Obadiah 1

Quechuan QXO (Biblia en Quechua del sur de Conchucos)

Jump to:

1Kaychömi Edom nación runakunapä profëta Abdíasta Tayta Dios revelanqan qellqashqa kaykan. Tayta Diosmi nacionkunaman juk willakuqta mandashqa. Tsay willakuqmi nin: «¡Aku aywashun edomita runakunata atacanantsikpä!»

2Edomita runakunatam Tayta Dios nin: «Wakin nacionkunapitapis mas wallkalla kayänaykipämi castigayäshayki. Tsaynöpam pasaypa penqakuyman churayäshayki.

3Qamkunaqa qaqakunata uchkuykur wayikikunata rurashqa karmi allish tukuykäyanki. Altunnin qaqakunachö tarmi pipis mana vinciyäshunaykipä kanqanta yarpäyanki. Tsayman yärakurqa kikillaykikunam engañakuykäyanki.

4Ankanö junishpa päriptikipis y qoyllurkuna kayanqanchö punukunaykita rurayaptikipis tsaypitam jitarpayämushayki». Tayta Diosmi tsaynö nin.

5«Paqaspa suwa yaykurpis ¿manaku puëdinqan kaqllata apan? Üva pallaqkuna ¿manaku juk ishkay sarta üvakunata yuranchö dëjayan? Peru noqam sïqa pasaypa ushakätsiyäshayki.

6Edomita runakuna, llapan imaykaykikunatam qechuyäshunki. Allin allin kaqkunataqa pakaraykätsiptikipis ashi ashirkurmi apayanqa.

7Llapan yanapashuqnikikunapis contrayki shärirmi engañayäshunki. Vinciyäshurnikim nacionnikipitapis qarquyäshunki. Amïguykikunapis contraykim kayanqa. Paykunaman yärakuykaptikim llullapaypa desgraciaman jitarpuyäshunki. Edomita runakuna, ¡maytä musyaq kayanqayki!»

8Tayta Diosmi edomita runakunata mastapis nin: «Qamkunata castiganä junaq llapan musyaq runakunatam ushakätsishä. Täyanqayki jirkakunachö manam ni jukllayllapis yachaq runakuna quëdayanqatsu.

9Temánchö täraq geniu runakunapis mantsarirmi tsuktsukyäyanqarä. Täyanqayki kaqchöqa chipyaqmi wanutsishqa kayanqa».

10«Qamkunaqa castayki kaykaptinmi Israel runakunata ñakatsiyarquyki y wanutsiyarquyki. Tsaynö rurayanqaykipitam kikikikunapis penqakuypä pasaypa ushakäyanki.

11Karupita shamuq contran soldädukuna imaykakunatapis markapita apayaptin y Jerusalénpa punkunkunata pakir ushayaptin qamkunam tsay soldädukunata yanapayarqayki. Qechuyanqankunata rakipänakuyänanpä suertiyayaptin tsay runakunanömi qamkunapis imaykankunata apayarqayki.

12¡Imanirtä kushipäyarqayki castaykikunata desgracia päsaptin! ¡Imanirtä kushipäyarqayki Judá nación raqällana kaptin! ¡Imanirtä asipäyarqayki kuyapaypä kaykaqta rikar!

13¡Imanirtä desgracia päsaykaptin akranqä markaman yaykuyarqayki! ¡Imanirtä makillan tsoqpashqa waqaykaqta rikaykar kushipäyarqayki! ¡Imanirtä contrankuna vinciptin imaykankunatapis apayänaykipä yaykuyarqayki!

14¡Imanirtä qeshpiykaqkunata wanutsiyänaykipä tinkuq nänikunachöpis shuyaräyarqayki! ¡Imanirtä ayqikuykaqkunata tsari tsariykur entregayarqayki contrankunapa makinman!

15«Llapan nación runakunata juzganäpä kaq junaq wallkanam faltaykan. Tsay junaqmi runakunata ñakatsiyanqaykinölla qamkunatapis ñakatsiyäshayki.

16Sagrädu lömächö kuyanqä runakunata ñakatsiyanqaykinömi qamkunata y llapan nación runakunatapis ñakatsiyäshayki. Castigaptïmi chipyaq illakäyanqa.

17Kawaykar quëdaqkunam sïqa Sión jirkanman amparakuyanqa. Tsay jirkan sagrädu kaptinmi Jacobpita miraq runakuna salvakurnin herenciankunata qorikuyanqa.

18Tsay witsanmi Jacobpita y Josépita miraq runakuna ninanö kayanqa. Esaúpita miraq runakunanam tsakishqa oqshanö kayanqa. Edomita runakunata chipyaq ushakätsiptinmi ni jukllayllapis kawaykar quëdayanqatsu. Noqa Tayta Diosmi tsaynö nï».

19Tsaypitanam Neguev partichö täraq Israel runakuna Edom partita qechuyanqa. Sefelachö täraq Israel runakunam filisteo runakuna täyanqan partita qechuyanqa. Wakin Israel runakunanam Efraín partita y Samaria partita qoriyanqa. Benjamín trïbu kaq Israel runakunam Galaad partita qoriyanqa.

20Juklä nacionpita atskaq Israel runakuna kutimurmi cananeo runakuna unay täyanqan partita qoriyanqa Sarepta markayaq. Jerusalénpita Sefarad markaman prësu apayanqan runakuna kutimurmi Neguev partichö kaq markakunata qoriyanqa.

21Llapanta vinciskirnam Sión jirkanman witsäyanqa Esaúpita miraq runakunata juzgananpä. Tayta Diospa poderninchömi llapanpis kanqa.

Jump to: