Joel 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Tayta Dios juzganan junaq chaykämunnam. Judáchö täraqkuna, llapayki mantsarirnin tsuktsukyäyay. Pïmaypis musyananpä sagrädu Sión jirkanchö cornëtata tukayay.

2Tsay junaqmi patsa tsakaskinqa. Pukutaypis chipyaqmi tsapaskinqa. Patsa waraptin jirkakunapa rupay ñawïmunqannömi atskaq soldädukuna shayämunqa. Tsaynöqa manam imaypis kashqatsu ni imaypis kanqatsu.

3Imatapis tarinqan kaqta nina ushaqnömi llapantapis ushayanqa. Atacayänanpä manarä chämuptin Edén jardinnömi llapanpis kuyayllapä kanqa. Peru päsaskiyaptinmi sïqa tsunyaykar quëdanqa. Manam imapis tsay soldädukunapita qeshpinqatsu.

4Guërra caballukunanömi mantsaypä kayanqa. Caballuta muntarkur cörriq soldädukunanömi cörriyanqa.

5Guërra carrëtakuna illaqpita puntapa tumamur büllata rurayanqannömi pasaypa büllata rurayanqa. Usya tiempuchö muntita nina lunyaypa lunyar ushaqnömi qayaräyanqa. Guërraman atskaq soldädukuna atacayänanpä listu aywayanqannömi aywayanqa.

6Tsayta rikaykurmi runakuna pasaypa mantsarir cärankunapis yuraqashqa kayanqa.

7Atacaqkunaqa alli chölu karmi mana mantsariypa cörrir marka murälla jananman yarkuyanqa. Llapanmi fïlayllapa y maypapis mana yaqayllapa aywayanqa.

8Mana kumanakuypam llapanpis aywayanqallanpa aywayanqa. Paykunata flëchayaptinpis mana qeshpiypam yaykuyanqa.

9Markakunamanpis mana mantsaypam yaykuyanqa. Murälla jananpam cörriyanqa. Achpaypam wayikunamanpis yarkuyanqa. Ventänapapis suwakunanömi yaykuyanqa.

10Kay patsapis pasaypam mantsakanqa. Ciëlupis tsuktsukyanqam. Rupaypis y killapis tsakanqam. Estrëllakunapis manam atsikyäyanqanatsu.

11Tsay atacaqkunapa puntantam Tayta Dios aywanqa. Atacayänanpä mandaptin maqakuynörämi wiyakanqa. Ninqanta ruraqkunaqa yupaytapis mana atipaypämi kayanqa. Paykunaqa ishniyparämi aywayanqa. Tayta Dios juzganan junaq pasaypa mantsaypämi kanqa. Tsaytaqa manam pipis awantanqatsu.

12Peru Tayta Diosmi nin: «Llapan shonquykikunawan perdonta mañakamar noqaman kutiyämuy. Jutsayuq kayanqaykipita llakikurnin ayunar waqayay».

13Jutsaykikunapita llakikur röpaykikunata rachiyänaykipa rantin jutsaykikunata dëjayay. Llapan shonquykikunawan kuyashuqniki Tayta Diosnintsik munanqannö kawayay. Payqa kuyapäkuq y perdonakuqmi. Imapitapis manam ras rabyakuntsu. Perdonarqa manam castigayäshunkinatsu.

14Capazchi castigayäshunaykipa rantin bendicionta qarayäshunkiman. Tsaynöpam Tayta Diosnintsikta agradëcikur tsaki mikuy ofrendatapis vïnutapis apayanki.

15Sión jirkanchö cornëtata tukayay. Llapaykikuna willanakuyay qorikaykur ayunayänaykipä.

16Purificakuyänaykipä llapaykikuna qorikäyay. Rukupis wamrapis llapaykikuna aywayay. Llullukunatapis apayay. Tsayrä casarashqakunapis punuyanqaykipita yarqur ayunaq aywayay.

17Tayta Diosta sirviq sacerdötikuna, altar kaqchö waqayay. Tayta Diosta mañakur niyay: «Taytay, kuyanqayki runakunata perdonaykullay. Ama dëjaykullaytsu juklä nación runakuna poderninchö katsiyämar manakaqman churayämänanta. Ama dëjaykullaytsu qamman mana yärakamuq runakuna asipäyämar «¿maychötä Diosnin kaykan?» niyämänanta».

18Tsaynö mañakushqaqa kuyapäkuq karmi Tayta Dios perdonamäshun.

19Tsaymi nimäshun: «Pacha junta kayänaykipämi trïgutapis, vïnutapis y aceititapis alistapäshayki. Mana yärakamaqkuna manakaqman churayäshunaykipä manam dëjayäshaykinatsu.

20Norti kaq lädupita shamuqkunataqa desiertumanmi qarqushä. Puntanta aywaqkunatam Kachi Lamarman jitashä. Qepanta aywaqkunatanam Mediterráneo Lamarman jitashä. Tsaychömi llapanpis ismur pasaypa asyäyanqa. Tsaynö ruraptïmi mantsariypä kanqa.

21«Israel runakuna, ama mantsakäyaytsu. Favorniki shärinäpä kaykaptinqa kushikuyay.

22Jirka ashmakuna, ama mantsayaytsu. Qewapis lloqlluyparämi wiñamunqa. Früta muntikunapis wayunqam. Hïguspis üvapis alläpam wayunqa.

23Siónchö täraqkuna, noqaman yärakamur kushikuyay. Unaynömi punta tamyata y qepa tamyata tiempullanchö tamyatsimushä.

24Tsaymi trïgutapis atskata cosechayanki. Vïnupis aceitipis atskam kanqa.

25«Mandamunqä chukllushkuna wata wata ushayanqanpitam aruyanqaykiman bendicionnïta churamushä.

26Mikuynikikunapis sobray sobraymi kanqa. Qamkunata yanaparmi kushikuypä kaqkunata rurashä. Tsaymi llapan shonquykikunawan kushishqa alabayämanki. Manam imaypis yapay penqakuyman churayäshaykinatsu.

27Tsaymi tantiyayanki qamkunawan kaykanqäta. Tsaynöllam musyayanki Tayta Diosniki kanqäta. Noqapita masqa manam juk Dios kantsu. Kanan kayanqaykinöqa manam penqakuychö yapay kayankinatsu».

28«Tsaypitanam Espïritüta llapan runakunaman mandamushä. Tsaymi ollqu tsurikikuna y warmi tsurikikunapis willakuynïta willakuyanqa. Rukukunatapis sueñuyninkunachömi musyatsishä. Jövinkunapis revelaciontam rikayanqa.

29Tsay junaqkunam ollqu y warmi sirvimaqnïkunamanpis Espïritüta mandamushä.

30Imaypis mana rikayanqaykikunatam ciëluchö y kay patsachöpis rikakätsimushä. Yawartapis, ninatapis y ichiraykaq qoshnitapis rikayankim.

31Rupaypis tsakanqam. Killapis yawarmanmi tikranqa. Tsaykuna kanqa juzganä junaq manarä chämuptinmi. Tsay junaqqa mantsariypämi kanqa.

32Tsaynö kaptinpis noqata mañakamaq kaqtaqa pïmaytapis salvashämi. Awninqänöllam Sión jirkanchö kaykaq Jerusalénchö runakunata salvashä. Qayanqä kaqkunataqa llapantam salvashä».

← Chapter 1 Jump to: Chapter 3 →