1 Thessalonians 1

Romani Baltic (Библия - Пэ Балтитко Романи чиб (Романэс) 2019)

Jump to: Chapter 2 →

1Павли́стыр и Силуаностыр и Химастыр, Фесалоникийцэнгирэ-кхангирья́кирэ скэдыибнаскэ, саво́ исын Дэвлэ́скирэ Дадэ́скиро и Ра́скирэ-Дэвлэ́скиро, Исусо́скиро Христосо́скиро: мэк тэ явэ́л бахталыпэ́н тумэ́нгэ и рама́нё (миро).

2Амэ ўса́ды (сак) парикираса Дэвлэ́скэ пал сарэ́ндэ тумэ́ндэ, и рипираса тумэн дро амаро́ мангипэ́н Дэвлэ́скэ,

3ке́ли амэ рипираса тумэн анги́л амарэ́ Дэвлэ́стэ Дадэ́стэ пал тумари́ буты́ пир тумаро́ патяибэ́н и паты́в кэ яви́р мануша́, амэ джина́са пал тумаро́ вырикирибэн тэ ужакирас лачхипэ́н амарэ́ Ра́стыр-Дэвлэ́стыр, Исусо́стыр Христосостыр анги́л амарэ́ Дэвлэ́стэ-Дадэ́стэ,

4амэ джина́са, мирэ́ дро́га, со Дэвлэ́скэ ячнэ́ дро́га тумэ́, и Ёв выкэдыя́ тумэн,

5пал-дова́ со амаро́ роспхэныбэн пал бахталы́ зан (звесь) сыс тумэ́ндэ на со екхэ лавэ́нца, нэ и зорья́са и Свэнтонэ́ Духо́са бутэ́ допхэныбнаса, сыр тумэ́ кокорэ́ джинэ́на, савэ́ амэ са́мас ваш тумэ́нгэ.

6И тумэ́ лынэ́ тэ кэрэ́н адя́кэ, сыр и амэ, и сыр Рай Дэвэ́л, и прилынэ́ Дэвлэ́скиро лав бутэ́ пхарипнэнца и радыма́са, саво́ дыя́ тумэ́нгэ Свэ́нто Ду́хо (Фа́но),

7адя́кэ, со тумэ́ ячнэ́ примероса (сыкаибнаса) ваш сарэ́ патяибнаскирэнгэ кэ Македония и кэ Ахаия.

8Пал-дова́ со тумэ́ндыр яця́ джиндло́ манушэ́нгэ Дэвлэ́скиро лав на дрэ екх Македония и Ахаия, нэ тумаро́ патяибэ́н дрэ Дэвлэ́стэ яця́ джиндло́ пир сарэ́ штэ́ты, пал-дова́ со амэ́нгэ ни палсо́ на трэй тэ роспхэнэ́н;

9пал-дова́ со ёнэ кокорэ́ роспхэндлэ́ пал амэ́ндэ, сыр тумэ́ прилынэ́ амэн, ке́ли амэ явдя́м кэ тумэ́: и сыр тумэ́ рисинэ́ кэ Дэвэ́л идолэндыр, соб (кай) тэ кэрэ́н свэ́нто буты́ джидэ́ и чачунэ́ Дэвлэ́скэ,

10и тэ ужакирэн Лэ́скирэ Чхавэ́с, саво́ явэ́ла Болыбна́скирэ Раёстыр, Савэс Ёв отджидякирдя́ мулэ́ндыр, Исусо́с, Саво́ зракхэ́ла амэн Дэвлэ́скирэ холя́тыр, сави́ явэ́ла.

Jump to: Chapter 2 →