2 Timothy 4

Quechuan QXO (Biblia en Quechua del sur de Conchucos)

← Chapter 3 Jump to:

1Tayta Diospa jutinchö y kawaqkunata wanushqakunata juzgaq [Señor] Jesucristupa jutinchömi qamta nï:

2Criyikuyänan y mana criyikuyänan kaptinpis Tayta Diospa palabranta imaypis willakuy. Mana ajayaypa shumaq tantiyatsiy, yätsiy y animatsiy.

3Shamuq watakunachö Jesucristupa willakuyninta manam wiyayta munayanqanatsu. Tsaypa rantinqa llutan yachatsikuqkunata ashirmi paykuna yachatsiyanqallanta wiyayta munayanqa.

4Manakaqkunallata wiyayta munarmi rasun kaq yachatsikuyta cäsukuyanqatsu.

5Peru qamqa Tayta Dios munanqannö kawanaykipä shumaq tantiyakuy. Imanö ñakarpis payman yärakuy. Willakuyninta pïmaytapis willay. Mana qelanaypa Tayta Diosta sirviy.

6Noqaqa wanunäpänam kaykä. Sacrificiuman jichanqan vïnu altarchö ushakanqannömi noqapis ushakänäpäna kaykä.

7Alli soldädunömi llapanta cumplirqü. Imayka llallinakur cörriqnömi chänäpä kaqman charqü. Yärakunqänöllam mana dëjaypa imaypis criyikurqü.

8Tsaymi kananqa shuyaraykä alli juzgaq juez Señor Jesucristo kutimunan junaq corönata entregamänanpä kanqanta. Tsay corönaqa paypa puntanchö jutsaynaqta chaskimanqanmi. Manam noqallatsu corönata chaskishä, sinöqa Jesucristuta llapan shuyaqkunam chaskiyanqa.

9Timoteo, tinkunantsikpä jinallachö shamuy.

10Wawqintsik Demasmi kikin munanqannö kawayta munar jaqiramar Tesalónica markaman aywashqa. Crescentitam mandarqü Galacia provinciaman, Titutanam Dalmacia markaman.

11Lucasllanam noqawan kaykan. Shamurqa Marcusta pushamunki. Payqa Tayta Diospa willakuyninta willakuptï allim yanapamanqa.

12Wawqintsik Tíquicutanam Éfesuman mandaykämü.

13Troaschömi Carpupa wayinchö capötïta jaqimurqä. Shamurqa capötïtapis librükunatapis apakarkamunki. Mana qonqaypa pergamïnükunatapis apakarkamunki.

14Herrëru Alejandrum pasaypa conträ tikrashqa. Tsaynö kanqanpitam Señor Jesucristo juzganqa.

15Alejandrupitaqa qampis cuidakuy. Willakunqantsik mana alli kanqantam pitapis nin.

16Autoridäkunachö puntata declaraptï manam pipis janä shärishqatsu. Llapanmi kikilläta jaqiyämashqa. Tsaynö rurayämanqanpita Tayta Dios perdonaykullätsun.

17Paykuna jaqiyämaptinpis Tayta Diosqa noqawan kaykarmi valuratsimashqa. Tsaymi mana Israel autoridäkunapa puntanchöpis alli willakuyninta willakunäpä yanapamashqa. Wanutsiyämänanpä kanqanpitam leonpa shiminpitanöpis Tayta Dios salvamashqa.

18Tsaynöllam llapan mana allikunapitapis salvamanqa. Tsaypitanam mandakuyninchö imayyaqpis kawanäpä pushamanqa. ¡Tayta Dios imaypis alabashqa kaykullätsun! Amén.

19Priscilatawan Aquilata saludaykullay. Onesíforupa castantapis saludaykullay.

20Erastum Corintuchö quëdamushqa. Trófimutanam Miletuchö qeshyaykaqta jaqimurqä.

21Tamya killa manarä chämunqanyaq imaykatapis dëjaskir shamunki. Eubulo, Pudente, Lino, Claudia y wakin wawqikuna y panikunam saludayämushunki.

22Señor Jesucristo imachöpis yanapaykulläshuy. Tsaychö kaqkunata llapaykita kuyapaykuyälläshuy. [Amén.]

← Chapter 3 Jump to: