Daniel 5

pampanga

← Chapter 4 Jump to: Chapter 6 →

1Misan, kinumbira na lang Aring Belsazar ding libung marangal a tau king metung a maragul a pamisulusulu, at miyabe-abe lang mininum alak.

2Kabang miminum la, inutus nang Belsazar ing idala da la ring kopang gintu at pilak a lulanan alak a kinua nang Nebucadenesar a tata na karin king Templo ning Jerusalem. Pepakua na la ning ari ban ya, ding marangal a tau, ding asawa na, at ding babaing kasese na makainum la kareting kasangkapan.

3Kanita mu rin dela da la arapan na ding kopang gintu at pilak a lulanan alak, at mininum la ngang alak kareti,

4at pinuri da la ring kikilalanan dang dios a megawa king gintu, pilak, tangsu, bakal, dutung, at batu.

5Kabud-abud linto ya ing metung a gamat ning tau, at megumpisa yang sinulat king pader ning palasyu nung nu tutud ing sala da ring sulu. Ikit ne ning ari ing gamat kabang susulat ya.

6Menimutla ya at tune yang mitakutan angga king ginalgal la ding tud na.

7Kinulisak yang masikan at inutus nang idala da la ring salamangkeru, ding Caldeo, at ding astrologo. Inyang dinatang la ngana karela ning ari, Ing ninumang makabasa king misulat at makaibie kanaku king kabaldugan na mipiblasan yang imalan a purpura, mipasuluran yang gintung kwintas ning dangalan king batal na, at maging katlu ya karing ating upaya king kayarian.

8Linapit la ding mangabiasa na ning ari, oneng metung man karela alang mekabasa king makasulat king pader ni mekaibie king ari nung nanu ing kabaldugan na.

9King kaligaligan nang Aring Belsazar, lalu yang meputla at ala lang aisip gawan da ring mangarangal nang tauan.

10Dimdam ning reynang ima na ning ari ing inge ning ari ampon ding mangarangal nang tauan, at linub ya king lugal nung nu mararapat ing pamisulusulu. Ngana, Mananu na sanang ing Kekang Kamalan mie ya kapilan man! E ka sa pailingasngas at binang manimutla.

11Ating metung a lalaki king kekang kayarian nung kenu ya atyu ing espiritu ding banal a dios. Pepakit yang talino inyang i tata mu ya ing ari; maki kabiasnan ya at beluan anti ing beluan da ring dios. At ing Aring Nebucadenesar a tata mu, gewa neng pamuntuk da ring mamamanula, ding salamangkeru, ding Caldeo, at ding astrologo.

12Atin yang makapasubaling kagiwan at beluan ampon gelingan tungkul king pamamie kabaldugan karing paninap, pamaglutas karing bugtung, at pamipalino karing misteryu ning bie. Inya iparakit me ing lalaking i Daniel a pemalagyuan nang Beltesasar ning ari. Sabian na keka nung nanu ing kabaldugan na.

13Kanita mu rin dela re i Daniel king arapan ning ari at ngana ning ari, Ika pin i Daniel, ing Judiong bihag a tiki nang tata ku inyang ibat ya Juda?

14Abalitan ku king ing espiritu ding banal a dios atyu keka at king atin kang beluan ampon kabiasnan.

15Peparatangan ku la ding mangabiasa at salamangkeru ban basan de ing makasulat king pader at ban sabian da kanaku ing kabaldugan na, oneng e ra balu ing kabaldugan na.

16Abalitan ku king malyari mung aibie kanaku ing makalihim dang kabaldugan at kamalinawan ding misteryu. Nung abasa mu ing makasulat at asabi mu kanaku ing kabaldugan na, mipaimalanan kang purpura, misulud ya keka ing gintung kwintas ning dangalan king batal mu, at maging katlu ka karing ating upaya king kayarian.

17Nganang mekibat Daniel, E yu na ku dirinan nanuman; ibie yu na mu king aliwa. Basan ke, Makamal a Ari, para kekayu ing makasulat king pader at sabian ku kekayu ing kabaldugan na.

18Gewa ne ning Kakataskatasan a Dios i tata yung i Nebucadenesar metung a mayupayang ari, at dininan neng dangalan at kamalan.

19Tune yang pikabaluan at tatakut la kang tata yu at gagalgal ding tau da ring bansa, lahi, at salita. Nung buri neng paten ing ninuman, gawan na; nung buri neng manatiling mabie, daptan na. Parangalan ne o ilako dangalan ing ninumang buri na.

20Oneng meging palalu ya, masias a buntuk, at mabagsik; milako ya king tronu na at mewala ing dangalan na.

21Mitabi ya king lipunan at meging anti ing pamisip ning metung a animal ing pamisip na. Menuknangan yang kayabe da ring malyap a asno; mengan yang dikut anti ding baka, at metudtud ya king marangle a alang nanumang panlaban king ambun. King katataulian, tinggap na king ing Kakataskatasan a Dios ya ing magmanehu karing heganaganang kayarian da ring tau, at ya ing babie king ninumang pilinan na.

22Oneng ikayu a anak na, migmatas kayu naman agyang balu yu ngan iti.

23Dinapat kayung laban king Ginu ning banua at dela yu la keti ding kopa at lulanan ibat king Templo na. Ikayu, ding mangarangal yung tauan, ding kekayung asawa, at ding babaing kekayung kasese ginamit yu la king pamaninum yung alak at pinuri yu la ding kikilalanan yung dios a megawa king gintu, pilak, tangsu, bakal, dutung, at batu; ding dios a e manakit o makaramdam ampon alang balu nanuman. E ye parangalan ing Dios a tatalan king bie yu at magmanehu king heganaganang gagawan yu.

24Yan ing sangkan nung inya tinubud ne ning Dios ing gamat ban isulat na la ding amanu king pader.

25Oyni ing misulat: MENE, MENE, TEKEL, at PARSIN.

26At oyni ing kabaldugan na ning MENE, binilang na na la ning Dios ding aldo ning kekayung kayarian at dininan na neng kawakasan;

27ing TEKEL, metimbang kayu at meyakit king kulang kayu king timbang;

28PARSIN, mangapitna-pitna ya ing kekayung kayarian at miyabie ya karing tau Media at Persia.

29Kanita mu rin inutus nang Belsazar karing talasuyu na ing piblasan deng imalan a purpura i Daniel, at isulud de king batal na ing kwintas ning dangalan. At gewa neng katlu karing matas a katungkulan king kayarian na.

30King bengi mu ring ita, pete re i Belsazar a ari ning Babilonia.

31At i Dario, ing tau Media, a idad anam apulu't aduang banua kanita, ya ing meging ari ning Babilonia.

← Chapter 4 Jump to: Chapter 6 →