Nehemiah 8

Romani Ursari 2018 (Biblia Ande Chib Romani)

← Chapter 7 Jump to: Chapter 9 →

1Ondaka sa o foro chidinailo pe plasa kai si angla o udar e paieko, ta mangle katar o kovachi Esdras te anel o lil katar o zakono e Moiseseko kai o Del dia e Israele.

2O purvo llive katar o eftato chon, o popo Esdras anda o lil katar o zakono angla e murusa, angla e diskinie ta angla sa e llene kai sai acharena,

3ta sar kana llivosaila llik kai o dopas e lliveseko, chitisarda angla e murusa, angla e diskinie ta angla sa e llene kai sai acharena kai sea angla e plasa kai si angla o udar e paieko. Sa o foro thovela sama sar chitila o lil katar o zakono.

4O kovachi saia pe porrne pe iek than kastuno ta vazdino, cherdo gole ezgodake. Ta pe leki rig e chachi sea pe porrne o Matias, o Sema, o Anias, o Urias, o Jilkias ta o Maseias. Ta pe leko stingo sea o Pedaias, o Misael, o Malkias, o Jasum, o Jasbadana, o Zakarias ta o Mesulam.

5Ondaka o Esdras putarda o lil angla sa o foro, soke vou dikhola mai upre katar sa e llene, ta kana putarde o lil, sa e llene thodepe pe porrne ta thode sama.

6Ondaka o Esdras blagosisarda e Devle, o Del kai si le sa e zor, ta sa o foro vazdia pe va ta phende: ¡Amen! ¡Amen! mapalal bangile ta reslo lengo chikat llik pe phuv, ta blagosisarde e Devle.

7E levitura kai sea o Josue, o Bani, o Serebias, o Jamin, o Akub, o Sabetai, o Odias, o Maseias, o Kelita, o Azarias, o Jozabad, o Janan ta o Pelaias, sikavena e foro so phenel o zakono. Ta e llene achena sa pe po than ta thovena sama.

8Von chitisarde bare avazea sa o lil katar o zakono e Devleko, ta sikavena lenge bristomaia so phenen gola alava kai chitina te sai acharen mai but.

9Ta sar sa o foro rovela soke asunena so phenel o zakono, o gazda o Nejemias, o Esdras kai saia kovachi ta popo, ta e levitura kai phenena e foroke so phenel o zakono, phende saurrenge te na tristonpe ta te na roven, soke gua llive saia dino amare Devleke.

10Ta o Esdras phenda lenge: Llan ta jan lacho jape, pien mol gugli ta ikharen e llenen kai ni cherde jape, soke gava llive si dino e Devleke. Na tristosaon, soke e veselia e Devleki si amari zor.

11Ta i e levitura achavena e llenen, ta phenena lenge te achen ta te na roven, soke gua llive saia dino e Devleke.

12Ondaka saurre llele te jan ta te pien, ta dena jape averen ta cherde iek bari slava, soke acharde so sikade len.

13O duito llive sa e gazda katar e familie ta e popura ta e levitura chidinaile e kovachea o Esdras te sikon katar o zakono,

14ta malade pisime kai o Del phenda e Moiseseke te phenel kai kana ka cheren e slava Devlikani katar o eftato chon, e israelitura saia te zivin telal katar e cherorra cherde katar e krangura e kastenge.

15Goleke ande sa e forura katar o Jerusalem, inllarde e orba kai e llene saia te llan pe burdura te roden krangura katar e maslinke, katar o arraian, katar e palmera o katar fisavo kas kai si le but patra te sai cherdol lenchar e cherorra, prema sar phenel o zakono.

16Ta llele ta ande krangura te cheren peke isto von e cherorra upral pe chera ta ande bar, ta nesave llene cherde len ande bar katar o cher e Devleko, pe plasa katar o udar e paieko, ta pe plasa katar o udar katar o Efrain.

17Sa e llene kai irisaliea katar e Babilonia cherde cherorra katar e krangura ta thodepe telal, ta sar kana saia o Josue chavo katar o Nun, nikada ni cherdea gaia ezgoda, ta saia but bari veselia.

18Cherde e slava Devlikani ande efta llive, ta sa gola llivesa o Esdras chitisarda kotora katar o lil katar o zakono e Devleko, ta ando llive ojtoto chidinaile te blagosin e Devle, prema so phenela o lil katar o zakono.

← Chapter 7 Jump to: Chapter 9 →