2 Kings 25

Quechuan (Tayta Diospa Wilakuynin) 2003

← Chapter 24 Jump to:

1Tsaymi rey Nabucodonosor lapan soldädunkunawan Jerusalén tsimpanman chayaykur campamentuta rurapäkurqan. Tsaypitanami marka murälla waqtanpa alpata qotutsirqan tsaypa witsarkur atacananpaq. Tsayno pasarqan Sedequías pusaq wata rey kaykaptinmi. Nabucodonosor Jerusalénman chayashqan junaq karqan chunka kaq killacho chunka kaq junaqmi.

2Jerusalénta tsayno jiruruypa tsapararqan hasta Sedequías chunka juk watana rey kayta qalaykushqanyaqmi.

3Runakuna mikunanpaq imapis mana kaptinmi chusku kaq killacho isqun junaq kaykaptin

4marka murällata uchkupäkurqan. Babilonia soldädukuna markata tsaparaykaptinmi Jerusaléncho soldädukuna tsakaypa qeshpir reypa huertanpa pasar ishkay murälla punkupa yarqapäkurqan. Tsaypitanami Arabá pampapa aywaq nänipa aywakärirqan.

5Tsayno qeshpiykaptinmi Babilonia soldädukunaqa rey Sedequíasta taripaykur Jericó pampacho tsarirqan. Tsaymi Sedequíaspa soldädunkuna kachariykur wakpa kaypa qeshpir aywakärirqan.

6Rey Sedequíasta tsayno prësu tsariykurmi Babilonia nacionpa mandaqnin rey Nabucodonosorman apapäkurqan. Nabucodonosorqa kaykarqan Ribla markachömi. Tsaycho juzgarmi

7rey Sedequías rikaraykaptin tsurinkunata wanutsipäkurqan. Kikin Sedequíastanami ishkan nawinta jorqurir cadinawan watarkur Babiloniaman prësu apapäkurqan.

8Nabucodonosor chunka isqun watana Babiloniapa mandaqnin rey kaykaptinmi pitsqa killacho y qanchis kaq junaqcho Nabuzaradán Jerusalénman chayarqan. Nabuzaradánqa Nabucodonosorpa wardiankunapa capitanninmi karqan.

9Jerusalénchömi Tayta Diospa templunta, reypa palaciunta, lapan wayikunata y autoridäkunapa despächunkunata rupatsipäkurqan.

10Nirkurnami Jerusalén markapa murällanta soldädukuna juchutsipäkurqan.

11Tsaypitanami Jerusaléncho quëdaq runakunata Babiloniaman Nabuzaradán prësu aparqan. Tsaynöpis aparqan Babilonia reypa favornin sharkuq runakunata y nawpata mana apashqan artesänukunata.

12Mas waktsa runakunatami itsanqa jinalancho kachaykurqan chakrakunata arupäkunanpaq y üvakunata uryapäkunanpaq.

13Tsaynöpis pakir usharqan templucho broncipita rurashqa jatunkaray columnakunata, carrëtakunata y lamar nishqan jatunkaray lavatoriuta. Nirkurnami tsay pakishqan broncita Babiloniaman apakurqan.

14Tsaynölami apakurqan uchpa shuntakunankunata, pälakunata, lipta jorqukunankunata, wishlakunata y wakin manëjukunatapis. Tsay manëjukunami broncipita rurashqa karqan sacrificiukunata rupatsir manijapäkunanpaq.

15Tsaynölami capitán Nabuzaradán apakurqan inciensu qoshtatsikunankunata, tazonkunata y lapantapis qoripita y qellaypita kaqkunata.

16Apakushqan broncita manami pësaytapis atiparqantsu. Tsay bronci karqan ishkay columnakunapita, lamar nishqan jatunkaray lavatoriupita y carrëtakunapita. Tsaykunata rey Salomónmi Tayta Diospa templuncho kananpaq ruratsirqan.

17Templu punkucho columnakunaqa pusaq metruno largumi karqan. Columna puntancho ishkay metrunömi broncipita rurashqa tumaypa adornun karqan. Tsay adornu intëru kuchunpa awashqa shikra niraqmi karqan. Warkuränanpaqmi broncipita rurashqa granäda niraqkunapis karqan. Jukaq columnapis tsay niraqlami karqan.

18Mandaq cüra Seraíastanami wardiakunapa capitannin Nabuzaradán prësu tsarirqan. Paytawanmi prësu tsarirqan mandäshiqnin cüra Sofoníasta y templu punkuta täpaq kimsa runakunatapis.

19Tsaynölami prësu tsarirqan soldädukunapa capitanninta, reyta yätsiq pitsqa runakunata, sortiyädu shuntaq capitanta y soqta chunka (60) mayor runakunatapis.

20Babilonia nacionpa mandaqnin rey Nabucodonosor Ribla markacho kaptinmi wardiakunapa capitannin Nabuzaradán lapan tsay prësu tsarishqan runakunata Riblaman apapäkurqan.

21Tsaychömi Nabucodonosor nirqan tsay runakunata wanutsipäkunanpaq. Tsaynöpami Judá runakunata wakinta wanutsipäkurqan y wakintana juk nacionman apakärirqan.

22Tsaypitanami rey Nabucodonosor Judácho quëdaq runakunapa gobernadornin kananpaq Gedalíasta churarqan. Gedalíaspa taytanmi karqan Ahicam y awkilunnami karqan Safán.

23Gobernadornin kananpaq churashqanta mayaykurmi Gedalíaswan parlananpaq Judá soldädukunapa capitanninkuna Mizpaman aywapäkurqan. Tsay capitankunami karqan Netaníaspa tsurin Ismael, Careapa tsurin Johanán, Netofapita kaq Tanhumetpa tsurin Seraías y Maacapita kaq Jaazanías. Paykunami aywapäkurqan soldädunkuna pushashqa.

24Chayaykuptinmi Gedalías kayno nirqan: «Ama mantsakushuntsu Babilonia nacionpita shamuq capitankunata. Babilonia nacionpa mandaqnin reypa makincho karqa alimi kawapäkushunpaq».

25Tsaypita qanchis killa pasarkuptinnami Ismael jutiyuq runa Mizpa markaman chayarqan chunka runakuna pushashqa. Ismaelqa karqan Elisamapa wilkan y Netaníaspa tsurin. Tsaynöpis karqan Judá nacionpa mandaqnin reykuna aylumi. Chayaykurmi gobernador Gedalíasta, paywan kaykaq Judá runakunata y tsaycho kaykaq Babilonia runakunatapis wanutsipäkurqan.

26Tsayno ruraykuptinmi Babilonia runakunata mantsakushpan Judácho quëdaq runakunaqa wamrapis awkinpis y soldädukunapis lapan juntakaykur Egiptupa qeshpir aywakärirqan.

27Babiloniapa mandaqnin rey Evil-merodac mandayta qalaykushqan watami Judá nacionpa mandaqnin rey Joaquínta kuyapar carcilpita jorqatsirqan. Tsayno jorqatsirqan Babiloniaman prësu apashqan kimsa chunka qanchis (37) watatana ushaykaptin chunka ishkay kaq killacho ishkay chunka qanchis (27) junaqchömi.

28Shakya shakya parlaparmi Joaquíntaqa Babiloniacho prësu kaykaq reykunapita mas ali rikarqan.

29Tsaynöpami rey Joaquínqa carcilcho kashqan röpanta trukakurir Babilonia nacionpa mandaqnin reywan imaypis juntu mikurqan.

30Gastunkunapaqpis wanushqanyaqmi waran waran qellayta reypita chaskirqan.

← Chapter 24 Jump to: