2 John 1

Romani Ursari 2018 (Biblia Ande Chib Romani)

Jump to:

1Me o phuro katar e khanlliri, bichalav salami e phlalenge kai o Del esvirisarda. Me voliv tumen, ta na samo me, i gola kai pinllarde o chachipe, volin tumen,

2cheres o chachipe kai si ande amaro lio ta kai ka achel ostade.

3Mangav katar o Del o Dad, ta katar o Jesukristo leko Chavo, te del tumen e pas, ta te cheren te avel maskar tumende baro volipe.

4Veselisailem but soke llanglem kai nesave tumendar llan po drom o chacho, prema o zakono kai dia amen o Dad.

5Akana mangav tumendar te avel volipe maskar amende. Gava inai iek zakono nevo, gava zakono si isto gua kai sikilam mai anglal.

6Gua kai volil chachimaia, cherel so phenen e zakonura e Devleke, a o zakono gia sar sikilen le mai anglal, si te zivin ando volipe.

7Ando sueto si but kojamne kai phenen kai o Jesukristo ni avilo ande iek esnaga manuseki sargo amen. Gua phenel le o kojamno, o Antikristo.

8Arakhen tumen te na jasaol o rado kai cherdam maskar tumende, te sai len e Devletar o baro chari.

9Fiko te jasaola ta te na achela ando sikadipe e Kristoko, inai e Devlea. A gua kai achela ando sikadipe e Kristoko, vou si e Dadea ta i e Chavea.

10A fiko te avela tumende, ta te anela aver sikadipe, na ikharen le te del ande tumaro cher, ta na phenen leke ni sar san;

11soke gua kai phenel leke sar san, cherdol sargo gua lleno.

12Si man but ezgode te pisiv tumenge, ta ni kamam te phenaulen ande gava lil, soke mangav te llau tumende ta te dav orba katar gala ezgode kana ka avav tumenchar, te avel amari veselia pherdi.

13E phlal katar e khanlliri kate kai sem me, bichalen tumenge salami.

Jump to: