eki wandaganiise, nyowe omuheereza waawe, eki oraganisa abakutiina.

39Onkize ebijumo ebintiinisa, ebishi ebiragiro byawe nibitangaaza!

40Nyiniire ebiragiro byawe ekihika; ahabw'okuhikiirira kwawe ompe amagara.

41Ai Nyakubaho, rukundo yaawe etahararuka n'okujuna kwawe bimpikyeho, nk'oku waaraganiise,

42mbone kutunga eky'okugarukamu abarikunjuma, ahabw'okuba nyesiga ekigambo kyawe.

43Otaiha ekigambo kyawe eky'amazima omu kanwa kangye, ahabw'okuba nyesiga ebiragiro byawe obutoosha.

44Ka ngume nyorobere eiteeka ryawe ebiro n'ebiro.

45Haza ku ndaakuratire ebi oyegyesa, ngume nyine obusingye.

46Ndyagambira abagabe ebi waaragiire, ntarikutiina kuhemuka.

47Ebiragiro byawe binnanura, kandi mbikunda munonga.

48Nsiima ebiragiro byawe ebi nkunda, kandi nteekateeka munoga aha bi waataireho.

49Ijuka eki wandaganiise, nyowe omuheereza waawe, ekyampaisize amatsiko.

50Nobu naabaire nimbonabona, kikampuumuriza, ahabw'okuba eki waaraganiise nikyo kimbaisaho.

51Ab'amaryo bakanshekyeerera obutaitsya, kwonka tinaatsigaho iteeka ryawe.

52Ku nyijuka amateeka gaawe aga ira, ai Nyakubaho, gangarura omutima omunda.

53Kwonka ku ndeeba ababi nibahenda eiteeka ryawe, ekiniga kincwa amaraka.

54Ei mba ncumbikire niyo nyeshongorera ebi waataireho.

55Ai Nyakubaho, ndaara ninkwijuka, kandi nyorobera eiteeka ryawe.

56Okurinda ebiragiro byawe, buzimazima, kuryampaisa okushemererwa.

57Ai Nyakubaho, tindagizire ngu ekyangye n'okuhitsya ebiragiro byawe?

58Hati ninkweshengyereza n'omutima gwangye gwona; ongirire embabazi, nk'oku waaraganiise.

59Ku ngarura amaisho enyima, naareeba emitwarize yangye, nkuratira ebi waaragiire;

60ndahuka kworobera ebiragiro byawe, ntarikweziringa.

61Nobu ababi bantega emigoye kunkwata, kwonka tinkeebwaga iteeka ryawe.

62Nyimuka omu itumbi kukusiima, ahabw'okuba amateeka gaawe gahikire.

63Ndi mugyenzi wa boona abakutiina, bakoorobera enyegyesa yaawe.

64Ai Nyakubaho, rukundo yaawe etahararuka eijwire ensi; onyegyese ebi waataireho.

65Ai Nyakubaho, nk'oku waakigambire, nyowe omuheereza waawe ongiriire embabazi.

66Onyegyese obwengye n'okumanya, ahabw'okuba niinyesiga ebiragiro byawe.

67Obu naabaire ntakabonaboine, nkahaba naarara, kwonka hati niinyijuka eki waaraganiise.

68Iwe omurungi kandi ow'embabazi, onyegyese ebi waataireho.

69Ab'amaryo nobu barambeiherere bakanshiisha, nimpamira aha nyegyesa yaawe.

70Emitima yaabo n'ebitsire, kwonka nyowe nnanurwa ebiragiro byawe.

71Kikangasira okubonabonesibwa, ngu mbone kwetegyereza gye ebi waataireho.

72Ebiragiro byawe nibinkirira ezaabu n'efeeza zoona ez'omu nsi.

73Engaro zaawe nizo zankozire, kandi nizo zambumbire; ompe okwetegyereza, mbone kwega eiteeka ryawe.

74Haza abakutiina ku barandeebe, bashemererwe, ahabw'okuba niinyesiga ekigambo kyawe.

75Ai Nyakubaho, nimmanya emicwere yaawe ku ehikire, kandi nombonabonesa ahabw'okuba ori omwesigwa.

76Mbwenu naakweshengyereza, rukundo yaawe etahararuka empuumurize nk'oku wandaganiise, nyowe omuheereza waawe.

77Ontwaze gye, mbone kugira amagara, ahabw'okuba nshemerererwa eiteeka ryawe.

78Ab'amaryo abangambuura ka bahemukye, kwonka nyowe ninguma ninteekateeka aha bi oyegyesa.

79Abakutiina ka baanyijeho, babone kumanya ebi waaragiire.

80Omutima gwangye gube mwere aha bi waataireho, ndekye kuhemuka ntyo.

81Okukutegyereza ngu onjune, ai Nyakubaho, nobu kummaziremu amaani, kwonka ninkyesiga ekigambo kyawe.

82Amaisho gangwire omu nkiro ntegyereize eki waaraganiise, niinyebuuza nti: Beitu oryanduhuura ryari?

83Nobu naakukarangatana nk'omusinga gwokize, tinkaayebwa bi waataireho.

84Mbwenu nyowe omuheereza waawe, mpitsye hi? Abarikumpiiganisa oryabafubira ryari?

85Ab'amaryo abatarikweta ha biragiro byawe, bantimbiire obusya ngu mbugwemu.

86Nk'oku ebiragiro byawe byona biba eby'amazima, abanyabishuba ku barampiigye, onjune.

87Nobu abo babi barangariire kummaraho, kwonka nyowe tinkatsigahoga bi oyegyesa.

88Ahabwa rukundo yaawe etahararuka onjune mbone kworobera ebi waaragiire.

89Ai Nyakubaho, ekigambo kyawe kigumaho ebiro byona, kandi n'omu iguru kituura kihamire.

90Obwesigwa bwawe buba obw'obusingye n'obusingye; okahanga ensi yaagumaho.

91Ebintu byona bigumaho nk'oku waaragiire, ahabw'okuba bikuheereza.

92Kuri ntarashemerereirwe iteeka ryawe, nkaafiire nimbonabona.

93Tindyebwa bi oyegyesa, ahabw'okuba nibyo ompeeramu amagara.

94Ndi owaawe, onjune; ahabw'okuba nta omutima aha bi oyegyesa.

95Nobu ababi baraabe nibenda kuncwekyereza, kwonka nyowe ndyaguma ntaire omutima aha bi waaragiire.

96Ndeebire ngu ebihikire byona bigira obugarukiro, kwonka ebiragiro byawe byo tibigira hi bigarukira.

97Ebishi nkunda eiteeka ryawe! Nikyo nsiibira ninditeekateekaho.

98Ebiragiro byawe bimpika aha njoka, bimpaisa obwengye, mbukiza abazigu bangye.

99Nyetegyereza okukira abeegyesa bangye, ahabw'okuba nteekateeka aha bi waaragiire.

100Nshoboorokyerwa okukira abakuzire, ahabw'okuba nkunda ebi oyegyesa.

101Nyetantara emicwe yoona emibi, ngu mbone kukuratira ekigambo kyawe.

102Tiinyenda kuteishuka iteeka ryawe, ahabw'okuba niiwe oriinyegyesa.

103Ebigambo byawe binnurira okukira obwoki.

104Ebi oyegyesa bindeetera kwetegyereza, haza nyanga emitwarize yoona erikuhabisa.

105Ekigambo kyawe kiba orumuri oruumurikira omuhanda.

106Ndahiire ntarikwegiza, kuguma niinyorobera ebiragiro byawe ebihikiriire.

107Ai Nyakubaho, obusaasi nobu buraabe buunyogiremu. Ompimbuure, nk'oku waaraganiise.

108Ai Nyakubaho, ikiriza emitoijo ei naakutoijera kukusiima, haza onyegyese ebiragiro byawe.

109Buri kaanya nyeteekateekire kwoga amagara, kwonka nteebirwe iteeka ryawe.

110Nobu ababi baraabe bantegire omutego, kwonka tinkarekaga bi onyegyesa.

111Ebi waaragiire n'ebyangye by'entuura, kandi nibyo omutima gwangye gushemerererwa.

112Naayehayo kukora ebi waataireho, ekyo nikyo kihembo ekirammare okuhitsya obu ndifa.

113Nyanga ab'emitima erikubushukana, kwonka nkunda eiteeka ryawe.

114Niiwe buhungiro bwangye kandi omurinzi wangye, ekigambo kyawe nikyo ngiramu amatsiko.

115Imwe nkozi z'ebibi 'mwe, nimundugyeho, Mbone kukuratira ebiragiro bya Ruhanga wangye.

116Ai Mukama, mbangira, nk'oku waaraganiise, mbone kugira amagara; otandeebya, naakwesigire.

117Ompigikye, mbe gye, haza ebi waataireho birekye kunduga aha mutima.

118Ogaya boona abareka ebi waataireho, buzima ebiteekateeko byabo by'obugobya biba ebya busha.

119Otsinga ababi nk'omukyereenyo, kubaiha omu nsi; nikyo nkundira ebi waaragiire.

120Nintetema, ahabw'okutiina eiteeka ryawe.

121Nkozire ebihikire kandi eby'oburyo; mbwenu otandekurira ababisha.

122Hamiza omuheereza waawe ku orikwija kumuhwera, ab'amaryo barekye kuunyita kubi.

123Amaisho gaagwa omu nkiro nkutegyereize ku onjuna, n'okuhikiiriza ebi waaraganiise.

124Twaza gye omuheereza waawe omwiniire rukundo etahararuka, onyegyese ebi waataireho.

125Ndi omuheereza waawe, onshoboororere, mbone kwetegyereza ebi waaragiire.

126Ai Nyakubaho, obunaku bwawe bw'okugira eki waakora bwahika, ahabw'okuba abantu bagomeire eiteeka ryawe.

127Buzimazima, ninkunda ebiragiro byawe okukira ezaabu; nobu ekuba ezaabu enungi munonga.

128Eego, nkuratira ebi oyegyesa byona, kandi nyanga emitwarize yoona erikuhabisa.

129Ebi waaragiire nibitangaaza, nikyo mbyoroberera.

130Ekigambo kyawe ku kishoboororwa kihwezesa, kandi kireetera aboorobi okwetegyereza.

131Niinyashama nyine ekyaka, ahabw'okugirira eiteeka ryawe ekihika.

132Naakweshengyereza, hinduka ongirire embabazi, nk'oku ozigirira abakukunda.

133Ondinde nk'oku waaraganiise, ndekye kugwa, otaikiriza ekibi kyona kuntegyeka.

134Onkize abarikuunyita kubi, mbone kworobera eiteeka ryawe.

135Ngirira embabazi, nyowe omuheereza waawe onyegyese ebi waataireho.

136Amaisho gangye nigahimintika amarira, ahabw'okuba abandi nibagaya eiteeka ryawe.

137Ai Nyakubaho, buzimazima ori ohikiriire, n'emicwere yaawe yoona ehikire!

138Ebiragiro ebi otaho bihikire, kandi biijwire amazima.

139Eihato rimmazireho, ahabw'okuba ababisha bangye beebirwe ekigambo kyawe.

140Eki waaraganiise kigyeziibwe, kyashangwa kihamire, kandi nyowe omuheereza waawe, ninkikunda.

141Nobu ndaabe ndi ejuuma kandi ningaywa, kwonka tiinyebwa bi oyegyesa.

142Okuhikiirira kwawe n'okw'obutwire bwona, eiteeka ryawe n'ery'amazima ebiro byona.

143Enaku n'obusaasi nobu biraanyite, kwonka ebiragiro byawe bindeetera okushemererwa.

144Ebi waaragiire biba ebihikiriire obutwire bwona; obinshoboororere, ngire amagara.

145Ai Nyakubaho, ninkutakira n'omutima gwangye gwona, ongarukyemu; haza ndyaguma ndinde ebi waataireho.

146Ninkutakira, onjune, mbone kworobera ebi waaragiire.

147Nyimuka kare kukutakira, omushekye gutakajugutsire; niinyesiga ku eki waagambire kirihikiirira.

148Ndaara mpuriire, ninteekateeka aha bi waaraganiise.

149Ahabwa rukundo yaawe etahararuka, ai Nyakubaho, ontegye okutu; ongirire embabazi, ondinde.

150Abataine saasi abarikumpiiga banfundiriize, nibo bantu abatakuratira iteeka ryawe.

151Kwonka, iwe Nyakubaho, ondi haihi, n'eiteeka ryawe ryona riba ery'amazima.

152Mmazire omwanya muraingwa nimmanya ebi waaragiire, ku byatairweho kugumaho ebiro byona.

153Ai Nyakubaho, reeba obusaasi bwangye kandi onjune, ahabw'okuba tiinyebwa iteeka ryawe.

154Ontonganire, ondwaneho, ompe amagara, nk'oku waaraganiise.

155Ababi torigira bu obajunire, ahabw'okuba tibata mutima ha bi waataireho.

156Ai Nyakubaho, ogira embabazi nyingi, ompe amagara nk'ekiragiro kyawe oku kiri.

157Nobu ndaabe nyine abazigu bangye n'abarikumpiiga, kwonka nyowe tindeka ebi waaragiire.

158Nyowe okureeba ezo ndeebya kuntama, ahabw'okuba tizita mutima ha bi waaraganiise.

159Nyakubaho, reeba oku nkunda ebi oyegyesa; ongaruremu amagara, ahabw'okuba rukundo yaawe tehararuka.

160Entima y'eiteeka ryawe eba amazima; kandi ebi waaragiire bihikiriire, bigumaho ebiro byona.

161Abategyeki bampiigira busha, kwonka nyowe ntiina ekigambo kyawe.

162Nyesiimira eki waaraganiise, nk'owaagwa aha itungo rihango.

163Nyanga ekyeetwa ekishuba, kandi kintama, kwonka eiteeka ryawe niryo nkunda.

164Buri izooba nkusingiza emirundi mushanju ahabw'emicwere ehikiriire.

165Abakunda eiteeka ryawe nibakagire obusingye, hataine kirikubateeza ntsibo!

166Ai Nyakubaho, nkutegyereize ku onjuna, kandi nimpikiiriza ebiragiro byawe.

167Nyorobera ebi waaragiire; kandi mbikundira kimwe.

168Ntuura ninkwata ebi oyegyesa n'ebi waaragiire, kandi emitwarize yangye yoona noogimanya.

169Ai Nyakubaho, okutaka kwangye kukuhikyeho; haza ekigambo kyawe kimpaise okwetegyereza.

170Okweshegyereza kwangye kukuhikyeho; onkize nk'oku waaraganiise.

171Ndangaane eby'okukusingiza, ahabw'okuba niiwe oyegyesa ebi waataireho.

172Ndyayeshongora ebi waaraganiise, ahabw'okuba niiwe oyegyesa ebi waataireho.

173Ogume oyeteekateekire kumpwera, ahabw'okuba ntooraine ebi oyegyesa.

174Ai Nyakubaho, omujuni wangye, nkwiniire orushusho; kandi eiteeka ryawe niryo rindeetera okushemererwa.

175Ninkaramaare, haza nkaguma ninkusingiza, ebi waaragiire bikaguma nibimpwera!

176Ninkora oku n'oku nk'entaama ebuzire; ija onsherure, nyowe omuheereza waawe. Manya tinkeebwaga biragiro byawe.

← Chapter 118 Jump to: Chapter 120 →

Recommended Reading

Commentary Psalms Commentaries → Devotional Psalms Devotional Guide → Get This Bible nyankole Study Bible →