bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Luke 24
Luke 24
Quechuan (Tayta Diospa Wilakuynin) 2003
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
1
Semäna qalaykunan junaqmi Jesús pamparashqan kaqman tsaka tsakala warmikuna aywapäkurqan kamarikushqan ali asyaq jachakunata apakurkur. [Paykunawanmi wakin warmikunapis aywarqan.]
2
Chayaykurmi sepultüra tsaparaq rumi juk läduman wititsishqa kaykaqta taripäkurqan.
3
Ruriman yaykushpan Señor Jesúspa ayanta manami taripäkurqantsu.
4
Mantsakashqa karkaykaptinmi ishkay runakuna chipchipyaykaq röpan jatishqa nawpancho ichirpaykarqan.
5
Tsayta rikaykurmi fiyupa mantsakashpan urkunpis pampaman töpashqanyaq qonqurpakaykärirqan. Tsay runakunanami kayno nipäkurqan: «¿Imanirtaq kawaykaq runata ashirkaykanki wanushkuna pamparashqancho?
6
Manami kaychönatsu. ¡Kawarimushqanami! Yarpapäkuy Galileacho kayno nishushqaykita:
7
« Runapa Tsurintaqa jutsasapa runakunapa makinmanmi churapäkunqa. Crucificaypa wanutsishqanpita kimsa junaqtaqa kawarimunqami» ».
8
Tsayno niptinmi tsay warmikuna Jesús nishqanta yarparkärirqan.
9
Tsaypita kutiykärishpannami chunka juk apostolkunata y tsaycho kaq runakunata wilapäkurqan imata rikashqanta y imata mayashqantapis.
10
Tsay warmikunaqa karqan María Magdalena, Juana, Santiagupa maman María y wakin warmikunami.
11
Warmikuna tsayno wilapäkuptinpis lutanta parlaykashqanta yarparmi mana criyipäkurqantsu.
12
Wakin mana criyiptinpis Pedrumi itsanqa Jesús pamparashqanman warakayla aywarqan. Uchkuta watqaykurmi säbanaslatana rikar mantsakashqa kutikurqan.
13
Tsay junaqmi Jesúspa ishkay qatiraqninkuna aywaykarqan Emaús markaman. Emaús karqan Jerusalénpita ishkay lëwanölami.
14
Paykunaqa Jerusaléncho lapan pasashqankunata parlarmi aywarkaykarqan.
15
Tsayno aywarkaykaptinmi Jesús yuriparkur paykunawan aywarqan.
16
Rikaykarpis Tayta Dios mana permitiptinmi Jesús kashqanta mana reqipäkurqantsu.
17
Tsawraqa Jesús kayno nir tapurqan: «¿Imata parlartaq aywarkaykanki?» Tsayno niptin aywaykashqancho lakishqa ichiykärirqan.
18
Tsawraqa Cleofas jutiyuq runa kayno nirqan: « Pascuaman shamuqkunaqa lapanmi musyapäkun Jerusaléncho ima pasashqantapis. ¿Qamqa manaku musyanki?»
19
Tsayno niptinmi Jesús kayno tapurqan: «¿Imataq kashqaqa?» Tsayno tapuptin kayno nipäkurqan: «Nazaretpita kaq Jesúsmi Tayta Diospa profëtan karqan. Paymi Tayta Diospa munayninwan milagrukunata rurashpan lapan runakunata Diospa wilakuyninta wilaparqan.
20
Paytami mandaq cürakuna y autoridänintsikuna Pilatuman apaptin crucificaypa wanutsipäkushqa.
21
Noqakuna yarpapäkurqä chikimaqnintsipa munayninpita jorqamänantsipaq kashqantami. Kananwanqa kimsa junaqnami payta wanutsipäkushqan.
22
Tsaynöpis manami tsaylatsu kaykan. Noqakunata yanapamaq warmikunami mana criyiypaq kaqta wilapäkamashqa. Kanan tuta tsaka tsakala Jesús pamparashqanman aywarshi
23
ayanta mana tarishqatsu. Tsaychöshi angilkuna yuriparkur Jesús kawarimushqanta wilapäkushqa. Tsaykunatami kutiykamur wilapäkamashqa.
24
Tsaymi wakin kaq discïpulunkunapis pamparashqan kaqman aywar warmikuna wilakushqannöla Jesúspa ayanta mana taripäkushqatsu».
25
Tsaymi Jesús kayno nirqan: «¿Imanirtaq mana tantiyapäkunkitsu? Profëtakuna wilakushqanta ¿imanirtaq criyipäkunkitsu?
26
¿Manaku musyapäkunki Cristuqa wanurkurraq lapanpaq munayniyuq kananpaq kashqanta?»
27
Tsayno nishpanmi Moisés qelqashqanpita qalaykur profëtakuna qelqashqanyaq paykunata tantiyatsirqan Cristupaq imata nishqantapis.
28
Emaús markaman chayaykaptinnami paykunapita Jesús pasaq tukurqan.
29
Tsaymi ruwapäkurqan kayno nir: «Patsa tsakaykannami. Kaylachöna patsakärishun». Tsayno niptinmi paykunawan patsakunanpaq markaman yaykupäkurqan.
30
Tsaypita mësaman jamaykurnami tantata aptarkur Tayta Diosta yusulpäki nirqan. Nirkurna tantata pakirkur paykunata aypurqan.
31
Tsay hörami Jesús kashqanta tantiyapäkurqan. Tsaypitanami elqakäkurqan.
32
Tsawraqa kikinpura parlar kayno nipäkurqan: «¡Jesús kaptinchari Tayta Diospa palabranta parlapämaptintsi nänicho shonquntsipis atsikyarqan!»
33
Tsawraqa jinan höra Jerusalénman kutikärirqan. Chayaykurnami taripäkurqan chunka juk apostolkunawan wakin runakunapis karkaykaqta.
34
Tsaycho juntakashqa kaykaq runakunami kayno nipäkurqan: «¡Rasunpami Señor Jesús kawarimushqa! ¡Simóntapis yuripashqami!»
35
Tsayno niptinnami Emaúspita kutiqkunapis wilaparqan nänicho ima pasashqanta y tantata pakishqan höra Jesústa reqirkärishqanta.
36
Tsayno parlarkaykaptinmi paykunapa chawpincho Jesús yuriparkur kayno nirqan: «Ali kaway qamkunacho kaykulätsun».
37
Tsayno yurirkuptinmi alma kashqanta yarpashpan fiyupa mantsakarqan.
38
Tsawraqa Jesús kayno nirqan: «¿Imanirtaq mantsakashqa karkaykanki? ¿Imanirtaq noqa kashqäta mana criyipäkunkitsu?
39
Makïta chakïta rikapäkuy. ¡Noqami kaykä! ¡Yatapäkamay! Rikamashqaykinöpis manami almatsu kaykä. Almaqa aytsaynaq y tuluynaqmi».
40
Tsayno nirmi makinta y chakinta rikatsirqan.
41
Rikaykarpis pasaypa kushikushpanpis manami criyipäkurqanraqtsu pay kashqanta. Tsaymi Jesús kayno tapurqan: «¿Imalapis kaykanku mikurkunäpaq?»
42
Tsayno niptinmi qararqan juk pedäzu kankashqa pescäduta [y abëjapa mishkinta].
43
Tsay qarashqantami lapanpa nawpancho mikurqan.
44
Mikurkurnami kayno nirqan: « Moisés qelqashqan leykunacho, profëtakuna qelqashqancho y salmukunachömi noqata pasamänanpaq kaqkuna qelqaraykan. Qamkunawan kaykarmi wilarqä qelqaraykashqannöla lapanpis cumplikänanpaq kashqanta. Tsay wilashqänölami pasamashqa».
45
Nirkurmi Tayta Diospa palabranta tantiyatsir
46
kayno nirqan: «Diospa palabranmi niykan Cristo nakar wanunanpaq kashqanta y kimsa junaqta kawarimunanpaq kashqanta.
47
Tsaynöpis niykan Jerusalénpita qalaykur lapan markakunacho wilakärinanpaq kashqanta y paypa jutincho wilakuptin runakuna jutsa rurashqankunata kacharir perdonashqana kananpaq kashqantami.
48
Lapan pasamashqankunata rikashqa karmi wilakärinaykipaq testïgu karkaykanki.
49
Qamkunamanmi kachamushaq Taytä promitishqan Espíritu Santuta. Itsanqa Jerusalénlachöraq shuyarpaykay munayninta chaskinaykiyaq».
50
Tsaypitanami discïpulunkunata Jesús pusharqan Betaniaman. Tsaychönami makinta joqarkur paykunapaq Tayta Diosta manakurqan.
51
Tsayno manakuykaptinmi gloriamanna Tayta Dios shuntakurqan.
52
Tsaycho discïpulukuna Jesústa adorarkurmi Jerusalénman kushishqala kutikärirqan.
53
Tsaypitanami Tayta Diosta alabananpaq waran waran templuman juntakaq. [Amén.]
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24