Amos 9

pampanga

← Chapter 8 Jump to:

1Ikit ke ing Ginu; makatalakad ya lele ning altar. Nganang minutus: Pukpukan mong masikan ding punta da ring asias ning Templo ban maugun la. Idagsa mu la ban dugpa la karing buntuk da ring tau. Paten ku la king gera ding mitagan. Alang miligtas metung man karela; mate la ngan.

2Agyang gawa la pang kulkul at sumulud la angga king kutkutan da ring mete, akit ku la rin at akua. Agyang mukiat la pa banua, ibaba ku la rin.

3Akit ku la rin at arakap agyang salikut la king taluktuk na ning Bunduk ning Carmel. Nung salikut la man king kalalalaman na ning dagat, utusan ku ne man ing dambuala ning dagat ban pangetan na la.

4Nung sakali namang mabihag la karing kalaban da, iyutus ku karing makabihag karela ing paten da la. Inari ku na king lub ku king gisanan ku la lahi at e saupan.

5Tagkilan ne ning Ginung Dios a Mayupaya ing yatu at mayun; manangis la ding sablang manuknangan karin. Ing mabilug a yatu mibaba-mitas yang anti ing Ilug ning Nilo.

6Gagawa yang tuknangan na ing Ginu king babo banua at babo yatu bibili ne ing suklub ning banua. Ausan nang lumapit ing danum ning dagat, at iti tutugtug na king yatu. Ginu ing lagyu na!

7Ngana ning Ginu, Memalen ning Israel, parehu ing lawe ku kekayu at karing memalen ning Etiopia. Linigtas ku la ding memalen na ning Filistia king Creta, linigtas ku la ding tau Siria king Kir, nung makananu da kayu namang linigtas king Ehipto.

8Aku, ing Ginung Dios, lawen ke iting makasalanan a kayarian na ning Israel at gisanan ke keti king babo yatu. Oneng e ku la lubus gisanan ding sablang lahi nang Jacob.

9Aku ing munie utus at itatap ku la ding memalen ning Israel anti ing binutil a tatatap da king igu. Simen ku la at ilako ding sablang e karapatdapat.

10Mate la king gera ding sablang makasalanan libutad na ning kanakung balen, ding sablang sasabing, E na paintulut ning Dios ing misakitan tamu!

11Nganang sasabi ning Ginu, Daratang na ing aldo a aku ibawi ke ing kayarian nang David a mengaring bale melasak. Larinan ku la ding dalig na at italakad keng pasibayu. Gawan keng pasibayu a antimo ing king minuna.

12Inya makanyan deng salakayan ding memalen ning Israel ing mitagan king sakup ning Edom at karing sablang bansang meging bandi ku kanitang misan a panaun.

13Nganang magsalita ning Ginu, Ding aldo daratang la, potang e la pa man meyaring tinanam ding tau atin na lang pupupulan, at ding gagawang alak e ra la pa ayagad ding mamunga rang ubas. Magus karing bunduk ing mayumung alak, at taglus iti karing bunduk-bundukan.

14Ibalik ku la ding kakung memalen karing karelang gabun. Larinan da la ring karelang melasak a siudad, at manuknangan la karin; mananaman lang ubas at minum lang alak; gawa lang karelang mulahan at kanan da ing karelang tenam.

15Itanam ke ing balen ku king gabun a karela binie ku, at e na la mabagut pasibayu. Ing magsalita ya ing Ginung kekayung Dios.

← Chapter 8 Jump to: