1 Timothy 5

Romani Baltic (Библия - Пэ Балтитко Романи чиб (Романэс) 2019)

← Chapter 4 Jump to: Chapter 6 →

1На сыка́в банг пхурэ́ манушэ́скэ, нэ отлыджапэ кэ ёв, сыр кэ пэ́скиро дад, а кэ тэрнэ́ отлыджапэ, сыр кэ пэ́скирэ пша́ла,

2отлыджапэ кэ пхури джувлы́, сыр кэ дай, кэ тэрнэ́ джувля́ отлыджапэ, сыр кэ пхэня́ сарэ́ жужымаса.

3Кутякир (уважын) пивле́н (удовэн), савэ́ ячнэ́пэ би ромэнгиро чачунэ́с;

4ко́ли вари-савьятэ пивлятэ исын чхавэ́ ци ўнуки, то мэк ёнэ англэды́р тэ сыклён тэ сыкавэ́н дэвлыткима кэ пэ́скири сэ́м΄я (ири́) и кэ дада́, дава́ исын лачхо́ Дэвлэ́скэ.

5А чачуны́ пивлы и сави́ исын екхджины, ужакирэ́ла лачхипэ́н Дэвлэ́стыр и мангэлапэ Дэвлэ́скэ и мангэ́ла Дэвлэ́с дывэ́с и рат.

6Нэ, одоя, сави́ дживэ́ла ваш пэ́скиро камибэн, исын сы́рбы мулы, на дыкхи́, со ёй исын джиды.

7И дава́ пхэн зорья́са манушэ́нгэ, соб (кай) ёнэ тэ явэ́н бидошэнгирэ.

8А ко́ли вари-кон пал пэ́скирэ манушэ́ндэ и буты́р сарэ́стыр пал кхэритконэндэ на дыкхэ́ла, одова́ ману́ш отпхэндяпэ патяибнастыр и ёв исын фуеды́р одолэ́стыр, саво́ на патя́ла.

9Мэк ни екх пивлы тэ на зачхинэлпэ дрэ кхангирья́кири лылвари́ тэ помогинэн ла́кэ, пака ла́кэ нанэ шовдэша́ бэрш, соб (кай) ла́тэ тэ явэ́л екх ром,

10савья́ джинэ́на пир ла́кирэ лачхэ́ рэ́нды, ко́ли ёй выбарьякирдя лачхэнца пэ́скирэ чхавэ́н, ко́ли ёй прилэлас чужонэ́ манушэ́н, савэ́ндэ на сыс, кай тэ дживэ́н, мордя ґэра́ свэнтонэнгэ, и помогинэлас одолэ́нгэ, конэ́стэ сыс би́да, и ко́ли ёй какана́ кэрэ́ла дурэды́р лачхэ́ рэ́нды.

11На прилэ́ тэрнэ́ пивлен дрэ кхангирья́кири лылвари́ тэ помогинэн лэ́нгэ дрэ кхангири́, пал-дова́ со, ке́ли лэ́нгирэ-масэ́нгиро камибэн ячэ́ла зоралэды́р тырдыпнастыр кэ Христо́со, ёнэ нэвэ́стыр камэ́на тэ джа́н палоро́м.

12Ёнэ кокорэ́ ячэ́напэ бангэ́, со ёнэ мэкнэ́ англатуно́ патяибэ́н и дыно́ лав.

13И ёнэ адя́кэ-паць на кэрэ́на нисо́, а псирэ́на пир кхэра́, злыджана плётки, рэсэна на дрэ пэ́скирэ рэ́нды тэ ракирэ́н дова́, со налачхэ́с тэ ракирэ́н.

14И палдава́ мэ кама́м, соб (кай) тэрнэ́ пивля, тэ джа́н палоро́м тэ биянэн чхаворэ́н, и тэ лыджа́н кхэри́тко хулаибэн, тэ на дэн нисаво́ саштыпэн тумарэ́ вэргоскэ, соб (кай) тэ ракирэ́л фуипэ́н.

15Пал-дова́ со вари-савэ́ лэ́ндыр змардэпэ патяибнаскирэ дромэ́стыр и гинэ́ пал налачхэстэ.

16Ко́ли вари-савэ́ патяибнаскирэ джувля́тэ исын пивля (удовы) кхэрэ́, мэк ёй тэ дэл васт лэ́нгэ, и мэк ёй тэ на чхувэ́л пхарипэ́н пэ кхангири́, соб (кай) ёй дэл васт чачунэ́ пивленгэ.

17Мэк годэпхурэ́ (пхурэды́р пша́ла), савэ́ шука́р дынаринэна ваш Дэвлэ́скэ, тэ явэ́н дрэ бари паты́в, буты́р сарэ́стыр одолэ́, савэ́ роспхэнэна Христосо́скиро лав и сыклякирэ́н;

18пал-дова́ со дрэ свэ́нто чхиныбэ́н исын пхэндло́: “На закэр муй бутярнэ́ гурувэскэ пэ гив, и бутярно исын мол тэ лэл плэскирибэн пал пэ́скири буты́.”

19На прилэ́ бангякирибэн пэ годэпхурэстэ (пхурэдырэ пшалэ́стэ) ни дро со, сыр анги́л дуендэ ци тринэндэ якхитконэндэ/ якхалэндэ (свидетелендэ).

20Манушэ́н, савэ́ кэрдэ́ грэ́хо, бангякир маму́й анги́л сарэ́ндэ, соб (кай) яви́р тэ дарэ́н.

21Мэ засовлахава тут анги́л Дэвлэ́стэ и Растэ – Дэвлэ́стэ, Исусо́стэ Христосо́стэ и Янголэндэ, савэ́н выкэдынэ́, тэ зракхэс далэ́ упхэныбэна́ и адя́кэ нисо́ тэ на парувэс ваш вари-конэ́скэ, соб (кай) ничы́ тэ на кэрэ́с пир пэ́скиро ило́.

22На сыгнёв (на яв сы́гно) тэ чхувэ́с упрэ́ васта́ ни пэ конэ́стэ, соб (кай) тумэ́ тэ на явэс кхэтанэ́ манушэ́нца, савэ́ кэрэ́на грэ́хо и на чхув упрэ́ васта́ пэ манушэ́стэ, саво́ наґара лыя́ тэ патял, ракх пэс набангэса (жужэса)

23Дурэды́р на пи екх пани́, нэ выпи на́бут мол (вино) ваш тыро́ кужум и тыро́ часто насвалыпэн.

24Вари-савэ́ манушэ́нгирэ грэ́хи исын адя́кэ бицялэ, со ёнэ янэ́на пэ пэ́стэ сэ́ндо англэды́р одолэ́ часостыр, саво́ явэ́ла, нэ яви́р манушэ́нгирэ грэ́хи пака исын набицялэ, ёнэ джа́на лэ́са, карик и ёв джа́ла.

25Адя́кэ-паць и лачхэ́ рэ́нды исын бицялэ; ко́ли ёнэ нанэ дасавэ́, на могинэн тэ явэ́н ґарадэ́.

← Chapter 4 Jump to: Chapter 6 →