Jude 1

Romani Ursari 2018 (Biblia Ande Chib Romani)

Jump to:

1Me o Judas, esluga e Jesukristoko ta phlal e Santiagoko, bichalav salami golenge kai o Del o Dad volil ta ikharda, ta kai o Jesukristo arakhel len.

2Te del tumen o Del but katar pi zalba, pi pas, ta po volipe.

3Phlalalen, but mangava te pisiv tumenge katar o braduipe kai si tumen ta i amen; a akana morabi te pisiv tumenge te sai mangav tumendar te arakhen o pachape kai o Del dia pe santo foro kai vou esvirisarda.

4Soke me llanav kai nesave llene die kojaimaia maskar tumende. Katar gola llene ollikana saia lenge chinado ando Pisipe kai ka aven dosarde. A von si llene bilache ta mislinpe kai o Del ni ka joliaol pe lende pala o bilachipe kai cheren, ta von phenen kai o Jesukristo inai amaro edino Gazda.

5Si iek ezgoda kai tumen llanen kai mangav te den tumen golli, kai o Gazda kana ikanda pe foro o Israel katar o Ejipto, mapalal zatrisarda golen kai ni pachaie.

6Ta i e suechonen kai ni achile pe po than gazdarimako, ta mukle o than kai zivina, o Del phangla len lanchonenchar ande rubie truñarike lligo ni ka avel o llive e krisako.

7Ta i sargo gola suechura, avilape e llenenchar kai zivina ande Sodoma ta ande Gomorra ta e forura kai sea pase. Gola llene cherde o kurvaluko ta aver ezgode kai inai prema e manusa, goleke o Del chudia len ande iag ostade. Gua si te sikiva amen e Devletar.

8Isto gava ka nakhen e llene bilache kai pisiv tumenge lendar. Soke pe dilimaia pokalin pe esnage, ta ni pachan ando gazdaripe e Devleko, ta kusen e suechonen.

9Ni o Migel kai si gazda e suechonengo, kana mardape e llavoloia pala e esnaga e Moiseseki, ni tromaia te kusel e llavolo, samo phenda leke: ¡Daboida o Del te del pe tute!

10A gala llene den orba bilachi katar ezgode kai ni pinllaren. Von cheren sargo e zivirinie, kai pinllaren e ezgode ta ni acharen len, goleke zatrin isto von pe.

11¡Tesko lenge!, soke cheren sar cherda o Kain, soke pala o volipe e lovengo gia sar cherda o Balaam i von cherde ta llele pe aver drom, ta ka meren sargo o Kore kai putaili e phuv ta nakhada le soke ni kandia e Devle.

12Baro lallao si kana gala llene aven te besen pe tumari bari sinia, soke jan ta pien ta inai len liubao e llenenchar. Von si chobanura kai samo arakhen isto von pe. Von si sargo oblakura kai inai len pai ta kai e balav inllarel len kaigo kamel. Von si sargo e kasta kai ni den septelie ande po vreme, von si mule sargo e kasta kai si ikande e zilenchar katar e phuv.

13Von si sargo e valura dive e morake kai chuden po melalipe avri. Von si sargo e cheraia kai peren ta si lenge chinado te llan ostade ando truniariko.

14O Enok, kai saia o eftato katar e vicha e Adaneki, dia orba katar gala llene, ta phenda gia: Dikhlem e Gazda kai avela bute milie suechonenchar

15te krisil sa e manusen, ta te dosarel e llenen kai cherde o bilachipe, ta golen kai kusle le.

16Gala llene inai lenge drago niso, ta den averenge orbe. Zivin prema so si lenge drago. Istardon, ta kana den orba sukar fikatar cheren le samo pala e love.

17A tumen phlalalen, den tumen golli kai e apostolura amare Gazdake e Jesukristoke, phende tumenge:

18Kana ni ka achel ios vreme, ka aven llene kai ka maren espurnia, ka zivin prema so si lenge drago.

19Gala si e llene kai cheren te avel joli maskar e phlal ta te fuladon; cheren samo so si lenge drago soke inai len o Duo e Devleko.

20A tumen phlalalen morabi te barion ando santo pachape e molimaia ando Santo Duo.

21Achen ando volipe e Devleko ta aduricharen o llive amare Gazdako e Jesukristoko, kana ande pi zalba ka del amen o zivoto ostade.

22Te avel tumenge zalba katar e llene kai lengo pachape inai zuralo.

23A averen ikanen len katar o tufano e iagako, ta te avel tumenge zalba katar ogola llene. Arakhen tumen lendar, ta na cheren e ezgode kai von cheren.

24O edino Del kai braduil amen, si le e zor te arakhel tumen te na peren ando bilachipe ta te anel tumen chiste ta vesele angla le, kai si le sa e zor.

25E Devleke te avel o baripe, o liubao, e zor ta o gazdaripe, pala amaro Gazda o Jesukristo; mai anglal, akana, ta ostade. Gia te avelpe.

Jump to: