Zechariah 7

Quechuan (Tayta Diospa Wilakuynin) 2003

← Chapter 6 Jump to: Chapter 8 →

1Rey Darío chusku wata mandaq kaykaptinmi profëta Zacaríasta Tayta Dios yapay parlaparqan. Tsay karqan isqun kaq killacho chusku kaq junaqmi. Isqun kaq killapa jutinmi karqan Quisleu.

2Tsay witsanmi Bet-el runakuna Sarezerta, Regem-melecta y wakin runakunatapis kachakärirqan Tayta Diosta manakunanpaq.

3Tsaymi lapanta mandaq Tayta Diospa templunman chayaykur cürakunata y profëtakunata tapukärirqan kayno nir: «Pitsqa kaq killacho atska watanami waqar ayunapäkü. ¿Tsaynölaku cadala ayunapäkushaq?»

4Tsayno tapukuptinmi wilapänäpaq lapanta mandaq Tayta Dios kayno nimarqan:

5«Judácho taykaq lapan runakunata y cürakunata kayno ninki: «Qamkuna qanchis chunka (70) watantin pitsqa kaq y qanchis kaq killacho ayunar waqashpayki ¿munashqänötsuraq ayunashqanki?

6Tsaynölami adoramänayki fiestachöpis pachayki saksashqa kanalanpaq mikupäkunki y upupäkunki.

7Unay ayluykikunapis qamkunano kashqantami profëtäkunawan wilakatsirqä. Tsay witsanmi Jerusalénta manaraq ushakätsiptin ali kawapäkurqan. Nawpancho kaq markakunachöpis runakuna juntami tarqan. Tsaynölami Neguevcho y Sefelacho taq runakunapis junta tarkaykarqan» ».

8Mastapis profëta Zacaríasta Tayta Dios kayno nirqan:

9«Lapanta mandaq Tayta Dios karmi kayno nï: «Runa mayikita juzgarqa pitapis mana jananpaypa juzgapäkunki. Jukniki juknikipis kuyapänakunki.

10Viüdakunata, waktsakunata, juk lädu nación runakunata ni pobrikunatapis ama nakatsipäkuytsu. Runa mayikipa contran ama imatapis yarpapäkuytsu.

11« «Profëtäkunawan tsayno wilakaykätsiptïpis unay ayluykikunaqa manami cäsukamarqantsu. Tsaypa trukanqa mana mayamänanpaq rinrinta tsapakurkurmi juk lädupa tikrakurkurqan.

12Diamanti rumino chukru kananpaqmi shonquntapis chukruyätsirqan. Tsayno rurapäkurqan unay profëtakuna wilakärishqan leynïkunata y yachatsishqäkunata wiyakuyta mana munarmi. Profëtakuna wilakärinanpaq Espïritümi tantiyatsirqan. Tsayno kaptinpis mana cäsukäriptinmi pasaypa rabyakurqä.

13Tsaymi paykuna mana cäsumashqannöla noqapis paykunata mana cäsupashqätsu. Lapanta mandaq Tayta Dios karmi tsayno nï.

14Tsawraqa shukukuy wayra matsipa matsir apaqnömi wakpa kaypa paykunata mashtakätsishqä mana reqishqan nacionkunaman. Puntata tashqan nacionpis chunyaq rikakuptinmi runakuna tsaypa mana pasarqannatsu. Tsaymi kuyaylapaq nacionnincho pipis mana tarqannatsu» ».

← Chapter 6 Jump to: Chapter 8 →