Acts 14

Romani Ursari 2018 (Biblia Ande Chib Romani)

← Chapter 13 Jump to: Chapter 15 →

1Ando Ikonio o Pablo ta o Bernabe die ande khanlliri e judionengi ta kote die orba katar o Jesus, ta but llene kai sea judiura pachaie ando Jesus ta i gola kai inai sea judiura.

2A e judiura kai ni pachana ando Jesus cherde te joliaon pe phlal e llene kai inai sea judiura.

3A e apostolura achile kote but vreme, thode pi vera ando Del ta die orba sa pe chachimaia. Ta o Del chacharda so von phenena katar e Devleko volipe, ta dela len zor te cheren bare ezgode Devlikane.

4A e llene katar o foro sea fulade, nesave llene sea pe rig e judionengi ta aver pe rig e apostolengi.

5Ondaka e judiura ta i gola kai inai sea judiura achile pe iek orba e sudonenchar te maren len ta te mundaren len e barrenchar.

6A o Pablo ta o Bernabe, kana llangle so mangena te cheren lenchar, nasle ande Listra ta ando Derbe, forura katar e Likaonia ta ande sogo si e forura kai si truial,

7ta i kote phende e lachi viasta.

8Ande Listra saia iek lleno kai nasti phirela soke biandiloia bango,

9ta gava lleno asunela so phenela o Pablo, a o Pablo dikhla kai saia le pachape te avel sasto.

10Ondaka o Pablo dia lea orba zurale ta phenda leke: ¡Uste ta phir! Gua lleno jutlo ta thodape pe porrne ta phirda.

11Kana dikhle so cherda o Pablo, urkisarde ande chib kai den orba ande Likaonia ta phenena: ¡Dela sargo manusa fuliste amende!

12Ta mislina kai o Bernabe saia o del Zeus ta kai o Pablo saia o del Ermes soke vou saia kai dela orba.

13O popo katar o del Zeus kai saia leki khanlliri angla o foro, anda guruven ta lulunlla lacharde. Vou ta e llene mangena te cheren lenge iek kurbano.

14A kana o Bernabe ta o Pablo acharde so mangena te cheren, pharrade pe patave ta thodepe maskar e llene ta urkisarde:

15Manusalen, ¿soke cheren gua? Amen sam manusa, sargo tumen. Amen avilam te phena tumenge e lachi viasta te sai muken gala ezgode kai ni mol len niso, ta te irin tumen kai o Del o llundo kai cherda o miloso e phuv e mora ta sa so si ande lende.

16Cherel but burs palpale o Del mukla te llal suako lleno pe po drom,

17sa o vreme sikada ko saia vou e lachimaia kai cherela, soke vou si gua kai bichalel tumenge o bursin ta o sukaripe kai del e phuv; ta vou del saurren so trubul len o jape ta te aven vesele.

18A sa pe orbenchar o Bernabe ta o Pablo nasti achade len te cheren lenge kurbano.

19Ondaka avile nesave judiura katar e Antiokia ta katar o Ikonio, ta cherde e llenen te bolden po mislo; ta e llene kai mangena te cheren lenge kurbano chalade e Pablo e barrenchar ta sar mislina kai mundarde le, terrisarde le avri katar o foro.

20A kana e llene kai pachana ando Jesus chidinaile truial katar o Pablo, vou ustilo ta pale dia ando foro ta thiarinako llelo e Bernabesea karing o Derbe.

21Kana phende e lachi viasta ando Derbe, but llene pachaie ando Jesus, a von irisaile ande Listra ando Ikonio ta ande Antiokia.

22Ande gola forura die zor e llenen kai pachana ando Jesus, ta phende lenge te na muken po pachape, ta phende lenge kai morabi te nakha but bari patnia mai anglal te da ande charoina e Devleki.

23Ande suako khanlliri o Pablo ta o Bernabe thovena phuren te pomozin e llenen kai pachaie ando Jesus, ta kana molisaile ta allunisarde, mukle len ande va e Gazdake golen kai pachaie ande le.

24O Pablo ta o Bernabe nakhle katar e Pisidia, ta avile ande Panfilia.

25Ta ando Perjes phende e lachi viasta ta mapalal llele ande Atalia.

26Kote likiste ande iek llimia ta llele karing e Antiokia. Ande gua foro e llene katar e khanlliri manglea e Devletar volimaia te arakhel e Pablo ta e Bernabee kana von ka thovenpe te phenen e lachi viasta.

27Kana avile ande Antiokia, chidie e llenen katar e khanlliri ta phende lenge sa so cherda o Del lenchar, ta sar o Gazda putarda o udar e llenenge kai inai sea judiura te sai pachan i von.

28Ta o Pablo ta o Bernabe achile kote but vreme e llenenchar kai pachana ando Jesus.

← Chapter 13 Jump to: Chapter 15 →