Zephaniah 3

nyankole

← Chapter 2 Jump to:

1Oru rurembo orurikuhata abantu, orugomi, kandi orusiisikaire, ruryakareeba.

2Tirugira ou rihurira, tirwenda kuhanwa. Tirwesiga Nyakubaho, tirwehitsya Ruhanga.

3Abakungu baarwo abarurimu n'entare ezitsinda; abaramuzi baarwo n'emishega y'omu mwabazyo, etatsigaho kantu okuhitsya obu busheesha.

4Abarangi baarwo n'abantu batyo abatarikwesigwa, abahongyerezi baamwo nibahagaza ebirikwera, baashisha nkana eby'omu iteeka.

5Nyakubaho orurimu n'ohikiriire, takora kubi. Buri kasheeshe ayoreka eby'oburyo ebi akora. Kwonka abatahikiriire tibagira kashoni.

6Ncwekyereize amahanga, eminaara yaago y'okwerindiramu yaaba ebisheenyuka. Nyitiire kimwe emihanda yaago, ngu hatagira owaagirabamu. Endembo zaago zicwekire amatongo, zaabura ab'okuzituuramu.

7Naagira nti: Buzimazima ruryantiina, rwikirize kuhanwa, rurekye kwehuzya ebi naaruhabwire. Kwonka abaamwo boona baayeyongyera kwezirika kukora ebibi.

8Nyakubaho naagira ati: N'ahabw'ekyo nimutegyereze, okuhitsya aha izooba eri ndiimukiraho ndi mushinja. Ahabw'okuba mmaririire kuteeranira hamwe amahanga n'ensi z'obugabe, mbone kumariraho abo bantu ekiniga kyangye.

9Eego, omuri obwo bunaku ndyahindura emigambire y'ab'omu mahanga, ebe mirungi; boona babone kuntakira, nyowe Nyakubaho, n'okundamya n'omutima gumwe.

10Abariinyeshengyereza, abaana b'abantu bangye abaataataine, baryaruga seeri y'emigyera ya Etiopiya, bantoijere emitoijo.

11Ahari eryo izooba toriitwa nshoni ahabw'ebi waakozire ongomeire; ahabw'okuba obwo ndyakwihamu abanyamaryo abarikwehimbisa, orekye kugaruka kwekunikira aha rushozi rwangye orurikwera.

12Manya ndyakutsigamu abantu abacureezi kandi abatarikwetunguura; abarimpungiraho, Nyowe Nyakubaho.

13Abaritsigara omuri Isiraeli tibarikora bitahikire, kandi tibarigamba bishuba; nobu kwakuba okugobya.

14Iwe Siyooni, yeshongore munonga. Iwe Isiraeli, teera akaari! Naiwe Yerusalemu, shemererwa, kandi oyesiime n'omutima gwawe gwona!

15Nyakubaho akwihireho ekifubiro, yaabinga abazigu baawe. Iwe mugabe wa Isiraeli 'we, Nyakubaho akwine; toritiina kabi bundi.

16Ahari eryo izooba baryagira Yerusalemu bati: Iwe Siyooni, otatiina; kandi otatentebuka emikono.

17Mukama Ruhanga waawe emanzi ekusinguza ari ahagati yaawe. Aryakushemerererwa aine obunanukye; aryakugarura aha buteeka akwiniire rukundo; kandi aryayesiima ahabwawe naayeshongora munonga, nk'aha kiro ky'obugyenyi.

18Nyakubaho naagira ati: Ndyakwihaho akabi, karekye kukureetera ekihemu.

19Reeba, omuri obwo bunaku, ndyaitana n'abarikukuhata boona; nkize abarema, ntaaruure encuubwa; abaabaire bahemukire mbahe okugambwa gye n'okugira eiziina rirungi omu nsi yoona.

20Omuri ebyo biro ndyabagarura owaanyu, omu bunaku bu ndibataaruuriramu. Manya ndyabareetera okurangaanwa n'okusiimwa ab'omu mahanga goona ag'omu nsi, omu bunaku bu ndibagaruriramu aha buteeka nimwereebera. Nyakubaho nikwo arikugamba.

← Chapter 2 Jump to: