Ezra 1

Quechuan (Tayta Diospa Wilakuynin) 2003

Jump to: Chapter 2 →

1Persia nacioncho Ciro rey kayta qalaykushqan watami Ciruta Tayta Dios yarpayta qorqan Israel runakunata nacionninman kutitsinanpaq. Tsayno kutitsiptinmi profëta Jeremías wilakushqanno cumplikarqan. Tsaymi Ciruqa mandashqan intëru nacionpa shimipapis y cartawanpis wilakatsirqan kayno nir:

2«Noqa Ciro, Persia nacionpa mandaqnin rey karmi kayno nï: Jana patsacho kaykaq Tayta Diosmi lapan nacionkunata makïman churamushqa. Paymi nimashqa Judácho kaykaq Jerusaléncho templuta sharkatsipänäpaq.

3Tsaymi Tayta Diosman yärakuq runakunapita mayqanpis aywayta munaqkunata mandä Jerusalénman chayaykur Tayta Diospa templunta sharkatsipäkunanpaq. Payqa Israel runakunata kuyaq Dios kar Jerusalénchömi taykan. Aywapäkuptin mana kachaypa yanapaykulätsun.

4Tarkaykashqanpita Jerusalénman aywaqkunataqa quëdaq kaq Israel mayinkuna yanapatsun qellaywan, qoriwan, uywakunawan y ofrendakunawan. Tsayno yanapatsun Tayta Diospa templunta Jerusaléncho sharkatsipäkunanpaq».

5Rey Ciro nishqanno templuta sharkatsinanpaqmi wakin Israel runakunata Tayta Dios shakyätsirqan. Tsaymi Benjamín trïbupa y Judá trïbupa mandaqninkuna, cürakuna y levitakunapis Jerusalénman aywapäkurqan.

6Aywaptinmi lapan vecïnunkuna yanaparqan qellaywan, qoriwan, mikuykunawan, uywakunawan, chanin cuestaqkunawan y ofrendakunawanpis.

7Tsaynölami Tayta Diospa templunpita Nabucodonosor apakushqan manëjukunata rey Ciro entregarqan Jerusalénman kutitsinanpaq. Tsay manëjukunaqa Nabucodonosor adorashqan diosninkunapa templunchömi churaraykarqan.

8Jerusalénman kutitsipäkunanpaqmi rey Ciro entregarqan tesorëru Mitrídatesta. Paynami yupaparqan Sesbasarta. Sesbasarqa Judáman aywaqkunapa mandaqninmi karqan.

9Yupapashqan manëjukunami kayno karqan: qoripita kimsa chunka (30) tazonkuna, qellaypita waranqa (1,000) tazonkuna, ishkay chunka isqun (29) cuchillukuna,

10qoripita kimsa chunka (30) väsukuna, qellaypita chusku pachak chunka (410) väsukuna y waranqa (1,000) tukuy niraq manëjukuna.

11Qoripita y qellaypita chaskishqan lapan manëjukuna karqan pitsqa waranqa chusku pachakmi (5,400). Lapan tsaykunatami Israel mayinkunawan Babiloniapita Jerusalénman Sesbasar kutitsirqan.

Jump to: Chapter 2 →