Titus 2

Romani Ursari 2018 (Biblia Ande Chib Romani)

← Chapter 1 Jump to: Chapter 3 →

1Sogo ka phene morabi te avel prema o lacho sikadipe.

2E phure morabi te na aven perasenge, morabi te aven ando liubao ta te llanen te mislinpe, te avel chacho lengo pachape, lengo volipe ta lengi zor te cherel len te terpin e patnia.

3Ta i e phuria si te avel len liubao, ta te na inllaren orbe cher cherete, ta te na maton. Morabi te sikon lendar e llene

4ta te sikaven e mai ternen te volin pe rrome ta pe chaurren,

5te aven bizai, chache, te arakhen pi chara, te aven postene ta te kanden pe rrome, te na del niko bilache orba katar e orba e Devleki.

6De zor i e ternen te aven bizai

7ande suako ezgoda, ta te sikon tutar te sai cheren o lachipe. Kana ka sikave len, cher le chachimaia ta bi perasenchar,

8de orba lachimaia, te na dosarel tut niko. Gia vareko te mangela te jalpe amenchar ka avel leke lallao, soke nasti ka phenel amendar niso bilacho.

9Phen e slugenge te kanden pe gazden ande suako ezgoda, te aven pachivale ta te na janpe lenchar.

10Ta te na aven chorane, te aven but chache, golea te sikadol ande suako ezgoda kai si but sukar o sikadipe kai del amen o Del amaro Braduimari.

11Soke kana o Del dia po braduipe sa e suetoke, sikada amenge kai vou volil amen.

12Gua volipe e Devleko sikavel amen te muka o bilachipe ta o zelnipe pe ezgode e suetoke, ta cherel ande gava vreme te ava bizai, te ava chache, ta te avel amen zalba,

13gia adurichara te avel gua veselo llive, kana ka irilpe amaro Del ta amaro Braduimari o Jesukristo.

14Vou mulo pala amende te ikanel amen katar o bilachipe, te chistol amen ta te cherel amen te ava leko foro, ta te ava vrene te chera o lachipe.

15E gua morabi te sikave, de zor, ortosar gazdarimaia. Niko te na mukel tut pe iek rig.

← Chapter 1 Jump to: Chapter 3 →