1 Peter 3

Romani Baltic (Библия - Пэ Балтитко Романи чиб (Романэс) 2019)

← Chapter 2 Jump to: Chapter 4 →

1Адя́кэ-паць и джувля́лэ, кандэ́н пэ́скирэ ромэн, со ко́ли вари-кон лэ́ндыр на патя́ла Дэвлэ́скирэ лавэ́скэ, тэды тумэ́ пэ́скирэ джиибнаса сы́рбы пирикэрэна лэн, со ёнэ би лавэскиро явэ́на тэ патя́н Дэвлэ́скэ,

2и ке́ли рома́ явэ́на тэ дыкхэ́н тумаро́ дэвлы́тко джиибэ́н, и дова́, со тумэ́ дэ́на паты́в лэ́нгэ и дарэ́н Дэвлэ́стыр;

3мэк тэ явэ́л тумаро́ шукарипэ́н на дро балэнгиро закхувибэн и на дро сувнака́й, со исын пэ тумэ́ндэ и на дро барвало́ урибэ́н;

4а мэк тэ явэ́л тумаро́ шукарипэ́н дро тумаро́ ило́, саво́ исын надыцьло (набицяло), пэ́скирэ штылонэ́ и ковлэ́-илэ́скирэ шукарибна́са, саво́ на кирнёла и исын древа́н шука́р анги́л Дэвлэ́стэ.

5Пал-дова́ со адя́кэ-паць вари-ке́ли и свэ́нта джувля́, савэ́ндэ сыс наде́я пэ Дэвлэ́стэ, шука́р прикэдэнас пэс, нэ англэды́р сарэ́стыр ёнэ кандэнас пэ́скирэ ромэн;

6адя́кэ-паць и Сара кандэлас Авраамос и кхардя́ лэс пэ́скирэ хула́са, а тумэ́ ж сан ла́кирэ чхая́, ко́ли тумэ́ кэрэ́на лачхипэ́н, тэды тумэ́ на дарэ́н нисавэ трашаибнастыр.

7Адя́кэ-паць и тумэ́, муршалэ, дживэ́н и ґалён пэ́скирэ ромнен, пал-дова́ со джувлендэ исын тыкнэды́р зор и отлыджанпэ адя́кэ кэ ёнэ, сыр кэ бизорья́кирэ, кутякирэ́н (уважынэн) лэн, пал-дова́ со ёнэ лэ́на паш дро ве́чно джиибэ́н Дэвлэ́стыр, сыр и тумэ́. Кэрэ́н адя́кэ, тэды ни сави́ ва́нта (сцяна) на явэ́ла пэ дром тумэ́ндэ тэ мангэ́нпэ Дэвлэ́скэ.

8Явэ́н дрэ екх годы́ екх екхэ́са, подэн васта́ екх екхэ́скэ дро пхарипэ́н, тангинэ́н (жалинэн) екх екхэ́с, сыр пша́ла, малынэнпэ (дружынэн) и явэ́н ковлэ́-илы́тка,

9на отдэ́н палэ фуипнаса пал фуипэ́н, ци фуй ракирибнаса пал дова́, со ракирэ́на фуипэ́н пэ тумэ́ндэ: а пэ яви́р мангэ́нпэ Дэвлэ́скэ, пал-дова́ со тумэ́ са́нас кхардэ́, соб (кай) тэ дорэсэн Дэвлэ́скиро бахтякирибэ́н.

10Палдова́ со: “Конэ́скэ исын дро́го джиибэ́н и тэ дыкхэ́л лачхэ́ дывэса́, одова́ ману́ш мэк тэ обрикирэл пэ́скири чиб фуе́ лавэ́ндыр и пэ́скирэ ушта́ хоханэ́ лавэ́ндыр,

11мэк ёв тэ ракхэ́л пэс тэ кэрэ́л фуипэ́н, а мэк ёв тэ кэрэ́л лачхипэ́н; мэк ёв тэ родэ́л рама́нё (миро) и тэ причхувэл зор тэ латхэл лэс;

12пал-дова́ со Дэвэ́л дыкхэ́ла чачунэ́ манушэ́н и шунэ́ла лэ́нгиро мангипэ́н Лэ́скэ; нэ Дэвэ́л исын проти одолэ́ндэ, кон кэрэ́ла фуипэ́н.”

13И кон дукхавэла тумэн, ко́ли тумаро́ ило́ хачола тэ кэрэ́н лачхипэ́н?

14Нэ ко́ли тумэ́ злыджана пхарипэ́н пал чачипэ́н, тэды тумэ́ сан бахталэ́, на дарэ́н, мэк нисо́ тэ на трашакирэл тумэн;

15а рикирэ́н дро ило́ Христосо́с сыр Свэнтыма и дэн паты́в Лэ́скэ, сыр Ра́скэ-Дэвлэ́скэ дрэ тумарэ́ илэ, уса́ды / сак (всегда) явэ́н скэдынэ́ тэ затэрдён лавэ́са, ке́ли вари-кон явэ́ла тэ пхучэл тумэ́ндыр пал тумари́ наде́я, нэ кэрэ́н дава́ ковлэ́ илэ́са и дара́са;

16тэ явэ́л тумэ́ндэ лачхи́ паты́в, соб (кай) одолэ́ мануша́, савэ́ ракирэ́на проти тумэ́ндэ, тэ явэ́н ладжакирдэ́, ке́ли ёнэ нашукар отлыджанапэ кэ тумэ́ пал тумаро́ лачхо́ джиибэ́н дрэ Христосо́стэ.

17Пал-дова́ со, ко́ли пэ дава́ исын Дэвлэ́скири во́ля, фэды́р тэ лыджас пхарипэ́н пал лачхипэ́н, сыр пал дова́, ке́ли амэ кэра́са фуипэ́н;

18пал-дова́ со и Христо́со, соб (кай) тэ янэл амэн кэ Дэвэ́л, е́кхвар мыя́ пал амарэ́ грэ́хи, чачуно́ пал начачунэндэ, Лэ́скирэ Маса́ сыс отдынэ́ пэ мэрибэ́н, а Лэ́скиро Ду́хо (Фа́но) сыс рискирдо кэ джиибэ́н;

19кадалэ́ Духо́са Христо́со гия́ и пхэндя́ лав одолэ́ духэнгэ, савэ́ сыс дро штарибэ́н;

20савэ́ вари-ке́ли на кандынэ́ Дэвлэ́с, и савэ́н Дэвэ́л вырикирибнаса ужакирдя саро́ дава́ часо, пака Ноё кэрэ́лас ковчэго (мохто́), дро саво́ загинэ́ на́бут мануша́, охтоджинэ (бидуе́нгиро дэш), савэ́ зракхнэпэ пане́стыр:

21дава́ пани́ исын сы́рбы копия долэ́скэ, ке́ли амэ боласапэ и со зракхэ́ла амэн. Дава́ нанэ мэлалэ́-лоча́киро обморибэн, а тумэ́ дэ́на лав лачхэ́ патыва́са Дэвлэ́скэ пир Исусо́скирэ-Христосо́скиро отджидыипэн,

22Саво́ ґаздыя́пэ дро Болыбна́скиро Раё и исын пир чачо́ васт Дэвлэ́стыр, и Лэ́скэ дынаринэна сарэ́ Янго́лы, Лэ́стэ исын сарэ́ правы и сарэ́ зорья.

← Chapter 2 Jump to: Chapter 4 →