bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Mark 6
Mark 6
Quechuan (Tayta Diospa Wilakuynin) 2003
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 7 →
1
Tsaypitanami Nazaret markanman discïpulunkunawan Jesús aywapäkurqan.
2
Jamay junaq kaptinmi sinagögacho yachatsirqan. Tsaycho yachatsiptinmi runakuna mantsakashqa kayno nipäkurqan: «Tsayno yachatsinanpaq ¿maychöraq yachakamushqa? Tsaynöpis ¿imanöparaq milagrukunata ruran?
3
¿Manaku payqa carpintëru? Mamanpis ¿manaku María? Wawqinkunapis ¿manaku Santiago, José, Judas y Simón? Paninkunapis ¿manaku kay markacho tarkaykan?» Tsayno nirmi Jesús yachatsishqankunata mana chaskipäkurqantsu.
4
Tsaymi Jesús kayno nirqan: «Wakin markakunacho profëtata chaskikuptinpis aylunkuna y marka mayinkunaqa manami chaskikärintsu».
5
Tsayno mana chaskikäriptinmi ima milagrutapis tsay markacho mana rurarqantsu. Tsaypa trukanqa juk ishkay qeshyaqkunalatami yataykushpan aliyätsirqan.
6
Marka mayinkuna payman mana yärakuptinmi Jesús fiyupa lakikurqan. Tsaypitanami markakunapapis jalqakunapapis runakunata yachatsiraykar Jesús purirqan.
7
Tsayno purirmi chunka ishkay discïpulunkunata qayaykur munayninta qorqan runakunapita supaykunata qarqunanpaq. Nirkurmi ali wilakuyninta wilakuq aywapäkunanpaq ishkay ishkay kacharqan.
8
Kacharmi kayno nirqan: «Tukrulata apapäkunki. Qepita, mirkapata y qellaytapis ama apapäkunkitsu.
9
Jatirashqayki lanqilawan aywapäkunki. Trukakunaykipaq röpatapis ama apapäkunkitsu.
10
«Pipa wayinman patsakurpis juk markaman pasanaykiyaq tsaylacho patsarpanki.
11
Wilakushqaykita mana chaskishuptikiqa chakikicho kaykaq polvuta tapshiriykur aywakärinki. Tsayno rurapäkunki Tayta Dios castigananpaq kashqanta tantiyakärinanpaq. [Rasunpami kayno nï: Juiciu final junaqchöqa Sodomacho y Gomorracho taq runakunata castigashqanpitapis mas peormi tsay runakunata Tayta Dios castiganqa]».
12
Tsayno niptinmi discïpulunkuna aywar wilakärirqan jutsa ruraykunata kacharir Tayta Dios munashqannöna kawapäkunanpaq.
13
Tsaynölami supaykunatapis runakunapita qarqurqan. Qeshyaykaqkunatapis aceitita winapar atskaqtami aliyätsirqan.
14
Jesús rurashqankunata maytsaychöpis parlaptinmi rey Herodespis musyarqan. Wakin runakunami Jesúspita kayno nipäkurqan: «Tsay runaqa Bautizaq Juanmi kawarimushqa kanqa. Tsaymi munayniyuq kaykan milagrukunata rurananpaq».
15
Wakinmi nipäkurqan profëta Elías kashqanta. Wakinnami nipäkurqan unay profëtakunano profëta kashqanta.
16
Tsayno parlapäkushqanta mayarmi rey Herodes kayno nirqan: «Umanta roqutsishqä Juanmi kawarimushqa kanqa».
17
Nawpatami Juanta Herodes prësu tsaritsir cadinawan watarkur carcilman wichqatsishqa karqan. Tsayno rurarqan Herodías jutiyuq warmi manakuptinmi. Herodías karqan Herodespa wawqin Felipipa warminmi. Herodíasta Herodes warminpaq apashqa kaptinmi
18
Juan kayno nirqan: «Wawqikipa warminta tsararashpayki jutsatami ruraykanki».
19
Tsayno nishqanpitami Herodías nanaparar Juanta wanutsiyta munarqan. Munarpis Juanta Herodes respitaptinmi mana kamäpakurqantsu.
20
Juanta tsayno respitarqan Dios munashqanno kawar santu runa kashqanta musyarmi. Diospa wilakuyninta Juan wilapaptinmi kushishqa mayarpis ima ruraytapis mana kamäpakurqantsu.
21
Tsaypita Herodespa diyancho fiestata rurarmi qayatsirqan autoridäkunata, soldädukunapa mas mandaqninkunata y Galileacho taq rïcu runakunatapis.
22
Tsaycho karkaykaptinmi Herodíaspa jipash wawan yaykurir qatswarqan. Tsayta rikarmi Herodes y qayatsishqan runakunapis pasaypa kushikärirqan. Tsaymi jipashta rey Herodes kayno nirqan: «Manakamay imata munashqaykitapis. Nimashqaykitami qoykushayki».
23
Tsaypitanami jurashpan kayno nirqan: « «Mandashqayki nacionta pulanta rakipaykamay» nimaptikipis rakipäshaykimi».
24
Tsayno niptinmi maman kaqman tsay jipash aywaykur tapurqan kayno nir: «¿Imatataq manaküman, mamá?» Tsaymi maman kayno nirqan: «Bautizaq Juanpa umanta qoshunaykipaq niy».
25
Maman tsayno yätsiptinmi rey kaqman kutiykur kayno nirqan: «Noqa munä kanan höra Bautizaq Juanpa umanta plätucho qomänaykitami».
26
Tsayta manakuptinmi rey Herodes fiyupa lakikurqan. Tsayno kaptinpis qayatsishqankunapa nawpancho jurashqa karmi ñëgayta kamäpakurqantsu.
27
Tsaymi jinan höra wardiata kacharqan Juanpa umanta apamunanpaq. Nishqannölami carcilman aywaykur Juanpa umanta roquriykur
28
jipashta plätuwan ayaparkurqan. Chaskirkurnami jipashqa mamanta ayaparqan.
29
Tsayno rurashqanta mayaykurmi Juanpa discïpulunkuna ayanta shuntarkur pampapäkurqan.
30
Wilakushqanpita apostolkuna kutiykamurmi lapan rurashqanta y yachatsishqanta Jesústa wilaparqan.
31
Atska runakuna juntapaptinmi mikupäkunanpaqpis tiempun mana karqantsu. Tsaymi apostolninkunata Jesús kayno nirqan: «Aku aywashun chunyaqninman tsaycho jamapänantsipaq».
32
Tsayno nirmi büquiman witsarkur apostolninkunawan chunyaqninman aywapäkurqan.
33
Maypa aywashqantapis runakuna rikarmi markakunapita jukla aywar Jesúspita mas puntata chayarqan.
34
Büquipita urarpurnami Jesús tarirqan atska runakuna shuyarpaykaqta. Mitsiqniynaq uyshakunano kaykaqta rikarmi kuyapashpan tukuynöpa yachatsirqan.
35
Tardiyaptinnami discïpulunkuna Jesús kaqman aywaykur kayno nipäkurqan: «Chunyaqchömi kaykantsi. Patsapis tardiyaykannami.
36
Runakunata niykuy markakunapa aywar mikuyninkuna rantipäkamunanpaq. [Kaychöqa manami imapis kantsu mikupäkunanpaq]».
37
Tsawraqa Jesús kayno nirqan: «Qamkuna mikuyta qarapäkuy». Tsayno niptinmi kayno nipäkurqan: «¿Noqakuna tanta rantimuq aywanätaku munaykanki? Kaytsika runakunapaqqa ishkay pachak (200) jornalpa chanin imaraqchari aypanqa».
38
Tsaymi Jesús kayno nirqan: «¿Ayka tantataq kaykan? Mä rikamuy». Rikaykamurmi kayno nipäkurqan: «Kaykan pitsqa tanta y ishkay pescädulami».
39
Niptinmi discïpulunkunata Jesús nirqan runakunata grüpu grüpu pashpaman jamatsipäkunanpaq.
40
Tsayno niptinmi pachak kama (100) pitsqa chunka kama (50) jamatsipäkurqan.
41
Tsaypitanami pitsqa tantata y ishkay pescäduta aptarkur jana patsata rikärishpan Tayta Diosta Jesús yusulpäki nirqan. Tantata pakirirnami discïpulunkunata makyarqan runakunata aypupäkunanpaq. Tsaynölami lapan mikupäkunanpaq ishkay pescädutapis makyarqan.
42
Saksashqanyaq mikurkuptinnami
43
putsushqa tantata y pescäduta chunka ishkay canasta juntata shuntapäkurqan.
44
Tsaycho mikuqkuna karqan pitsqa waranqa (5,000) runakunami.
45
Tsaypitanami discïpulunkunata Jesús nirqan büquiman witsarkur Betsaida markaman nawpapäkunanpaq. Nirkurnami tsaycho kaq runakunata despacharkur
46
jirkaman witsarqan Tayta Diosta manakunanpaq.
47
Patsa tsakarkuptinnami discïpulunkuna büquiwan karutana aywarkaykarqan. Tsayyaqqa jirkalachöraqmi Jesús japalan kaykarqan.
48
Tsaypitami rikarqan wayra kutitsimuptin büquiwan discïpulunkuna nakarkaykaqta. Patsa waraykaptinnami discïpulunkuna kaqman yaku jananpa Jesús aywarqan. Büqui nawpanpa pasaq tukuykaqta
49
rikaykurmi discïpulunkuna alma kashqanta yarpashpan fiyupa mantsakar qaparparqan.
50
Tsaymi Jesús kayno nirqan: «¡Noqami kaykä! ¡Ama mantsakamaytsu!»
51
Tsayno nir büquiman witsarkuptinmi wayrapis jukla chawarqan. Tsaykunata rikarmi discïpulunkuna pasaypa mantsakashqa yarpachakurqan.
52
Tsaytsika runakunata qarananpaq milagruta rurashqanta rikarpis shonqunkuna chukruyashqa kaptinmi mana tantiyakärirqantsu Jesús munayniyuq kashqanta.
53
Qochata tsimparkurnami Genesaret pampaman chayaykur büquita watarqan.
54
Büquipita urarkuptinnami runakuna Jesústa reqirkur
55
maytsaypapis warakayla aywar Jesús tsaycho kashqanta wilapäkurqan. Tsayta musyaykurmi maytsaypitapis qeshyaqkunata kirmawan apapäkamurqan.
56
Tsaypita markakunapa y jalqakunapapis Jesús puriptinmi nänimanpis qeshyaqkunata apapäkurqan. Tsaypa pasaptinmi ruwakärirqan qeshyaqninkuna röpanpa kuchulantapis yataykunanpaq. Tsaychömi lapanpis yataq kaqqa aliyarqan.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 7 →
All chapters:
1
2
3
4
5
6
7
8
9
10
11
12
13
14
15
16