Philemon 1

Quechuan QXO (Biblia en Quechua del sur de Conchucos)

Jump to:

1Willakuq mayï kuyay Filemón: Noqa Pablum, Jesucristupa willakuyninta willakunqäpita carcelchö kaykar Timoteuwan kay cartata cartakayämü.

2Panintsik Apiata, willakuq mayintsik Arquiputa y wayikichö qorikaykur Tayta Diosta alabaq wawqikunata y panikunata saludaykullay.

3Papänintsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.

4Wawqi Filemón, imaypis mañakunqä höram qampä Tayta Diosta agradëcikü.

5Señor Jesucristuman criyikuykanqaykita y criyikuq mayintsikkunawan kuyanakur kawanqaykitam willayämashqa.

6Tsaymi mañakuykä Jesucristuman criyikunaykipä y noqantsik raykur wanunqanpita alli kaqkunata ruranaykipä.

7Wawqi Filemón, kuyakuq kar criyikuq mayintsikkunata shumaq animatsinqaykita musyarmi noqapis pasaypa kushikü.

8Wawqi Filemón, Jesucristupa willakuyninta willakunqäpitam carcelchö wichqaraykä. Noqaqa rukunam kä. Prësu kaykanqäman esclävuyki Onésimo chämuptin alli willakuyta willaptïmi Jesucristuman criyikushqa. Tsaymi tsurïnöna kananqa kaykan. Tsaynö kaptinmi qamta rugakamü Onésimuta mandamuptï alli chaskinaykipä. Jesucristupa apostolnin karmi qamta obliganäpä podernï kan. Peru manam obligaynikita munätsu, sinöqa kuyakuq kaptikim Onésimuta alli chaskinaykipä rugakamü.

11Esclävuyki karpis ñöpata manam shumaqtsu yanapashurqayki. Peru kananmi sïqa Jesucristuman criyikushqana kar ishkantsiktana yanapamäshun.

12Pasaypa llakirpis yapaymi Onésimuta kutiykätsimü. [Payta noqatanö chaskiykullay.]

13Alli willakuyta willakunqäpita prësu wichqaranqäyaq trokiki yanapamänanpä quëdatsimuptïpis allim kanman karqan.

14Peru esclävuykitaqa manam tsararäkümantsu, sinöqa kikikirämi yanapamänanpä o mana yanapamänanpäpis ninayki.

15Onésimutaqa capazchi Tayta Dios permitishqa juk tiempulla qampita yarqamunanpä. Kananqa Jesucristuman criyirmi imayyaqpis wawqikina kaykan.

16Kananpita mananam esclävuykinatsu kanqa, sinöqa kuyay wawqintsiknam. Tsaynö kaykaptinqa noqa kuyanqänölla podernikiman kutimuptin qampis kuyay.

17Yärakuq mayï kaptikim rugakamü noqata chaskimanqaykinö paytapis chaskiykunaykipä.

18Esclävuyki Onésimo imaykitapis suwakushqa o jaqayki kaptinqa päganäpä willamay.

19Päganäpä kaqtaqa kikïmi qellqamü. Peru ama qonqaytsu Jesucristupa alli willakuyninta willanqäpita qampis jaqä kanqaykita.

20Wawqi Filemón, yärakuq mayï kaptikim rugakamü kay ninqäta ruranaykipä. Rugakamunqäta ruraptikiqa kushikushämi.

21Kay cartatam cartakayämü ninqänö ruranaykipä kanqanta musyar. Ninqäpita mastarä ruranaykipä kanqantapis musyämi.

22Chämuptï patsatsimänaykipä alistakuykällay. Tayta Diosta mañakunqaykinö carcelpita yarqamurqa watukaqniki shamushämi.

23Epafrasmi saludashunki. Paypis Jesucristupa alli willakuyninta willakunqanpitam noqawan juntu prësu wichqaraykan.

24Tsaynöllam wawqintsik Marcos, Aristarco, Demas y Lucaspis saludayämushunki. Paykunam llapanchöpis yanapaykäyäman.

25Señornintsik Jesucristo kuyapäyäshurniki imaypis yanapaykuyälläshuy. [Amén.]

Jump to: