Haggai 2

Romani Ursari 2018 (Biblia Ande Chib Romani)

← Chapter 1 Jump to:

1Ando bis ta iek llive katar o eftato chon, o Del dia orba katar o profeta o Jageo, ta phenda:

2Phen e Zorobabeleke chavo katar o Salatiel kai gazdaril ando Juda, ta e Josueke chavo katar o mai baro popo o Josadak, ta sa e foroke gia:

3¿Ko tumendar dikhla o baripe katar o purvo cher ta dikhel o cher sar si akana? ¿Inai sargo niso angla tumare akha?

4Goleke, Zorobabel le chuke zor, ta i tu Josue chavo katar o Josadak le chuke zor, ta sa o foro e phuviako. Radisaren, soke me sem tumenchar, phenel o Del kai si le sa e zor.

5Isto gia sar me achilem po alav tumenchar kana likisten katar o Ejipto, mo duo ka avel tumenchar. Na daran.

6Gia phenel o Del kai si le sa e zor: Cherricha ios ka cherav te dermolpe o miloso ta e phuv, e mora ta e phuv suki.

7Ka cherav te dermonpe sa e phuvia, ta ka avel so mai zelin sa e phuvia, ta ka pherav barimaia gava cher, phenel o Del kai si le sa e zor.

8O rup si murno ta murno si o sunakai, phenel o Del kai si le sa e zor.

9O baripe katar gava cher ka avel mai baro neko o purvo cher, phenel o Del kai si le sa e zor. Ta ka dav e pas pe gava than, phenel o Del kai si le sa e zor.

10Ando bis ta starto llive katar o iniato chon katar o duito burs e Darioko, o Del phenda e profetake o Jageo gia:

11Gia phenel o Del kai si le sa e zor: Puchen e poponen cheres o zakono gia:

12Fiko te inllarela mas dino e Devleke ulime ande po gertachi, a o gertachi te dodila marrno, zumi, zeitino, o fisavo aver jape, ¿Ka achen dine e Devleke? Ta e popura vacharde: Iok.

13Ta o Jageo phenda: Te si kai iek lleno achilo pokalime soke dodisarda iek esnaga muli, ta dodila iek andar gola ezgode ¿Ka achen pokalime? Ta e popura vacharde: Ka achen pokalime.

14Ta o Jageo phenda: Gia si gava foro ta gala llene angla ma, phenel o Del. Isto gia sa so cheren pe vastenchar, ta sa so den kate, si pokalime.

15Mislin tumen ande gaia ezgoda mai anglal te thoven bar po bar ando cher e Devleko.

16Mai anglal te nakhen gala ezgode, rodena bis breche lliu ta malavena samo des. Rodena pinda piria mol, ta malavena samo bis.

17Me cherdem te aven muke ta te perel krupe pe sa tumaro rado, a tumen ni irisaile mande. Me o Del phenav le.

18Mislin tumen ande tumare lie katar angle. Allive si o bis ta starto llive katar o iniato chon, ta thode e barra kai si telal ando cher e Devleko.

19Llik akana inai tumen lliu kote kai guruven le. Ni ios ni den e kasta septelie drakhake, e kasta simochinenge, e granade ta e kasta maslinkenge. A me ka blagosiv len.

20Pale o duito o Del dia orba e Jageoke isto ande gua llive, ta phenda leke gia:

21Phen gia e Zorobabeleke o gazda katar o Juda: Me ka cherav te dermonpe o miloso ta e phuv,

22ka peravav o trono katar e charoine ta ka zatriv e zor katar e charoine e phuviake. Ka zatriv lenge bordona marimake ta ka meren e gra ta o boñikura kai llan pe lende. Suako iek ka mundarel pe phale e jarniea.

23Ande gua llive, tu Zorobabel chavo katar o Salatiel kai san mo sluga, ka thovav tut sargo sello, soke me esvirisardem tut. Me o Del phenav le.

← Chapter 1 Jump to: