Ephesians 6

Quechuan (Tayta Diospa Wilakuynin) 2003

← Chapter 5 Jump to:

1Wamrakuna, Señor Jesucristuta chaskikushqa kaykarqa mamaykita y taytaykita imaypis cäsukäriy. Tsayno cäsukärinaykitami Tayta Dios munan.

2Promësayuq punta kaq mandamientupis kaynömi nin: «Mamaykita y taytaykita respitanki.

3Tsaynöpami kay patsacho atska wata kawankipaq».

4Wamrayuqkuna, wamraykikunata ama rabyanätsiytsu. Tsaypa trukanqa shumaq tantiyatsipäkuy Señor Jesucristo munashqanno kawapäkunanpaq.

5Ashmaykuna, kay patsacho kaq patronnikita cäsukur mandashushqaykita lapan voluntäwan rurapäkuy. Jesucristuta cäsukushqaykinöla patronnikitapis cäsukäriy.

6Patronniki rikashunalaykipaqqa ama aruq tukäriytsu, tsaypa trukanqa Jesucristupa sirviqnin kar lapan voluntänikiwan arupäkuy. Tsaynöpami Tayta Dios munashqanta rurapäkunki.

7Patronniki mandashushqaykita lapan voluntänikiwan rurapäkuy. Ama runakunapaq aruqnölaqa arupäkuytsu, sinöqa Señor Jesucristupaqno arupäkuy.

8Ashmay kaptintsipis mana ashmay kaptintsipis alita rurashqantsipitami Jesucristo gloriacho premiuta qomäshunpaq.

9Patronkuna, qamkunapis ashmaynikikunata ali rikapäkuy. Qayapänaykipa trukanqa ali shimilaykipa shakyätsipäkuy. Tantiyakäriy ashmay karpis patrón karpis jana patsacho kaykaq patronnintsipa makincho kaykashqantsita. Payqa lapantsitapis iwalmi rikamantsi.

10Wawqi panikuna, Señor Jesucristo munayninwan yanapaykäshushqaykiman tupu kawapäkuy.

11Diabluta ichipänaykipaq Tayta Dios kamaripäshushqaykikunata jatikäriy.

12Noqantsi manami runa mayintsiwantsu guërracho kaykantsi, sinöqa munayniyuq supaykunawanmi. Paykunaqa mana rikakaq karpis intëru kay patsachömi imaykatapis mana alikunata rurarkaykan.

13Tsayno kaykaptinqa Tayta Dios kamaripäshushqaykikunata jatikäriy. Tsayno kaykaptikiqa supaykuna shamurpis manami vincishunkitsu.

14Wachkuykiqa rasun kaqlata parlashqaykimi kaykan. Chalëcuykiqa runa mayikita ali rikashqaykimi kaykan.

15Bötasnikiqa Jesucristupa wilakuyninta wilakärishqaykimi kaykan.

16Escüduykiqa Tayta Diosman lapan shonquykiwan yärakushqaykimi kaykan. Tsay escüduwanmi nina rataykaq flëchawanno Satanás atacashuptikipis tsapakärinki.

17Cascuykiqa Tayta Dios salvashushqaykimi kaykan. Espädaykiqa Tayta Diospa palabranmi kaykan. Tsaywanmi Espíritu Santu imaypis yanapashunki.

18Imay hörapis Espíritu Santu tantiyatsishushqaykino Tayta Diosta manakäriy. Mana ajayaypa imaypis ruwakäriy. Yärakuq mayikikunapaqpis mana qonqaypa manakäriy.

19Noqapaqpis Tayta Diosta manakuykulay wilakur shumaq parlanäpaq y pitapis mana mantsakuypa Jesucristupa ali wilakuyninta wilapänäpaq.

20Tayta Diospa wilakuqnin kar wilakuyninta wilakushqäpitami prësu kaycho wichqaraykä. Tsayno kaptinpis Tayta Diosta manakäriy mana mantsakuypa pitapis wilapänäpaq.

21Kuyay wawqintsi Tíquico chayamurmi wilapäkushunki imano kaykashqäta y imata rurashqätapis. Paypis Señor Jesucristupa wilakuqninmi kaykan.

22Tsaymi payta kachaykämü imano kaykashqätapis wilashunaykipaq. Paymi shakyätsishunki Tayta Diosman shumaq yärakärinaykipaq.

23Tayta Dios y Señor Jesucristo yanapaykuläshunki payman yärakur kuyanakunaykipaq y jawka kawapäkunaykipaq.

24Señor Jesucristuta lapan shonqunwan kuyaqkunata Tayta Dios kuyapar imaypis yanapaykulätsun. [Amén.]

← Chapter 5 Jump to: