1 Kings 21

Oromo Bible (KITAABA WAAQA) 2019

← Chapter 20 Jump to: Chapter 22 →

1D'aatu mana hayyu Ahabu Yezreeli keesa oobru zabibu ta namicha Nabothi jed'ani tokoti jira.

2Jennaani guyya toko Ahabuni waan Nabothini jed'e, oobru tante ta zabibu naa kenni, isiini Mana kiyyati aanti anini sagale keesati oobrachu fed'a. Anini fulla isii oobru zabibu dansa d'ibi sii kenna, yokhaani yo atini feete, beese sii baasa.

3Nabothini waan jed'eeni, Anini oobru tana ababo kiyya iraa d'aale; Waaqi na didinna, yo anini sii kenne!

4Ahabuni dubbi Nabothini jed'eeni taani iraa laalefate, dallane kae worra ufiti gale, sire gubba ch'iise, fuula manati deefate sagale nyaachu dide.

5Niitiini isaa Yezebelini gara isaa d'ufte waan jetteeni, Atini maafi akana laalefate sagale nyaachu didda?

6Inni waan jed'eeni, maro dubbi Nabothini nani jed'eefi, akana tahe. Anini oobru tante ta zabibu siraa bitaa, yokhaani ta d'ibi sii kenna, jennaani inni dide!

7Yezebelini waan jetteeni, Atini hayyu mo maani? Kai, garaa jabaad'i, sagale nyaad'i, oobru Nabothi ta zabibu anumati sii kenna!

8Jennaani isiini maqa Ahabutini tatabe t'aafte, beesisa isaa ira keete, jaaroleefi worra gugurda Yezreeliti kennite.

9Tatabe suni keesati isiini waan jette, guyya toko tolcha, ka nami ch'ufti agabu oolu, biyya ch'ufa wolti yaama, barch'uma guddinna Nabothi kenna.

10Duuba nama hamama lama isa d'aatu tetesisa, worri suni ha, Nabothini Waaqafi hayyule arabse jed'e biyyati himuti. Duuba dira keesaa baasa, d'akhaani d'aana ijeesa.

11Jennaani jaaroleefi worri mata dira Yezreeli waan Yezebelini jetteeni tolche.

12Guyya nami ch'ufti agabu oolu tolfatani biyya wolti yaamani, barch'uma guddinna Nabothi kennani.

13Worri hamani kaani d'aatu isaa tatae, waan biyyaani jed'e, Nami kunini Waaqafi hayyu arabse, jennaani dira keesa allaati baasani, d'akhaani d'aanani ijeesani,

14qoonqo gara Yezebeli ergani waan jed'ani Nabothi ya ijeesani.

15Yezebelini akuma qoonqo suni d'ageeteni, waan Ahabuni jette, Nabothini ya due, kai, oobru isaa ta zabibu ta inni siti gurguru dide fud'ad'i.

16Hojuma suni Ahabuni kae, oobru taani fud'achu d'aqe.

17Jennaani AABBO Waaqi waan Eliya, raaga Tibshe d'ufeeni jed'e,

18gara hayyu Ahabu, ka Samaria jiru d'aqi; inni oobru Nabothi fud'achu d'aqe, achi jira.

19Waan jettuuni, AABBO Waaqi waan siini jed'u, atini namicha ijeefte ammalle oobru isaa fud'atta? Waan jettuuni, AABBO Waaqi waan sinjed'u. Fulluma saareni d'iiga Nabothi iti arraabde suniti keetile arraabdi!

20Ahabuni Eliya arge jennaani waan jed'eeni, Atini, nyaapa kiyya, ammalle ya na d'aqabde? Eliyaani waan jed'eeni, Ee, ya si d'aqabe.

21Atini ya ufi baafte, aka waan hamtu ch'alla AABBO Waaqa durati tolchitu, tanaafi AABBO Waaqi waan siini jed'u, anini badi sitiini d'ufe sifi nama d'iira kaimafi jaarsale ch'ufa ka worra keesani lafa iraa balleesa.

22Worri keesani aka worra Yeroboamu ilma Nebatetifi worra Baasha ilma Ahiya taha; wonti akanatiifi atini aka taka inargini na dallansiifte, worra Israelile ch'ubbu keesa buufte.

23Ammalle AABBO Waaqi waan Yezebeli waan jed'u, Sareeni d'ufte nafa isii dira Yezreeli keesati nyaati.

24Nama fiit'a tanteeti ka dira keesati duu sareeti nyaata, ammo ka alati duu allaatiti nyaata.

25(Nami tokoleeni ka aka Ahabu ufi baase waan hamtu AABBO Waaqa durati tolche injiru waan suni ch'ufa niiti isaa Yezebaliti isa tolchisise.

26Inni ch'ubbu hamtu ch'eera tolche, waan harkaani boch'ani kad'ate, akuma worri Amori, ka AABBO Waaqi worra Israeli duraa gusse, tahe.)

27Eliyaani dubbi tana buufate jennaani, Ahabuni woya ufi tarsaase, baafate, ch'arqi naqate. Inni sagalele nyaachu dide, woya ch'arqi sunini bule, fuula yakate, miira hamaate, ufuma dedeeme.

28AABBO Waaqi waan raaga Eliyaani jed'e,

29Atini aka Ahabuni na durati ufi diqeese agarte? Waan inni akana taheefi, haga inni jiru amma gaargala itiini ind'ufu; ammo gaafa ilmi isaa hayyu tahu gaargala worra isaatini d'ufa.

← Chapter 20 Jump to: Chapter 22 →