Titus 3

nyankole

← Chapter 2 Jump to:

1Guma oijutsye abantu baawe kworobera abategyeki n'abaine obushoboorozi, n'okubahurira beeteekateekire kukora omurimo gwona omurungi.

2Batagirira omuntu weena ou baagambaho kubi. Bagume beetantare entongane, babe abacureezi, kandi boorekye abantu boona obufura.

3Manya naitwe ira tukaba turi abashema, entahurira, abahabire, abarikutegyekwa okwetenga okubi n'amashemererwa ebitari bimwe, obwo nitumarira ebiro by'amagara gaitu omu itima n'omu ihari, nitwangwa abantu kandi nitwangana.

4Kwonka embabazi za Ruhanga Omujuni waitu, na rukundo ye aha bantu, ku byareebekire,

5yaatujuna. Taratujunire habw'okuhikiirira kw'ebi twakozire, kureka ahabw'esaasi ye, naakoresa okwogibwa oku Mutima Orikwera atuheeramu okuzaarwa busya, tukatunga amagara masya.

6Mutima ogwo Ruhanga akamutushukaho omu bushaagaine, naamurabya omuri Yesu Kristo Omujuni waitu,

7ngu tubone kuhikiirizibwa ahabw'embabazi ze, n'okugira amatsiko g'okutunga amagara agatahwaho.

8Ekigambo ekyo n'eky'okwesigwa. Mbwenu niinyenda ebyo ku obihamisiriza, reero abaikiriize Ruhanga babone kuta omutima aha kwehenengyera okukora ebirungi. Ebyo ni birungi kandi nibigasira abantu.

9Kwonka oyetantare empaka z'obufamutima, n'eby'okurondooza obuzaare, n'okuhakanira eryo, n'entongane ezikwatiraine n'eiteeka; ahabw'okuba ebyo tibiine mugasho kandi n'ebya busha.

10Orikureetera abandi kwecwaho, ku oraaheze kumuhana rimwe nari kabiri, omurekye.

11Noomanya omuntu nk'ogwo ku ahabire, kandi ku ari enyabibi, orikwemanya ku asingirwe orubanja.

12Ku ndaakutumeho Aritema nari Tukiko, teeraho kwija onshangye Nikopoli, ahabw'okuba niyo mpamize kumarira ebiro by'embeho.

13Teeraho nk'oku orikubaasa kutungira Zeena omunyamateeka na Apolo eby'okubarahukiza orugyendo rwabo; oreebe ngu tibaine ki babuzirwe.

14Kandi abantu baitu ka beegye kwehenengyera kukora ebirungi, babone kutungira abakyenire eby'okubakwatsa, n'okutaba abataine mugasho.

15Boona abu nyine nibakuramutsya. Naiwe oturamukize abarikutukunda abu tukwatiraine nabo omu kwikiriza. Embabazi za Ruhanga zigume naimwe mwena.

← Chapter 2 Jump to: