1 Corinthians 5

Romani Baltic (Библия - Пэ Балтитко Романи чиб (Романэс) 2019)

← Chapter 4 Jump to: Chapter 6 →

1Исын мавлы́н (малва), со машки́р тумэ́ндэ исын биладжаипэ́н и дасаво биладжаипэ́н, саво́ аж на сыс джиндло́ машки́р Наюдэ́ндэ, со екх ману́ш рикирэ́ла лэ́скирэ-дадэ́скирэ ромня́ пал ромня́тэ.

2И тумэ́ ишчо (инкэ́) пхутёна, заме́ст дова́, соб (кай) тэ ровэ́н пал дава́, и соб (кай) тэ джал криг тумэ́ндыр одова́ ману́ш, кон кэрдя́ дасаво рэ́ндо (де́ло).

3Мэк мэ на сом тумэ́нца, нэ мэ сы́рбы думинава пал тумэ́ндэ и придуминдём хась (ка́ра) одолэ́скэ, кон кэрдя́ дасаво рэ́ндо,

4ваш Ра́скирэ-Дэвлэ́скиро лав, ке́ли тумэ́ скэдэ́напэ кхэтанэ́ дрэ кхангири́ и сы́рбы пир миро ду́хо (фа́но) и Ра́скирэ-Дэвлэ́скирэ зорья́са амарэ́ Исусо́скирэ Христососкирьяса,

5тэ отдэ́н адасавэ́ манушэ́с налачхэскэ тэ мэнчынэл лэс лэ́скири лоч (плоть), сави́ исын дро грэ́хо, соб (кай) тэ зракхэн лэ́скиро ду́хо (фа́но) дро Ра́скирэ-Дэвлэ́скиро дывэ́с, амарэ́ Исусо́скиро Христосо́скиро.

6Дава́ исын нашукар, со тумэ́ шарэнапэ. Ци тумэна джинэ́на, со тыкнэ́ рошчынатыр шутлёла саро́ хумэр (цясто)?

7Палдава́ выжужакирэн пхуранэ́-грэхоскири рошчына, соб (кай) тумэ́ тэ явэ́н нэвонэ́ хумэрэса, пал-дова́ со тумэ́ ж сан жужо́ хумэр, би рошчынакиро, пал-дова́ со амаро́ Христо́со, Патрадитко Бакроро́, сыс мулякирдо сыр свэ́нто дыибэ́н пал амэ́ндэ.

8Палдава́ ява́са тэ свэнкинас свэ́нко на пхуранэ́ рошчынаса, савэ́ сыс пхэрды́ грэхоса и песьцёнымаса, а би рошчынакирэ марэ́са, саво́ исын пхэрдо́ жужыпнаса (чыстотаса) и чачипна́са.

9Мэ чхиндём тумэ́нгэ дро миро лыл, соб (кай) тумэ́ндэ тэ на явэ́л нисо́ кхэтанэ́ манушэ́нца, савэ́ дживэ́на джувле́нца би сэвлакиро.

10Нэ на напатяибнаскирэнца, савэ́ исын свэто́стыр, и, савэ́ дживэ́на джувле́нца би сэвлакиро, ци сквамнымарьенца ци прахарьенца, ци идолэ-мангипнаскирэнца, пал-дова́ со тумэ́нгэ трэиндя́ тэ джа́н далэ́ свэто́стыр.

11Нэ какана́ мэ чхиндём тумэ́нгэ тэ на кэрэ́н нисо́ кхэтанэ́ одолэ́ манушэ́са, саво́ кхарэ́лапэ пшалэса, а кокоро́ дурэды́р дживэ́ла джувле́нца би сэвлакиро, ци ячэ́лапэ сквамнымариса, ци идолэ-мангипнаскирэса, ци кошыбнариса, ци матымариса, ци прахариса; кадасавэса и тэ на бэшэ́н тэ хан кхэтанэ́.

12Со ж ма́нгэ тэ сэндинав (тэ сэндякирав) одолэ́н, савэ́ нанэ кхангирья́тыр? Ци на трэй тумэ́нгэ тэ сэндинэ́н, савэ́ исын кхангирья́тыр?

13Нэ одолэ́н, савэ́ исын на кхангирья́тыр, Дэвэ́л сэндякирэ́ла! Палдава́ традэ́н криг тумарэ́ кхангирья́кирэ скэдыибна́стыр дошалэ манушэ́с.

← Chapter 4 Jump to: Chapter 6 →