Colossians 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Jesucristuwan kawamushqana kaykarqa gloriachö kaqkunata ashiyay. Tsaychöqa Tayta Diospa derëcha kaq lädunchömi Jesucristo jamaraykan.

2Kay patsallachö kawayänaykipä yarpachakuyänaykipa rantinqa gloriachö kawayänaykipä yarpachakuyay.

3Qamkunaqa jutsa ruraypä wanushqana karmi Jesucristuwan Tayta Diospa puntanchö kawaykäyanki. Tsaynö kawayanqaykita runakuna kanan mana rikarpis

4kawayta qaramaqnintsik Jesucristo kutimuptinmi qamkunapis paywan gloriachö kayanki.

5Tsaynö kaykaptinqa jutsata mana ruraypa kawayay. Fornicación jutsata ama rurayaytsu ni shonquykikuna mana allikunata munanqanta ama rurayaytsu. Rïcuyayllapä ama yarpäyaytsu. Rïcuyayllapä yarparqa ïdulukunata adoraqnömi kaykäyanki.

6Tsaynö jutsa ruraqkunataqa Tayta Diosmi rabyarnin castiganqa.

7Qamkunapis ñöpataqa tsaynömi kawayarqayki.

8Peru kananqa ama pitapis rabyapäyaytsu, ajapäyaytsu ni chikiyaytsu. Ama pipa wasantapis rimayaytsu ni manakaqkunata parlayaytsu.

9Tsaynölla jukniki jukniki amana llullapänakuyaytsu. Makwa röpata jitariqnö unay kawayanqaykita dëjaskir

10pay qarayäshunqayki mushuq kawaytana kawayay. Mushuq kawayta chaskikuyaptikim kamamaqnintsik Tayta Dios qoyay qoyay tantiyaykätsishunki pay kanqannö kayänaykipä.

11Tsaymi Israel runa o mana Israel runa karpis, señalashqa o señalanni karpis, mana yachaq karpis, jäpa karpis, esclävu o libri karpis Jesucristuman criyikurqa llapantsikpis paypa poderninchöna kawaykantsik.

12Tayta Dios akranqan y kuyanqan santu runakuna kaykarqa jukniki juknikipis kuyapänakur kawayay. Tsaynölla yanapanakuyay, mana yachaq tukur kawayay, pïmaypäpis alli shonqu kayay y pacienciakuyay.

13Imallapitapis rabyayänaykipa rantinqa awantakuyay. Qallayätsinakurqa perdonanakuyay. Jesucristo perdonashunqaykinölla qamkunapis perdonanakuyay.

14Imanö karpis kuyanakur jukniki juknikipis juk shonqulla kawayay.

15Jesucristupita alli kawayta chaskishqa kaykarqa pïmaywanpis shumaq kawayay. Juk shonqulla kawayänaykipämi Tayta Dios qayayäshurquyki. Tsaynölla Tayta Diosta imaypis agradëcikuyay.

16Jesucristupa alli willakuyninta imaypis yarparäyay. Tsay willakuyninta shumaq tantiyakur yachatsinakuyay y cäsukuyänaykipä valuratsinakuyay. Salmukunata, cantukunata y cörukunata cantar llapan shonquykikunawan agradëcikur Tayta Diosta alabayay.

17Imata rurarpis y imata parlarpis Señor Jesucristupa jutinchö rurayanki y parlayanki. Jesucristo salvayäshunqaykipita Tayta Diosta imaypis agradëcikuyay.

18Warmikuna, Señor Jesucristuta chaskishqana kaykarqa runaykikunata cäsuyay.

19Ollqukuna, warmikikunata kuyayay. Ollqu tupänaykipa rantinqa alli shimillaykikunapa tantiyatsiyay.

20Wamrakuna, mamaykita y papänikita imaypis cäsuyay. Tsaynö cäsuyänaykitam Señor Jesucristo munan.

21Wamrayuqkuna, wamraykikuna mana qallayäyänanpä llutallaqa ama ollqutupäyaytsu.

22Esclävukuna, kay patsachö kaq patronnikikuna mandayäshunqaykita rurayay. Rikayäshunqayki hörallaqa ama aruq tukuyaytsu, sinöqa Tayta Diosta mantsapakur llapan voluntänikikunawan aruyay.

23Imata rurarpis runakunata sirviqnöqa ama rurayaytsu, sinöqa Señor Jesucristuta sirviqnö llapan shonquykikunawan kushishqa rurayay.

24Musyayankim Señor Jesucristupita gloriachö herenciata chaskiyänaykipä kanqanta. Señor Jesucristum rasunpa patronniki kaykan.

25Mana alli ruraqkunataqa pï kaptinpis mana kuyapaypam Tayta Dios castiganqa.

← Chapter 2 Jump to: Chapter 4 →