Jonah 3

Kiche 1995 (Quiché Bible)

← Chapter 2 Jump to: Chapter 4 →

1Ri Ajawaxel xtzijon chi jumul ruc' ri Jonas, xubij che:

2“Chacowij jät pa Ninibe, tinimit ri nim u k'ij, chaya' u bixic chila' ri quinbij chawe.”

3Ri Jonas xutakej ri u be, xbe pa Ninibe jacha' ri xbix che rumal ri Ajawaxel. Ri Ninibe are jun tinimit ri nim u k'ij; ri cajwataj oxib k'ij che u binibexic. Ri Jonas xoc pa ri tinimit, xbin c'u ronojel ri jun k'ij co xurak u chi' xubij: “¡pa cawinak k'ij we tinimit Ninibe cäsach na u wäch!”

5Ri winak ri e c'o pa ri tinimit, chi ri'jab chi ac'alab xecojon che ri Dios, xquiya' u bixic chi man cätijow ta wa, xukuje' xequicoj wakwoj tak atz'iak che u c'utic ri k'oxomal.

6Aretak c'u xopan u tzijol ruc' ri ajawinel re Ninibe, xwalij pa ri u tem re ajawibal, xeresaj ri ratz'iak re ajawinel, xucoj wakwoj tak atz'iak, xt'uyi' c'u cho ri ulew.

7Ri ajawinel xukuje' ri e rach k'atal tak tzij xquiya' c'u retamaxic we pixab ri': “C'o jun mutij k'obibal. Chi xukuje' ne metzukic mawi maya' qui joron ri wacax xukuje' tak ri chij.

8Chebicojo c'u wakwoj tak atz'iak chiwij, che u c'utic ri k'oxomal, chitok'olej c'u ri Dios ruc' ronojel ri i chuk'ab. Chequiya' canok chquijujunal ri itzel qui c'aslemal xukuje' ri tokinic ri c'ä cätajin queban camic,

9craj ne cäcuy ri ka mac rumal ri Dios coc'ow c'u ri royowal, xa' je ri' man cujecäm taj.”

10Ri Dios xrilo ri caquiban ri winak aj Ninibe ri xquiban che u ya'ic canok ri itzelalaj qui no'jibal, xuchomaj chi man cuc'am ta chi ulok ri c'ax ri u chomam u c'amic ulok paquiwi'.

← Chapter 2 Jump to: Chapter 4 →