Job 9

pampanga

← Chapter 8 Jump to: Chapter 10 →

1Nganang mekibat Job:

2Wa, balu ku king makanyan pin. Makananu yang sumambut ing tau king kasu na laban king Ginu?

3Nung ipilit ning ninuman ing makiargu ya king Ginu, agyang metung mu karing libu nang kutang ala yang malyaring apakibatan.

4Ing Dios biasa yang tutu at mayupaya; alang taung makatalakad laban king Ginu.

5Yayabe na la ning Ginu ding bunduk king e ra kamalayan, pamaligtad na la deti potang mimimua ya.

6Potang ayun padala na la, mangakimut ya ing yatu king kabilian na; pagalgalan ne angga na king pundasyun na.

7Ing Dios ya ing mumutus king aldo, at karing batuin ban ing sala pigilan da.

8Ninu ing magdili-diling milantang king banua, at babo alun ning dagat miglakad pa?

9Ing Dios ya'ng mibili king kabilian da ring batuin king banua, ing Saru, ing Orion, ding Pleiades, at ding batuin ning mauli.

10E ta la abut mang isipan ding maragul nang daraptan. E la mabilang-bilang ding makapagmulala nang dapat.

11Daralan ya ing Dios siping ku, oneng e ke akakit. Sumulung ya man e ku man apansinan.

12Nung atin yang samsaman ninung makasabat? Ninu ing makakutang king Ginu: Nanu ing kekang gagawan?

13E na pipigilan ning Dios ing mua na; kampun nang Rahab pakapase la king kabitisan na.

14Makananu ke ngening pakibatan o mamiling amanung imatulid?

15Agyamang ala kung kasalanan, e ku pa mu rin makiargu; maniawad na ku mung lunus king Dios a ukum ku.

16At nung paintulutan na kung makiargu, e ku pa mu rin paniwalan ing makiramdam ya kaku.

17Pablasang king metung mung bagyu lasawan na ku, paniugatan na ku king alang kasangkanan a balu ku.

18E na ku dirinan mang panaun makapangisnawa; bagkus king kasakitan kakatmuan na ku pa.

19Nung ing labanan tungkul king sikanan, ya na ing mas masikan; nung ing pisasabian keng ukuman ninu ing malyaring maus king Ginu?

20Tapat ku at alang kasalanan, oneng ding amanu ku ilang mangondena kaku, ing anggang sasabian ku ilang babie kayatulan king sarili ku.

21Ala kung kasalanan, makanyan man parehu na kaku; kaku yang pikakasaman ing bie ku.

22Metung mu ing heganagana; ita ya ing kakung sasabian, ing Dios parehu na lang siran ding ala o ating kasalanan.

23Mayli ya ing Dios potang ing kamatayan bigla yang datang king taung alang kasalanan.

24Miyabie ya ing yatu karing e mayap a tau. Tatakpan na la mata ding ukum. Nung aliwa ya ing Dios ing makirapat, ninu mo?

25Mabilis la pa king taung pupulayi ding aldo ku; king kabilis dang lilipas ala lang akakit a mayap.

26Anti lang bangkang mabilis babo ning danuman, anting susulapo a agila neng sasagmit yang pamangan.

27Nung sabian ku ing tuknang na kung daraing, at alilan ku na ing itsura ku, at timan ing mayakit king lupa ku,

28datang naman ing takut uli ning dakal kung kasakitan, uling balu kung e mu ku pa mu rin patawaran.

29Miyatulan ku pa mu rin king pamikasala; obat magmalasakit ku pa nung muli mung alang ulaga?

30Nung king sabun maglinis ku man at kakung gamat pakalinis-linisan,

31oneng idagsa mu na ku man king mabuluk a pitak; agyang ing imalan ku kasuklaman na ku.

32Uling ing Dios e ne man tau ban malyaring pakibatan ku, inya e kami malyari ikeng adua marap king ukuman.

33Alang malyaring mamilatan kekaming adua; alang matul kekami, king Dios at kaku.

34Nung ilako nia mu ing pamarug na arapan ku, at ilako na ing takut ku uli ning bigsikan na,

35kanita magsalita kung alang takut king Ginu uling balu ku ing kalamnan na ning kakung pusu.

← Chapter 8 Jump to: Chapter 10 →