1 Timothy 6

Romani Ursari 2018 (Biblia Ande Chib Romani)

← Chapter 5 Jump to:

1E llene kai si sluge morabi te avel len liubao pe gazdenchar, te na den orbe bilache katar o Del ta katar amaro sikadipe.

2A gola kai lengo gazda pachal morabi te na jasaren lea o liubao samo soke si tumaro phlal ando pachape. Morabi te radin lenge ios mai sukar, soke tumen volin len ta soke i von pachan. Sikau ta de gaia orba:

3Vareko te sikavela iek sikadipe kai niko ni pinllarel, ta ni pachal ando sasto sikadipe katar o Gazda o Jesukristo ta ni ande so sikavel amaro pachape,

4gua lleno si iek barikano kai ni llanel niso. Gua lleno jalpe ta gua si sargo leko nasualipe, ta goleke e llene murzin, kusenpe, jasaren e vera

5ta marenpe suako llive e llene kai lenge mislura si melale ta ni pinllaren o chachipe, ta o pachape si lenge iek rado te barvaon.

6A chachimaia si iek baro barvalipe samo e llenenge kai si vesele ande so si len.

7Soke niso ni andam ande gava sueto ta niso nasti inllara amenchar;

8te si amen so te ja ta so te thova pe amende sai ava vesele.

9A gola kai mangen te barvaon peren ando zumadipe ta kojadon, ta zelin but ezgode dile kai murin len ta zatril len, ta cherel len te jasaon.

10Soke o volipe pe love anel suako bilachipe. A si nesave llene kai durile katar o pachape pala o volipe kai si len pe love, ta cherde peke bare nuzde.

11A tu, Devleko manus, nas katar sa gala ezgode. Morabi te ave chacho, Devlikano, te avel tut pachape, volipe, te ave zuralo ande nuzda, ta cho lio te na avel barikano.

12Lla po lacho drom katar o pachape, le o zivoto ostade, soke goleke ikharda tut o Del, ta goleke dian orba sukar katar cho pachape angla but llene.

13Akana angla o Del, kai cherda suako ezgoda, ta angla o Jesukristo, kai dia orba sukar ta orba chachi angla o Ponsio Pilato, mangav tutar

14te kande so phenav chuke ta te ave chacho ta niko te na dosarel tut lligo ni ka avel blagosimaia amaro Gazda o Jesukristo.

15Ta kana ka avel orta o vreme kai o Del llanel ka cherel gaia ezgoda, soke samo o Del si o edino ta blagosime kai gazdaril pe sa, Charo katar e charura ta Gazda katar e gazda.

16Vou si o edino kai ni merel, kai zivil ande iek villelo kai niko nasti avel pase. Nisavo manus ni dikhla le ta nasti dikhel le. ¡Leko si ostade o baripe ta e zor! Gia te avelpe.

17Phen e barvalenge katar gava sueto, te na aven barikane, ta te na thoven pi vera ande po barvalipe soke o barvalipe sai jasardol. Mai sukar si te thoven pi vera ando Del soke vou del amen but katar suako ezgoda lachi amenge.

18Phen lenge te cheren o lachipe, te aven barvale ande lache ezgode kai cheren ta te fulaven averenchar so si len.

19Ta gia ka avel len barvalipe kai ka pomozil len mai angle, ta ka len o zivoto ostade.

20Timoteo, cher sa so phendem chuke. Na asun so phenel o sueto kai ni pachal, ni e alava kojamne kai von phenen kai si o chachipe,

21soke nesave llene kai phenen kai len si gua bizaipe, durile katar o pachape. O Gazda te del tumen katar po volipe.

← Chapter 5 Jump to: