Colossians 1

Quechuan (Tayta Diospa Wilakuynin) 2003

Jump to: Chapter 2 →

1Colosas markacho salvashqa kaqkuna: Noqa Pablo, Jesucristupa apostolnin kanäpaq Tayta Dios churamashqa kaptinmi wawqintsi Timoteo ishkanï kay cartata aparkaykätsimü. Qamkunaqa Tayta Diospana karmi pay munashqanno kawarkaykanki. Papänintsi Tayta Dios [y Señor Jesucristo] kuyapäshushpayki ali kawapäkunaykipaq yanapaykuläshunki.

3Qamkunapaq manakur Señornintsi Jesucristupa Papänin Tayta Diostami imaypis agradëcikärï.

4Jesucristuman shumaq yärakärishqaykita y yärakuq mayintsiwan kuyanakurkaykashqaykitami musyapäkushqä.

5Tayta Dioswan gloriacho imayyaqpis kawanaykipaq kashqanta musyapäkushpaykimi tsayno kawarkaykanki. Jesucristupa wilakuyninta chaskikärishqaykipita patsami gloriacho kawapäkunaykipaq kashqanta musyapäkushqanki.

6Jesucristupa ali wilakuynin qamkunaman chayamushqannömi maytsaymanpis chayaykan. Tsay ali wilakuyta chaskikurmi Tayta Dios munashqannöna kawarkaykan. Qamkunapis Jesucristupa ali wilakuyninta chaskikushqaykipita patsami Tayta Dios kuyapäkuq kashqanta tantiyakur pay munashqannöna kawarkaykanki.

7Tsay wilakuyninta chaskikärinaykipaqqa wilakuq mayï kuyashqä Epafrasmi wilapäshushqanki. Paypis Jesucristupa sirviqnin karmi shumaq tantiyatsishushqanki.

8Epafrasmi wilapäkamashqa Espíritu Santu yanapashuptiki kuyanakur shumaq kawarkaykashqaykita.

9Tsayno kawapäkushqaykita musyashqä junaqpita patsami imaypis Tayta Diosta manakurkaykä Espíritu Santu tantiyatsishuptiki Tayta Dios imata munashqanta shumaq musyapäkunaykipaq.

10Tsaynöpami pay munashqanno kawar y imaypis alilata rurar waran waran payta reqipäkunkipaq.

11Tsaynöpis manakurkaykä munayninwan yanapashuptiki ima nakaycho karpis mana ajayaypa payman yärakärinaykipaq

12y imaypis kushishqa agradëcikärinaykipaq. Paymi salvamashqantsi lapan salvashqan kaqkunawan herenciantsita chaskir gloriacho kawapäkunantsipaq.

13Satanáspa munayninpita jorqarkamashpantsimi kuyashqan Tsurin Jesucristo mandaykashqanmanna Tayta Dios churamashqantsi.

14Jesucristumi [yawarninta jichar] rantimashpantsi jutsantsikunata perdonamashqantsi.

15Tayta Diosta mana rikarpis Jesucristuchömi pay imano kashqantapis tantiyantsi. Payqa lapan kamashqankunapaq punta yuriqmi kaykan.

16Paywanmi Tayta Dios kamarqan lapan imaykatapis: jana patsacho kaqkunata, kay patsacho kaqkunata, rikakaqkunata, mana rikakaqkunata y jana patsacho lapan poderniyuqkunatapis. Lapantapis kamarqan Jesucristuwanmi y paypa makincho kananpaqmi.

17Imapis manaraq kaptinmi Jesucristuqa mayna kaykarqanna. Lapan kamashqankunatapis munayninchömi tsararaykan.

18Jesucristuqa umantsimi kaykan. Noqantsinami iglesian kar cuerpun kaykantsi. Lapan wanuqkunapita Jesucristo mas puntata kawarimurmi pïmaypitapis mas munayniyuq kaykan.

19Tsayno munayniyuq kananpaqmi Jesucristucho Tayta Dios kaykan.

20Jesucristo kayninpami kay patsacho kaqkunawan y jana patsacho kaqkunawan Tayta Dios amistarqan.

21Nawpataqa noqantsipis lutanta yarparmi Tayta Diospa contran karqantsi. Jutsata rurashqantsikunami paypita rakimarqantsi.

22Tsayno kawaykaptintsimi cruzcho Jesucristo wanuyninpa Tayta Dios perdonamashqantsi. Tsaymi paypa nawpancho jutsaynaqna santu kaykantsi.

23Nawpanman chayanantsipaqqa Jesucristuman imaypis yärakushun. Ali wilakuynincho nimashqantsita imaypis wiyakushun. Tsay wilakuytaqa maytsaychöpis wilakurkaykanmi. Tsaynölami noqapis wilakuykä wilakuqnin kanäpaq Tayta Dios akramashqa kaptin.

24Mana Israel runakunata wilapashqäpita nakatsipäkamaptinmi Jesucristo iglesianpaq nakashqankunata cumplï. Paypa iglesianqa cuerpunmi kaykan. Tsaymi lakikunäpa trukan kushikü.

25Iglesianta sirvinäpaq Tayta Dios churamashqa kaptinmi qamkunatapis lapan wilakuyninta musyaykätsï.

26Tsay wilakuyninta unay runakuna mana musyashqa kaptinpis kananmi itsanqa Tayta Dios musyatsimashqantsina.

27Tsaymi musyantsi mana Israel runakunapaqpis tsay wilakuy pasaypa kushikuypaq kashqanta. Tsay wilakuyqa kaynömi niykan: Jesucristo qamkunachömi kaykan. Payman yärakurmi Tayta Diospa nawpanman chayankipaq.

28Tsaymi Tayta Dios yachayta qomashqan tupu Jesucristupa wilakuyninta lapan runakunata wilapar shumaq tantiyatsipäkü. Tsayno wilakärï Jesucristuta pïmaypis chaskikur Tayta Diospa nawpanman jutsaynaqna chayapäkunanpaqmi.

29Tsayno kananpaqmi Jesucristo yanapamaptin imano nakarpis wilakur puriykä.

Jump to: Chapter 2 →