1 Corinthians 4

Quechuan (Tayta Diospa Wilakuynin) 2003

← Chapter 3 Jump to: Chapter 5 →

1Wawqi panikuna, Tayta Diospa wilakuyninta wilakur Jesucristupa sirviqnilan kashqäta tantiyakäriy.

2Ali sirviqqa yärakuypaqmi kanman.

3Tsaymi Jesucristuta mana sirvishqäta yarpaptikipis o wakin runakuna tsayno yarpaptinpis mana lakikütsu.

4Noqapa yarpaynïpitaqa Jesucristuta alimi sirviykä. Tsayno kaptinpis manami ali sirvishqäta tantiyashqäpitatsu Tayta Dios «alimi sirvimashqanki» nimanqa, sinöqa ali sirvishqäta kikin musyarmi.

5Tsayno kaykaptinqa manaraqpis hörancho pitapis ama juzgaytsu. Señor Jesucristo kutimurnami pakaylapa rurashqantsikunata y shonqulantsicho yarpashqantsitapis juzgamäshun. Tsay höraraqmi ali o mana ali sirviqnin kashqantsita nimäshun.

6Wawqi panikuna, Tayta Diospa palabrancho qelqaraykaqta cäsukärinaykipaqmi Apoluspita y kikïpita kay cartacho niykämü. Cäsukurqa manami jukaq yachatsishuqnikipa favornin sharkur jukaqpa contran sharkunkimantsu. Tsayno rurarqa yachaq tukurkaykankimi.

7Yachatsishuqnikikunata tsayno juzganaykipaqqa ¿pitaq karkaykanki? Tantiyaq kashqaykipis ¿manaku Tayta Diospita kaykan? Tayta Diospitaraqmi lapantapis chaskipäkushqanki. Tsayno kaykaptinqa ¿imanirtaq kikilaykikunapita tantiyaq kashqaykita yarpar alabakurkaykanki?

8Qamkunaqa lapan munashqaykita chaskipäkushqankinami ¿aw? Rïcunami karkaykanki ¿aw? Noqakuna manaraq chayamuptïpis Jesucristuwan mandarkaykashqaykitami yarpapäkunki ¿aw? Rasunpa mandapäkuptikiqa ¡alimi kanman noqakunapis mandäshinäpaq!

9Tantiyaynïpitaqa apóstol kanäpaq Tayta Dios churamashqa lapanpitapis mas nakanäpaqmi. Lutan ruraq runatanömi noqakunata wanutsimayta munapäkaman. Tsayno nakashqätaqa lapan runakunapis y angilkunapis rikarkaykämanmi.

10Qamkunaqa Jesucristuta sirvir yachaq y tantiyaq kashqaykitami nirkaykanki. Noqakunatami itsanqa Jesucristuta sirviptï runakuna upatano rikapäkaman. Qamkunaqa puëdiq kashqaykitami nirkaykanki. Noqakunatami itsanqa imatapis rurayta mana puëdiqtano rikapäkaman. Qamkunataqa alimi rikapäkushunki. Noqakunataqa mana väliq runakunatanömi rikapäkaman.

11Kananyaqpis noqakunaqa mikanar, yakunar, qasätsikur y maqar ushashqami puripäkü. Wayïkunapis kikïkunapaqa manami kantsu.

12Pishipakurpis kikïkunami utikashqäyaq arupäkü. Runakuna ashlipäkamaptinpis Tayta Diostami manakärï bendicionninta qonanpaq. Chikipäkamaptinpis mana rabyapaypami puripäkü.

13Wasäta rimaptinpis ali shimiläpami parlapä. Kananyaqpis pasaypa mana väliqtano y manakaqtanömi rikapäkaman.

14Manami qamkunata penqayman churanäpaqtsu tsayno nir qelqamü, sinöqa kuyay tsurïtano yätsirmi.

15Chunka waranqa (10,000) yachatsishuqnikikuna kaptinpis Jesucristuta chaskikunaykipaq juklaylami puntata wilapäshushqanki. Tsay wilapäshuqnikiqa noqami kaykä. Tsaynöpami qamkunapa taytaykino kaykä.

16Tsaymi qamkunata ruwakü noqa kawashqäno qamkunapis kawapäkunaykipaq.

17Qamkuna kaqcho imano kawashqätapis yarpätsishunaykipaqmi Timoteuta kachamushqä. Kuyay tsurïnömi payqa kaykan. Tsaynöpis Tayta Dios munashqannömi payqa kawaykan. Lapan iglesiakunacho yachatsishqänömi shumaq yachatsipäkushunki.

18Wakinnikiqa mana kutimunäpaq kaqta yarparshi pasaypa yachaq tukurkaykanki.

19Tsayno yarpaptikipis Tayta Dios munaptinqa watukuq shamushaqmi. Tsaychönami tsay yachaq tukuqkuna musyamanqa. Paykunaqa mä rasunpakush Tayta Diospa munayninwan rurarkaykan o kikinpa yarpaynilanpitakush parlarkaykan.

20Tayta Dios mandaykashqancho kawayqa manami yachaq tukur parlashqantsitsu, sinöqa pay munashqanta rurar kawashqantsimi.

21¿Imano chayamunätataq munapäkunki? ¿Rabyashqa chayamunätaku o kushishqa chayamunätaku?

← Chapter 3 Jump to: Chapter 5 →