2 Peter 3

Romani Ursari 2018 (Biblia Ande Chib Romani)

← Chapter 2 Jump to:

1Phlalalen, gava si o duito lil kai me pisiv tumenge. Ande gala dui lila manglem te phenav tumenge te mislin tumen orta.

2Den tumen golli so phende omanglal e poraukura sante, ta den tumen golli katar o zakono e Gazdako o Braduimari kai e apostolura sikade tumen.

3Mai anglal morabi te llanen kai ande llivesa kai ka aven mai angle e llene ka zivin sar von mangen ande po bilachipe ta ka puchen espurniaia:

4¿So avilape katar o alav kai phendaia o Jesukristo kai pale ka avel? Amare dada, mule ta o sueto isto gua si sar kana cherde le.

5Gala llene ni kamen te acharen kai ollikana saia o miloso ta e phuv, ta kai o Del pe alavea cherda te likel e phuv katar o pai ta mukla la upral po pai.

6Ta gole bare bursin dea zatrisarda gole sueto.

7A o miloso ta e phuv kai si akana isto cheres gua alav e Devleko si chinade e iagake ta isto goia iag ka phabaren len ando llive e krisako kai si o llive kana ka jasaon e bilache.

8Ta na bristaren tumen phlalalen, kai e Gazdake iek llive si sargo milia burs, ta milia burs si sargo iek llive.

9Inai kai o Gazda si leno te cherel so phenda kana dia po alav gia sar phenen nesave llene, soke e Gazdake si zalba ta vou aduricharel tumen ta mangel te keimpe saurre ta te na jasaol niko.

10A o llive e Gazdako ka avel sargo kana avel iek chorano. Ondaka o miloso ta sa so si ande lete ande iek baro germipe ka aven zatrime e iagatar ta e phuv ta sa so si ande late ka phabon.

11Isto goleke tumen morabi te zivin orta sar mangel o Del soke sa gala ezgode ka aven zatrime e iagatar.

12Aduricharen e Devleko llive, ta cheren te avel mai oma. Gua llive o miloso ta sa so si ande lete ka avel zatrime e iagaia, ta sa e ezgode ka bilaon ande iag.

13Ta amen adurichara te avel o miloso o nevo ta e phuv e nevi kai o Del phenda kai ka cherel, kote kai ka gazdaril o chachipe.

14Goleke phlalalen so tumen aduricharen te cherdon gala ezgode na cheren niso bilacho te avel esmiro ande tumare golli te sai malavel tumen o Del chiste ta bi dosaia.

15Soke tumen llanen kai o Gazda dikhel pe amende zalbaia te ava braduime ta katar gala ezgode i amaro phlal o Pablo pisisarda tumenge soke o Del dia le bizaipe te phenel gala ezgode.

16Ande sa e lila kai vou pisisarda vou phenel katar gala ezgode kai nesave si but trudne te achara. A gola llene kai ni llanen niso ta i gola llene kai si kovle ando pachape ni acharen len sukar, ta mapalal sikavenlen sa bange. Isto gia cheren ogole alavenchar kai si ando Pisipe, goleke ka aven dosale.

17Phlalen, tumen llanen sa gala ezgode, goleke arakhen tumen katar e llene bilache, ta na pachan ande so phenen von soke sai cheren te jasaren tumaro pachape.

18Goleke sikon ios mai but katar amaro Gazda ta Braduimari o Jesukristo, ta barion ande leko volipe. ¡Te avel blagosime o Jesukristo akana ta ostade! Gia te avelpe.

← Chapter 2 Jump to: