Ruth 1

Kirundi (Bibliya Yera 1951, 1967 (Burundi))

Jump to: Chapter 2 →

1Mu misi y’abacamanza ikigoyi cateye mu gihugu. Nuk’ umugabo w’i Betelehemu h’i Buyuda asuhukira mu gihugu c’i Mowabu, bo n’umugore wiwe n’abahungu biwe bompi.

2Uwo mugabo yitwa Elimeleki, umugore wiwe yitwa Nawomi, abahungu biwe bompi umwe yitwa Mahaloni, uwundi yitwa Kiliyoni, bār’ Abanyefurata b’i Betelehemu h’i Buyuda. Bashika mu gihugu c’i Mowabu, babayo.

3Elimeleki, umugabo wa Nawomi, arapfa; asigarana n’abahungu biwe bompi.

4Bābīra Abanyamowabukazi; umwe yitwa Orupa, uwundi yitwa Rusi: bamaray’ imyaka nk’ icumi.

5Maze Mahaloni na Kiliyoni bompi barapfa; uwo mugore abura abana biwe bompi n’umugabo wiwe.

6Bukeye avana hasi n’abakazana biwe, kugira ngw ave mu gihugu c’i Mowabu asubire i wabo: kuko yari yumvise ari mu gihugu c’i Mowabu yuk’ Uhoraho yagendeye abantu biwe, akabaha ivyo kurya.

7Ava aho hantu yar’ ari, bo n’abakazana biwe bompi, bajana inzira isubira mu gihugu c’i Buyuda.

8Nawomi abgira abakazana biwe bompi, ati Ni mugende, musubire mu mazu ya ba nyoko: Uhoraho abagirire neza, nk’uko mwagiriye neza abahisi, bo nanje.

9Uhoraho abahe mwempi gusubira kwubaka ingo mugire abagabo. Arabagūmbīra, baraturikisha, bararira.

10Baramwishura, bat’ Oya, ariko turasubiranayo nawe mw ihanga ryanyu.

11Nawomi arabishura, ati Bakobga banje, ni mwisubirire inyuma: n’iki gitumye mugomba kujana nanje? Har’ abandi bana ngifise mu nda, ngo baze babe abagabo banyu?

12Ni mwisubirire inyuma, bakobga banje, mwīgīre; kuko ndenze gucūrwa. Iyo mba mvuzeho, nti Ndi n’ivyizigiro; ndeke naho noronka umugabo iri joro nyene nkazovyara abahungu;

13mbeg’ ivyo vyotuma mubarīndīra gushitsa aho bazokurira? Ivyo vyotuma mureka kurondera abagabo? Vyoye kuba birtyo, bakobga banje, kuko muntera akagongwe, kuk’ ukuboko kw’Uhoraho kwaramvuriye kundwanya.

14Barongera baraturikīsha, bararira: Orupa agūmbīra inabukwe, ariko Rusi we amugumakw akaramata.

15Nawomi aravuga, ati Rāba, mugenzawe asubiye mu b’i wabo no ku mana yabo: nawe subirayo, ukurikire mugenzawe.

16Rusi aramwishura, ati Reka kunyinginga kuguheba, no gusubira inyuma ngo noye kugukurikira; kukw ah’ uzoja ari ho nzoja, kand’ ah’ uzorāra ari ho nzorāra; ihanga ryanyu ni ryo rizoba ihanga ryacu, Imana yawe ni yo izoba Imana yanje;

17ah’ uzogwa ni ho nzogwa, bahampambe: Uhoraho arakabimpanira, kandi birushirije, ni nagira ikizontandukanya nawe, atar’ urupfu.

18Nawomi abonye yukw amaramaje kujana na we aca arahora.

19Nuko bompi barajana kurinda bashika i Betelehemu. Nuko rero bashitse i Betelehemu abo mu gisagara bose barashwabāduka, abagore barabazanya, bati Mbeg’ uyo yoba Nawomi?

20Arabishura, ati Ntimube mukinyita Nawomi, ariko munyite Mara; kuko Rugira Vyose ivyo yangiriye vyambereye umururāzi.

21Navuye ino nninahaye, Uhoraho angarukanye i wacu nd’ imbokoboko: munyitira iki Nawomi, Uhoraho ko yantuntuje, kandi Rugira Vyose akaba yanteye ivyago?

22Uko ni ko Nawomi yagarukanye na Rusi Umunyamowabukazi umukazana wiwe, bavuye mu gihugu c’i Mowabu: bashika i Betelehemu mw itangura ry’igenya rya sayiri.

Jump to: Chapter 2 →