3 John 1

Quechuan (Tayta Diospa Wilakuynin) 2003

Jump to:

1Kuyay wawqi Gayo: Noqa mayor wawqi karmi qamta rasunpa kuyar kay cartata apaykätsimü.

2Kuyay wawqi, Tayta Diostami manakuykä ali kawashqaykiman tupu lapanchöpis alila kanaykipaq y mana qeshyaypa kawanaykipaq.

3Jesucristo yachatsishqannöla kawaykashqaykita wawqikuna chayamur wilamaptinmi pasaypa kushikushqä.

4Tayta Dios munashqanno wamräkuna kawarkaykashqanta musyarmi pasaypa kushikü.

5Kuyay wawqi Gayo, juk lädupita shamuq wawqikunata yanapar alitami ruraykanki.

6Paykuna chayamurmi kuyapäkuq kashqaykita juntakashqächo wilamashqa. Yapay kutimuptinpis juk markaman aywananpaq yanapaykulanki. Tsayno ruraptikimi Tayta Diospis kushikunqa.

7Jesucristupa ali wilakuyninta wilakur purirmi Tayta Diosta mana cäsukuq runakunataqa imatapis manakärintsu.

8Tsaymi Tayta Diospa wilakuqninkunataqa noqantsi yanapanantsi. Tsayno rurarmi paykunawan iwal wilakuqno kashun.

9Wilakuqkunata yanapanantsipaq tantiyatsirmi juk cartata qamkunaman apatsimurqä. Tsayno kaptinpis Diótrefes manashi yätsishqäkunata cäsukamantsu. Payqa mandaq kashqanman atiënikurshi munashqanta ruraykan.

10Tsaynöpis noqakunapa wasäta rimarshi puriykan. Karupita shamuq wawqikunatapis manashi chaskintsu. Patsatsiqkunatapis michanshi mana patsatsinanpaq. Michaykaptinpis patsatsiptinqa juntakashqaykipita qarqunshi. Tsayno rurashqanpita chayamurnami olqüpäshaq.

11Kuyay wawqi Gayo, ama Diótrefesno kaytsu, sinöqa alilata ruray. Alita ruraq kaqqa Diospa wamranmi kaykan. Mana alita ruraq kaqmi itsanqa Diosta mana reqintsu.

12Demetriupaqmi itsanqa lapan runakunapis parlapäkun Tayta Diospa wilakuynin nishqanno kawaykashqanta. Noqakunapis rikashqämi tsayno ali kawaykashqanta. Qamkuna musyankimi wilashqä rasun kaq kashqanta.

13Yätsinäpaq maspis kaykanraqmi. Itsanqa cartalacho manami qelqamushaqtsu.

14Kikï shamurnami mastaqa tantiyatsishayki.

15Tayta Dios yanapaykuläshunki makincho ali kawanaykipaq. Kaycho reqinakushqaykikunapis lapanmi salüdunta apatsikamun. Tsaycho reqinakushqäkunata cada ünunta salüdüta qoykulanki.

Jump to: