Nahum 1

Quechuan QXO (Biblia en Quechua del sur de Conchucos)

Jump to: Chapter 2 →

1Kay libruchömi profëta Nahúmta Tayta Dios revelanqan qellqashqa kaykan. Nahúmqa Elcos markapitam karqan. Paytam Tayta Dios revelacionchö rikatsirqan Nínive markata ushakätsinanpä kanqanta.

2Tayta Diosqa runakuna payllata sirviyänantam munan. Contran kaqkunataqa mana kuyapaypam pitapis castigan. Pipis mana cäsuptinqa pasaypam rabyan.

3Tayta Diosqa pacienciakuq y poderösum. Pacienciakuq karpis jutsa ruraqkunataqa castiganmi. Tayta Diosqa shukukuy vientu y mangäda tamya jananpam aywan. Pukutaypis chakinchö polvu shäriqnöllam kaykan.

4Ollqutupaptinmi lamarpis y mayukunapis tsakiskin. Basán partichö y Carmelo jirkachö kaqkunapis tsakiyanmi. Líbanuchö kaykaq waytakunapis tsakinmi.

5Pay shamuptinqa jirkankunapis kuyuyanmi. Jirkakunapis tsullurmi ushakäyan. Kay patsapis y kay patsachö kaqkunapis llapanmi mantsakar tsuktsukyäyan.

6Pay rabyaptin ¿pirä mantsarinmantsu? Pay rabyaptin ¿pirä michanman? Pay rabyarqa ninanörämi imaykatapis ushan. Pay puriptinqa qaqakunapis partikäyanmi.

7Tayta Diosqa allillatam ruran. Paymi llakikuychö kaqkunatapis yanapan. Payman yärakuqkunatam cuidan.

8Peru paypa contran kaqkunatam sïqa teqi apaqnörä ushakätsin. Maytsaypa aywayaptinpis wanuyllam qatiraykan.

9¿Imanirtä Tayta Diospa contran shäriyänaykipä willanakuykäyanki? Payqa llapaykitam ushakätsiyäshunki. Contran shäriqkunataqa chipyaqmi ushakätsinqa.

10Imayka awrikashqa shirakata y tsaki oqshata nina lunyar ushanqannömi ushakätsinqa.

11Nínive runakuna, qamkunapa mandakuqniki reyqa Tayta Diospa contranmi shärishqa. Tsaymi mana allita yätsiyäshunki.

12Kuyanqan runakunatam Tayta Dios nin: «Qamkunata castigashqa karpis kananpitaqa mananam castigayäshaykinatsu. Asiria nación runakunatam sïqa munayyuq y atskaq kayaptinpis llapanta ushakätsishä.

13Tsay runakunapa poderninchö kayanqaykipitam jipiyäshayki. Mananam yapayqa paykunapa poderninchö kayankinatsu».

14Nínive markapa mandaqnin reytam Tayta Dios nin: «Jutikita apananpäpis qampita miraqkuna manam kayanqanatsu. Tsaymi diosnikikunapa templunchö kaykaq ïdulukunata qerupita rurashqa kaqtapis, qoripita y yuraq qellaypita fundishqa kaqtapis llapanta ushakätsishä. Melanaypä mana väliq kaptikim tsay templuman qamtapis pampashayki».

15Judá runakuna, alli willakuyta apamuq runa jirkakunapa shamuykaqta rikayay. Paymi apaykämun alli kawayänaykipä kaq willakuyta. Kananpitaqa contraykikuna ushakätsiyäshunaykipä mananam shayämunqanatsu. Paykunaqa llapannam wanur ushakäyashqa. Tsaynö kaykaptinqa Tayta Diospa fiestankunata rurar kushikuyay. Tsay fiestakunachö payta awniyanqaykita cumpliyay.

Jump to: Chapter 2 →