2 Peter 3

Quechuan (Tayta Diospa Wilakuynin) 2003

← Chapter 2 Jump to:

1Kuyay wawqi panikuna, kaywanqa ishkay kutinami cartata apatsiykämü. Ishkan cartachöpis ali kawapäkunaykipaqmi yätsiykä.

2Tsaynöpis yätsiykä santu profëtakuna wilakärishqanta y salvamaqnintsi Señor Jesucristupa mandamientunta mana qonqanaykipaqmi. Tsay mandamientutaqa apostolninkunami yachatsishurqayki.

3Tantiyakäriy ultimu tiempucho Diosta mana cäsukuq runakuna yurimunanpaq kashqanta. Tsay runakuna asipäshunayki kashqami

4kayno nipäkunqa: «¿Imanirtaq Jesucristo «kutimushaqmi» nirkur mana kutimunraqtsu? Paywan puriqkunapis shuyaraykashqalanchömi wanushqa. Kay patsapis qalaykushqanpita patsa kashqannölami kaykan».

5Tsayno nirqa manami tantiyapäkuntsu Tayta Dios «tsaykuna katsun» nilar kay patsatapis jana patsatapis kamashqanta. Kamaptinmi yaku rurinpita tsaki patsa yurimurqan.

6Tsaypitanami kay patsata diluviuwan ushakätsirqan.

7Tsaynölami juiciu final junaqcho Tayta Dios niptilan kay patsa, inti, killa y lapan qoylarkunapis nina rupaptin ushakanqa. Tsay junaqmi jutsa ruraq runakunapis ushakanqa.

8Kuyay wawqi panikuna, shumaq tantiyakushun: Tayta Diospaqqa juk junaq waranqa (1,000) watanömi kaykan y waranqa watapis juk junaqnölami kaykan.

9Tsayno kaykaptinqa wakin runakuna yarpashqanno ama yarpäshuntsu Señor Jesucristo mana kutimunanpaq kashqanta. Payqa manami munantsu pipis jutsacho wanunanta. Tsaymi shuyaraykan runakuna jutsankunata kacharir payta cäsukärinanta.

10[Tsakaypa] elaqpita suwa shamushqannömi Señor Jesucristupis elaqpita shamunqa. Pay shamuptinmi intipis, killapis y lapan qoylarkunapis fiyupa bunrurur ninawan rupaykar ushakanqa. Tsaynölami kay patsapis y kay patsacho kaqkunapis rupaykälar chipyaq ushakanqa.

11Lapan imaykapis ushakänanpaq kaykaptinqa jutsata mana ruraypa Tayta Dios munashqanno santu kawapäkuy.

12Tsayno shuyarpaptikimi Tayta Dios juzganan junaq ras chayamunqa. Tsay junaqmi intita, killata y qoylarkunatapis nina rupar ushanqa. Tsaynölami lapan imaykapis tsuluykälar ushakanqa.

13Noqantsimi itsanqa Tayta Dios promitishqannöla mushuq ciëluta y mushuq patsata shuyarpaykantsi. Tsaychöqa Tayta Dios munashqannömi lapanpis ali kanqa.

14Kuyay wawqi panikuna, tsaykunata shuyarpaykarqa jutsa ruraykunata kacharir pïmaywanpis ali kawapäkuy. Tsaynöpami Jesucristo kutimur jutsaynaqta taripäkushunki.

15Tantiyakäriy Señor Jesucristo imanir manaraq kutimushqantapis. Payqa shuyaraykan runakuna salvakärinantami. Tsaytaqa kuyay wawqintsi Pablupis Tayta Dios tantiyatsiptin qelqashqami.

16Lapan cartankunachömi tsayta qelqarqan. Tsay cartankunacho sasa tantiyaypaq kaptinmi yachaq tukuqkuna y Tayta Diosman janan shonqula yärakuqkuna lutanta yachatsipäkun. Tsaynölami lutanta yachatsipäkun Tayta Diospa palabrancho wakin kaq yachatsikuykunatapis. Tsay runakunaqa infiernuchömi nakapäkunqapaq.

17Kuyay wawqi panikuna, kay nishqäkunata musyaykarnaqa cuidädu chaskipankiman lutan yachatsikuqkunapa yachatsikuyninta. Tayta Diosman ali yärakurkaykashqaykicho cuidädu qepaman kutikärinkiman.

18Tsaypa trukanqa waran waran tantiyakäriy kuyapäkuq y salvakuq Señor Jesucristo munashqanno kawapäkunaykipaq. ¡Payqa kananpis y imayyaqpis alabashqa kaykulätsun! Amén.

← Chapter 2 Jump to: