Lamentations 1

Quechuan (Tayta Diospa Wilakuynin) 2003

Jump to: Chapter 2 →

1¡Wawalaw, Jerusalén marka! Tsaytsika runakuna qamcho tashqa kaptinpis ¡imanöpataq ushakashqanki! Nawpata maytsay markapita mas reqishqa karpis kananqa viüda warminömi kaykanki. Atska markakunapa mandaqnin reinano karpis kananqa ashmay warminömi rikakushqanki.

2Tsakaykunapapis fiyupa lakikushpayki iktsushqaykiyaqmi waqaykanki. Tsakalwaykipapis yakunöraqmi weqiki jutuykan. Shoqashunaykipaq kuyanakushqaykipis manami kantsu. Lapan yanasaykipis kananqa chikishunkimi.

3Judá runakunaqa contrankuna tsariptin manami ima ruraytapis kamäpakärishqatsu. Juk lädu nacionman apakuptinmi pasaypa nakarkaykan. Jäpa nacioncho prësu karmi jamaytapis mana taripäkuntsu.

4Tayta Diosta adorananpaq fiestakunamanpis mananami shapäkamunnatsu. Sión jirkanman aywaq nänikunapis lakikuypaq chunyaqmi rikakushqa. Markaman yaykuna punkukunachöpis manami pipis kannatsu. Cürakunapis waqarkaykanmi. Jipashkunapis lakikurkaykanmi. Maytsaychöpis waqarkaykanmi.

5Jerusalén markataqa pasaypa jutsata rurashqanpitami Tayta Dios castigashqa. Tsaymi contrankuna munaynincho tsararpaykan. Wamrankunatawan apashqa karmi contrankuna kushishqa karkaykan.

6Sión runakuna munayniyuq kashqanman atiënikushqanpis ushakashqanami. Mikanashqa luychu qewata ashiqnömi mandaqninkunapis karkaykan. Pasaypa janjampaykachaykarmi qatikachaqninkunapita qeshpirkaykan.

7Jerusalén marka, qamcho taq runakunata atacashqan höra manami pipis favornin sharkushqatsu. Lapan kachariykushuptikimi chikishuqnikikuna asikärishqa. Qamcho taq runakuna puntata rïcu kashqanta yarparmi juk lädu nacionchöna pasaypa lakikärin.

8Aläpa jutsata rurarmi Jerusalénqa impüru rikakushqa. Qarapächu warmino penqakuypaq kaykaqta rikarmi nawpata respitaq runakunapis kananqa manana respitapäkunnatsu. Tsayno ruraptinmi waqar penqaytukushqa uysuraykan.

9Warmipa killa qeshyan aywar träjin jananyaq ushmaptin jamurpaypaq kashqannömi Jerusalénpis jutsata rurashqanpita jamurpaypaq kaykan. Manami ichiklatapis yarpashqatsu kayno ushakänanpaq kashqanta. ¡Mana criyiypaqmi ushakashqa! ¡Manami pipis kuyapashqatsu! Pasaypa lakikurmi kayno nin: « Tayta Dios, conträkuna ushakätsimashqanpita lakikuykaptï kuyapaykalämay».

10Jerusalénpita imaykatapis alinnin kaqtaqa contrankunami apakushqa. Jäpa runakuna templuman mana yaykunanpaq Tayta Dios niykaptinpis lutalami yaykapäkushqa.

11Jerusalén runakuna waqaraykarmi mikuyta ashipäkushqa. Ukushninta watarkunalanpaqmi mikuyta tarinan kashqa lapan imaykankunatapis rantikärishqa. Tsayjinanpa nakarkaykaqta rikaykämarqa kuyapaykalämay, Tayta Dios.

12Jerusalén marka kaynömi nin: «Nänipa pasaqkuna, shumaq yarpachakäriy. Noqa nakaykashqäno ¿pilaqa nakaykantsuraq? Tayta Diosmi fiyupa rabyakushpan castigamashqa kayno nakanäpaq.

13«Paymi ciëlupita ninata kachamushqa tulüyaq rupamänanpaq. Mana pasanäpaqmi purinämanpis trancata churapämashqa. Kachariykamaptinmi pasaypa nakaykä.

14«Lasaq yügu matankächo wataraykaqnömi jutsata rurashqäkuna lasaykäman. Jutsata rurashqäpita kikin Tayta Dios castigamaptinmi kalpäpis mana kannatsu. Conträkunapa makinman kachariykamaptinmi imanöpa ichipaytapis mana kamäpakütsu.

15«Washämaq ali chölu runakunatapis lapantami Tayta Dios ushakätsishqa. Jäpa soldädukunata kachamurmi mözukunatapis wanutsir ushashqa. Vïnupaq üvata jaruqnömi runakunata Tayta Dios ushakätsishqa.

16«Waqaylawanmi nawïtapis oqraykäna. Shoqamänanpaq ni yanapamänanpaq manami pïnïpis kantsu. Conträkuna vincimashpanmi wamräkunatapis ushakätsishqa».

17Makilan choqpashqa Sión ruwakuptinpis manami pipis kuyapar yanapantsu. Tayta Diosmi kachashqa Jacobta vecïnunkuna ushakätsinanpaq. Manakaqmanmi Jerusalénta contrankuna churarkaykan.

18Jerusalén marka kaynömi nin: « Tayta Dios nimashqanta manami cäsukushqätsu. Tsaymi jutsata rurashqäman tupu castigamashqa. Maytsaycho taq runakuna, rikakäriy imano nakaykashqätapis. Mözukunata y jipashkunatapis prësumi apakärishqa.

19«Kuyanakushqä nacionkunatami yanapamänanpaq ruwakurqä. Yanapamänanpa trukan conträmi sharkapäkushqa. Cürakuna y mayor runakunapis nakarmi mikuyta ashir puripäkushqa. Mana tarirmi yarqaypita jinan markalacho wanushqa.

20« Tayta Dios, tsayjinanpa lakikuykaqta rikaykämarqa kuyapaykalämay. Pasaypa mana cäsukuq kashqäta yarpaptïmi shonqüpis kurun kurunyaykan. Marka waqtanchömi wamräkunata espädawan wanurkaykätsin. Marka rurinchöpis wanuylami kaykan.

21«Lakikur waqaykaqta mayaykämarpis manami pilapis shoqamantsu. Castigamashqaykita rikamarmi lapan conträkuna kushipaykäman. Noqata castigamashqaykinöla paykunatapis castigaykulay.

22«Conträkuna tsayjinanpa lutanta rurashqantapis rikaykulay. Jutsata rurashqäpita castigamashqaykino paykunatapis castigaykulay. Lakikuylawanmi shonqu nanaypis tsarikaykaman».

Jump to: Chapter 2 →