Jeremiah 39

Kiche 1995 (Quiché Bible)

← Chapter 38 Jump to: Chapter 40 →

1Pa ri ulajuj ic' re ri ubelej junab ri rajawinic ri Sedequiy pa Juda, ri Nabucodonosor, ajawinel re Babilon, xpe che u ch'äquic ri Jerusalen e rachil conojel ri e rajch'ojab xquisutij c'ut rij.

2Pa ri ubelej rajilabal ri ucaj ic' re ri ujulajuj junab re ri rajawinic ri Sedequiy, ri ajch'ojab ri e c'ulel xeboc chupam ri tinimit,

3conojel c'ut ri e qui nimal tak ri e rajch'ojab ri ajawinel re Babilon xeboquic xquijekeba' c'u quib chuchi' ri oquibal ri c'o pa niq'uiajil. E are' ri Nergal-sarezer, Samgar-neb, Sarsequim, ri c'o nimalaj rekle'n pa ri takanic, xukuje' jun chic Nergal-sarezer, xukuje' nim rekle'n.

4Aretak ri ajawinel Sedequiy xukuje' tak ri e rajch'ojab xquil ri cätajin cäc'ulmatajic, xebanimajic xquiya' can ri tinimit. Chak'ab xebel bic xebe pa ri be ri cäbe pa tak ri e u ticbal cotz'i'j ri ajawinel, pa ri oquibal ri c'o chquixo'l ri quieb tapia, xquitakej c'ut ri be ri c'o pa ri beya' re ri Jordan.

5Xebokatax c'ut cumal ri ajch'ojab aj caldeyib, xequirika' c'ut ri Sedequiy pa ri lianic re Jerico. Xquichapo xquic'am c'u bic chuwäch ri ajawinel Nabucodonosor, ri c'o pa Ribla, pa ri rulew ri Hamat: Chila' c'u xuk'at wi tzij ri Nabucodonosor: xtakan c'u che u k'atic qui kul ri e u c'ojol ri Sedequiy chuwäch wa', xukuje' tak ri e aj Juda ri nimak qui k'ij.

7Are' c'u ri xban che ri Sedequiy, xtakanic chi chec'otix ri e u bak'wäch xxim c'u chutza'm jun tikom ch'ich' che u c'amic bic pa Babilon.

8Ri aj caldeyib xquit'ik k'ak' che ri rachoch ri ajawinel xukuje' chque tak ri ja ri e c'o chupam ri tinimit, xebequit'akij tak ri e u tapia ri Jerusalen.

9Che ri u q'uisbalil, ri Nabuzaradan, takanel paquiwi' ri e chajil tak rech ri ajawinel, xebuc'am bic ri winak pa Babilon ri c'ä e canajinak canok chupam ri tinimit, jacha' xukuje' ri xek'ax tak cuc' ri aj caldeyib; xukuje' c'u ronojel ri tinimit.

10Xuwi xebuya' can chupam ri rulewal ri Juda jujun ri sibalaj e mebayib na, ri man e c'o ta jastak quech, pa ri k'ij c'ut ri' xebuya' ticbal tak uva chque xukuje' tak ulew re ticonijibal.

11Ri ajawinel Nabucodonosor re Babilon xuya' che ri Nabuzaradan takanel paquiwi' ri chajinelab, we takanic tak ri' ri chubana' che ri Jeremiy:

12“Chac'ama' chcanaj awuc' che rilixic maban c'ax che, xane' chaya' che ronojel ri cutz'onoj chawe.”

13Are c'u ri Nabuzaradan, rachil ri Nabusazban xukuje' ri Nergal-sarezer, quieb achijab ri e c'o nimak tak quekle'n pa ri takanic, xukuje' conojel ri e quinimal tak ri rajch'ojab ri ajawinel re Babilon,

14xquitak resaxic ulok ri Jeremiy cho ri ja ri e c'o wi ri chajinelab xquijach c'u pa u k'ab ri Jedaliy rech cuchajij, u c'ojol ri Ahicam ri' u mam c'ut ri Sapan, rech caquic'am bic cho cachoch. Je c'u ri' ri Jeremiy xjeki' can chupam ri tinimit.

15Aretak c'ä tz'apital ri Jeremiy cho ri ja ri e c'o wi ri chajinelab, ri Ajawaxel xutzijobej ri Jeremiy, xubij che:

16“Jät jabij c'u che ri Ebed-melec, ri aj Etiopiy: ‘Ri Ajawaxel ri c'o ronojel u cuinem, ri u Dios ri Israel, jewa' cubij: Quentz'akatisaj ri nu yo'm u bixic ri cuc'ulmaj na we tinimit ri' che retzelal, man che ta c'ut rutzil. Aretak quec'ulmataj wa', at cawil na.

17Catinchajij c'u na, rech man catekaj ta na pa qui k'ab we winak ri' ri caxe'j awib chquiwäch. In, ri Ajawaxel, quinjiquiba' u bixic.

18In catinto'tajisaj na rech man catcämisax taj. Catcuinic cato'tajisaj awib man catcäm taj, rumal rech chi xacu'ba' a c'u'x chwij. In, ri Ajawaxel, quinjiquiba' u bixic.’ ”

← Chapter 38 Jump to: Chapter 40 →