Joel 3

Romani Ursari 2018 (Biblia Ande Chib Romani)

← Chapter 2 Jump to:

1Soke ande gola llivesa ka cherav te irinpe o Juda ta o Jerusalem katar e phuvia kai von sea phangle,

2ka chidav sa e phuvien ta ka cherav te llan ande bari umal katar o Josafat, kote ka krisiv len katar so cherde me foroke o Israel. Soke rispisisarde len maskar sa e phuvia ta fulade maskar pete mi phuv.

3Cheldepe te sai fulaven me foro, die e minonen pala iek kurvichka, bichinde e chorren te sai pien mol.

4¿So mangen mandar tumen, Tiro ta Sidon ta sa e Filistea? ¿Mangen te ikanen tumari duk pe ma? A te cherena le, me ka cherav te perel pe tumare sore.

5Soke inllarden mo rup, mo sunakai ta me ezgode sukar te thoven len ande tumare delenge chera,

6ta e chaven katar o Juda ta katar o Jerusalem bichinden len e griegonenge te durion katar pi phuv.

7A me ka ikanav len kotar katar bichinden len, ta tumaro pochindipe ka perel pe tumare sore,

8ta ka bichinav tumare minonen, ta von ka bichinen len e sabeonenge kai lengi phuv si but dur. Me o Del phenav le.

9¡Phenen gava e phuvienge! ¡Phenen kai si maripe! ¡Llungaven e murusen tromane! ¡Te aven sa e murusa marimake!

10Te cheren jarnie katar tumare ezgode te radin e phuv, ta cheren lanse katar e churia bangarde kai chinen o lliu. Te phenel o lleno kai inai le zor: Zuralo sem.

11Sa e phuvia kai si truial ¡Sigaren te chidiniaon! ¡Devla, cher te aven kote che llene zurale!

12Te lachardon e phuvia ta te llan karing e bari umal katar o Josafat, soke kote ka krisil o Del sa e phuvien kai si truial.

13Thoven e jarnie bangarde, soke si but o lliu kai barilo. Aven te dikhen e drakha kai si but. Ustaven len te sai cheren e mol, soke lengo bilachipe si but.

14But forura chidinaile ande bari umal katar e Kris, soke si pase o llive e Devleko.

15O kham ta o chon kacherdon truniariko ta e cheraia ni ka klichin.

16Ta o Del ka basel katar o burdo o Sion, katar o Jerusalem ka asundol leko avazi ta ka dermolpe o miloso ta e phuv, a o foro katar o Israel ka uzdilpe ando Del ta o Del ka avel leki zor.

17Ta ka pinllaren kai me sem tumaro Del kai ziviv ando Sion, mo santo burdo. Ta o Jerusalem ka avel santo, nikada ios ni ka nakhen letar e llene kai inai katar o Israel.

18Ande gua llive e mol ta o thud ka chordon sargo o pai pe burdura, ta ande sa e paiorra katar o Juda ka avel but pai. Ande mo cher ka avel iek bunari, ta leko pai ka chingarel sa e bari umal katar o Sitim.

19O Ejipto ka avel zatrime, ta o Edom ka achel pusto, pala o kojaipe kai ikande pe chaurre katar o Juda, soke ande lengi phuv mundarde bute llenen lache.

20A ando Juda ta ando Jerusalem suako drom ka zivin llene ande lende.

21Ka chistou o rat katar e llene kai ni chistosardem, ta o Del ka zivil ando Sion.

← Chapter 2 Jump to: